كۇرەستەن ءاچ: ءجاميلا باقبەرگەنوۆا قولا جۇلدەگەرى اتاندى

سەربيانىڭ بەلگراد قالاسىندا ءوتىپ جاتقان كۇرەستەن الەم چەمپيوناتىندا ءجاميلا باقبەرگەنوۆا ايەلدەر كۇرەسىنەن قولا مەدال جەڭىپ الدى.

تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، ۇلتتىق قۇرامانىڭ كوشباسشىسى پولشانىڭ وكىلى ناتاليا يۆونا ستشالكانى 4:1 ەسەبىمەن جەڭىپ، وسىمەن ءۇشىنشى رەت قاتارىنان الەم چەمپيوناتىنىڭ جۇلدەگەرى اتاندى. بۇعان دەيىن 27 جاستاعى سپورتشى 2019 جىلى نورۆەگيانىڭ وسلو قالاسىندا جالاۋى جەلبىرەگەن دۇنيەجۇزى باسەكەسىندە، ودان كەيىن بىلتىر بەلگرادتا وتكەن جارىستا كۇمىس جۇلدەگە يە بولعان. ءجاميلا باقبەرگەنوۆا — ايەلدەر كۇرەسىندە مۇنداي ناتيجەگە جەتكەن تۇڭعىش قازاق سپورتشىسى.

باقبەرگەنوۆا چەمپيوناتتى 1/8 اينالىمنان باستاپ، ەۋروپا چەمپيوناتىنىڭ قولا جۇلدەگەرى سەرب فانني ناگيدىڭ جاۋىرىنىن جەرگە تيگىزىپ، سوسىن، رەسەيلىك كسەنيا بۋراكوۆادان 7:1 ەسەبىمەن ايلاسىن اسىردى الايدا جارتىلاي فينالدا داۆااناسان ەنح امارىنعا جول بەردى.

وسى رەتتە ءجاميلا باقبەرگەنوۆا 72 كگ سالماقتا ازيا چەمپيوناتىنا ءۇش رەت جەڭىپ العان تۇڭعىش قازاق سپورتشىسى ەكەنىن دە ايتا كەتەيىك. قازىر ونىڭ ەنشىسىندە ازيا چەمپيوناتىنىڭ بەس مەدالى بار. ول 3 التىن، 1 كۇمىس، 1 قولا جۇلدەنىڭ يەسى.

ءجاميلا باقبەرگەنوۆا الەمچەمپيوناتىنان كەيىن ۇلتتىق قۇرامامەن ەلگە ورالىپ، قىتايدا ءوتىپ جاتقان ءحىح جازعى ازيا ويىندارىنا دايىندىقتى باستايدى. حانچجوۋ قالاسىندا ول وليمپيادا باعدارلاماسىنا كىرەتىن 76 كگ سالماقتا باق سىناپ، تاجىريبەلى ەلميرا سىزدىقوۆانىڭ ورنىن باسادى.

جالپى سەربيا استاناسىنداعى الەمدىك دودا 24 قىركۇيەكتە مارەسىنە جەتەدى. وندا  77 مەملەكەتتەن جينالعان 1 000-عا تارتا سپورتشى الەم چەمپيونىن انىقتاپ جاتىر.

شامكەن بايىربەك،

استانا

فوتو: facebook.com/musagali.taskaliev

تۋريزم جانە سپورت مينيسترلىگى سپورتتى دامىتۋ ديرەكتسياسى