يۋري ششۋكين: «دەۆيس كۋبوگىندا كۇتپەگەن ناتيجە دە بولۋى مۇمكىن»

دەۆيس كۋبوگىنىڭ پلەي-وفف كەزەڭىندە 16-17 قىركۇيەكتە سوفيادا وتەتىن ماتچقا وراي قازاقستان جانە بولگاريا تەننيس قۇرامالارىنىڭ كاپيتاندارى ءوز ويلارىن ورتاعا سالدى، دەپ حابارلادى قازاقستان تەننيس فەدەراتسياسى.

كوماندا كاپيتانى يۋري ششۋكين قارسىلاستى باعالاۋ كەرەكتىگىن اتاپ ءوتتى.

ءبىز الداعى ماتچقا تولىقتاي دايىنبىز. الدىن الا كەلىپ، كورت پەن وسىنداعى جاعدايعا بەيىمدەلدىك. بولگاريا قۇراماسى ءوز كوشباسشىسى گريگور ديميتروۆسىز ويناۋى مۇمكىن. سوعان قاراماستان، قۇرامى كۇشتى. دەۆيس كۋبوگى – كوماندالىق ويىن. سوندىقتان كۇتپەگەن ناتيجە دە بولۋى مۇمكىن. ءبىز قولدان كەلگەننىڭ ءبارىن جاساپ، كەلەسى كەزەڭگە وتۋگە بار كۇشىمىزدى سالامىز، — دەدى ششۋكين ءباسپاسوز ءماسليحاتىندا.

بولگاريا كاپيتانى ۆالەنتين ديموۆ قازاقستان قۇراماسىن باسەكەنىڭ ءفاۆوريتى دەپ ەسەپتەيدى.

قازاقستان مول تاجىريبەسىمەن جانە مىقتى قۇرامىمەن ەرەكشەلەنەدى. سوندىقتان ءبىز ونى فاۆوريت دەپ سانايمىز. ديميتروۆتىڭ جوقتىعى تۋرالى ايتساق، ءبارى دە كۇنتىزبەگە بايلانىستى. الەمدىك رەيتينگتە جوعارى كوتەرىلۋگە مۇمكىندىك بەرەتىن جارىسقا قاتىسپاۋعا بولمايدى. دەگەنمەن جەرەبەگە دەيىن ءالى ۋاقىت بار، ناقتىسى كەيىن بەلگىلى بولادى، — دەدى ديموۆ.

قازاقستان ەرلەر قۇراماسىنىڭ دەمەۋشىلەرى — «سامۇرىق-قازىنا» ۇاق» اكتسيونەرلىك قوعامى جانە Sport Qory سپورتتى قولداۋ قورى.

فوتو: قازاقستان تەننيس فەدەراتسياسى