جانىبەك ءالىمحان ۇلى «كانەلونى» جەكپە-جەككە شاقىردى (ۆيدەو)

ورتا سالماقتا WBO بەلبەۋىنىڭ يەگەرى جانىبەك ءالىمحان ۇلى ەكىنشى ورتا سالماقتاعى الەمنىڭ ءابسوليۋتتى چەمپيونى ساۋل «كانەلو» الۆارەستى جەكپە-جەككە شاقىردى. ول ES News ارناسىنا بەرگەن سۇحباتىندا «كانەلونى» ءبىرىنشى راۋندتا نوكاۋتقا جىبەرىپ، جەڭەتىنىن ايتتى.

-ونىڭ ىستەپ جاتقانى بىزدەنە قاشۋدىڭ امالى عوي، — دەدى جانىبەك ءالىمحان ۇلى.

-ول قورقا ما؟

-ءيا، ارينە، قورقادى. قورىققاننان كەيىن سونداي اڭگىمەلەر ايتادى عوي.

-ەرتەڭ بوكستاسساڭ نە بولادى؟

-ونى قازىر بارىپ بوكستاسسام دا قۇلاتامىن.

-نەشىنشى راۋندتا؟

-ءبىرىنشى راۋندتا.

-مەن ءوزىمنىڭ قازاق ءستيلىن الەمدە، تاريحتا قالدىرامىن. سول ءۇشىن جۇمىس ىستەپ جاتىرمىز. باار ەڭبەگىم سوعان ارنالىپ وتىر.

جەكپە-جەك الدىندا جانكۇيەرلەرگە نە ايتاسىڭ؟

-وتە قىزىقتى جەكپە-جەك بولادى. ءوزىمىزدىڭ ءستيلدى الەمگە تانىتۋدا ءارى قاراي جۇمىس ىستەيمىز. بار كۇشىمىزدى سالامىز. وسى جەكپە-جەكتە نوكاۋت كۇتەسىزدەر.

-«كانەلوعا» نە ايتاسىڭ؟

-«كانەلو»، كەزدەسەيىك، بوكستاسايىق! ءبىزدىڭ قازاق ءستيلدىڭ ءدامىن كورسىن! 14 قازاندا وتە قىزىقتى جەكپە-جەك بولادى. گەرمانيالىق قارسىلاسپەن جۇدىرىقتاسامىن. قۇداي قالاسا، قولداۋ كورسەتىڭىزدەر! تىلەۋلەس بولىڭىزدار! دۇعادا بولىڭىزدار. ينشاللا، ەكى تيتۋلمەن ەلگە قايتامىز.

-نەگە «كانەلونى» ءبىرىنشى راۋندتا قۇلاتامىن دەپ ايتاسىز؟

-ونىڭ ەشنارسەسى قالمادى. ونىڭ تاكتيكاسى ەسكىردى. بىزگە قولداناتىن تاكتيكاسى جوق، شىنى كەرەك، ول ءبىزدى ۇرىپ تا ۇلگەرمەيدى. سونى اشىق ايتۋ كەرەك. كەشەگى سوڭعى جەكپە-جەگىن كوردىڭىزدەر عوي.  — دەدى بوكسشى.

ودان كەيىن ول بريتانيالىق كريس يۋبەنكتى دە ءبىرىنشى راۋندتا قۇلاتاتىنىن ايتتى. «ول دا مەنەن قاشىپ ءجۇر. ول مەنەن قورقادى. مەن ونى ءدال قازىر نوكاۋتقا تۇسىرەتىن ەدىم. كەزدەسسەك، ءبىرىنشى راۋندتا قۇلاتامىن»، — دەدى بوكسشى.

جانىبەك ءالىمحان ۇلى كەلەسى جەكپە-جەگىن گەرمانيالىق بوكسشى ۆينچەنتسو گۋالتيەريگە قارسى وتكىزەدى. چەمپيون اراسىنداعى ايقاس 14 قازاندا اقش-تىڭ تەحاس شتاتىنداعى روزەنبەرگ  قالاسىندا بولادى. وسى جەردەگى Fort Bend Epicenter ارەناسىندا باسقا دا بوكسشىلاردىڭ جەكپە-جەكتەرى جوسپارلانعان.

گەرمانيا بوكسشىسى ۆينچەنتسو گۋالتيەري — IBF چەمپيونى. ول وسىعان دەيىن شىلدە ايىندا برازيليالىق ەسكيۆا فالكاونى جەڭىپ، چەمپيون اتانعان.

ال ءالىمحان ۇلى سوڭعى رەت مامىردا چەمپيوندىق بەلبەۋىن اقش-تىڭ كاليفورنيا شتاتىنداعى ستوكتون قالاسىندا قورعادى. سول كەزدە ول كانادالىق ستيۆەن باتلەردى ەكىنشى راۋندتا نوكاۋتپەن جەڭدى.

 

داستان كەنجالين،

استانا