ەشكىمنەن جەڭىلمەگەن بوكسشى جانىبەك ءالىمحان ۇلىن جەكپە-جەككە شاقىردى (ۆيدەو)

ۇلىبريتانيالىق كاسىپقوي بوكسشى فەليكس كەش جانىبەك ءالىمحان ۇلىن جەكپە-جەككە شاقىردى.  24.kz تەلەارناسىنىڭ حابارلاۋىنشا، فەليكس كەش بۇگىنگە دەيىن 16 رەت قولعاپ ءتۇيىستىرىپ، سونىڭ بارىندە جەڭىسكە جەتكەن. 10 جەكپە-جەكتى ۋاقىتىنان بۇرىن اياقتاعان. سونىڭ ارقاسىندا ول WBO رەيتينگىندە ءتورتىنشى ورىنعا كوتەرىلگەن.

«قازاق ستايل» ء(الىمحان ۇلىنىڭ لاقاپ اتى، — رەد.) كەل ايقاسايىق. جۇدىرىقتاساتىن ەشكىم جوق دەپ ءالى ايتىپ ءجۇرسىڭ عوي. مەنىمەن ايقاستا ساۋداڭ بىتەدى، — دەدى ول Twitter جەلىسىندە.

جانىبەك ءالىمحان ۇلى ءدال وسى تۇجىرىم بويىنشا چەمپيوندىق بەلدىكتىڭ يەگەرى.

قازاق بوكسشىسىنىڭ كاسىپقوي بوكستاعى كورسەتكىشى دە وتە جاقسى. ول 14 رەت جەكپە-جەككە شىعىپ، سونىڭ بارىندە قارسىلاسىن جەڭگەن.

جانىبەك ءالىمحان ۇلى  سوڭعى رەت بيىل مامىر ايىندا شارشى الاڭعا شىقتى. سول كەزدە ول اقش-تا ۇيىمداستىرىلعان بوكس كەشىندە كانادالىق ستيۆەن باتلەردى ۇتىپ، WBO تۇجىرىمى بويىنشا الەم چەمپيونى اتاعىن قورعاپ قالدى. ال فەليكس كەش سوڭعى رەت بىلتىر جەلتوقساندا رينگكە شىققان. ول انگليانىڭ ليدس قالاسىندا پورتۋگاليالىق كەلسو نەۆەشامەن كەزدەسىپ، تورەشىلەر شەشىمىمەن جەڭىسكە جەتكەن.