ازيادادا ورىنداردان ءۇمىتى جوق سپورتشىلاردى ۇيدە قالدىرعان ءجون بولار ەدى – نەسىپ ءجۇنىسباي ۇلى

رەداكياعا سپورت ءجۋرناليسى، جازۋشى، سپورت قايراتكەرى نەسىپ ءجۇنىسباي ۇلىنىڭ قىتايدىڭ حانچجوۋ قالاسىنان XIX ازيا ويىندارىنىڭ اشىلۋ سالتاناتى، وسى جارىسقا قاتىسىپ جاتقان سپورتشىلارىمىز تۋرالى ماتەريالى كەلىپ ءتۇستى. ماتەريال اۆتورى ازياداداعى جارىستار، وعان قاتىساتىن وتانداستارىمىزدىڭ مۇمكىندىگى تۋرالى ايتا كەلىپ، قۇرلىقتىڭ وليمپياداسى سانالاتىن ويىنداردى ناسيحاتتاۋدا ءوز ۇسىنىستارىن ايتادى. ەندى سونى وقىرماننىڭ نازارىنا ۇسىنۋدى ءجون كورىپ وتىرمىز.

تۇندە عانا تورتكۇل الەمدى تاڭ قالدىرىپ،سالتاناتتى تۇردە اشىلعان XIX جازعى ازيا ويىندارى ءوز سورەسىنەن شىعىپ، العاشقى قادامىن جاساپ تا ۇلگەردى.

بۇگىن ءدۇلدۇل جارىستىڭ شىمىلدىعىن اشقان بەسسايىسشىلار مەن دزيۋدوشىلار اراسىندا فينالعا بارىپ ءبىر-اق تىرەلگەن قازاقستاندىق سپورتشىلار بار. ولار جايلى جارق ەتكەن جەڭىستەرىنەن كەيىن اڭگىمەلەيمىز.

قىتايدىڭ حانچجوۋىنداعى ازيا ويىندارى كەرەمەتتەي كورىنىستەرگە تولى بوپ اشىلدى. اۋەلدە قىتاي ەلىنىڭ ەڭبەكقور حالقىنىڭ ماڭداي تەرىن بەينەلەيتىن كورىنىستەرگە تولى ستاديون-ساحنا ۇزاماي الەمدىك وركەنيەتتىڭ عاجاپ وركەندەۋىن پاش ەتىپ، ادام كوزى كورسە دە سەنبەس كورىنىستەرمەن باس يگىزگەنىن نەسىنە جاسىرامىز. جارىق قۋاتىمەن عالامات ساحنالىق كورىنىستەرگە كۋا ەتكەن ۇيىمداستىرۋشىلار بيىك اسپانعا قىتاي تۋى مەن ازيا وليمپيادالىق كەڭەسىنىڭ جالاۋىن قاداعانشا ستاديونعا لىق تولعان 80 000 جانكۇيەر دەمدەرىن ءبىر-اق رەت العان شىعار. ءار ەلدىڭ سپورت دەلەگاتسيالارىنىڭ شەرۋى دە بۇل جولى وزگەشە بولدى. كەرەمەتتەي تارتىمدى،كەرەمەتتەي سۇيكىمدى بولدى!

ءبىز ءوز ەلىمىزدىڭ مەملەكەتتىك تۋىن جانارىمىزبەن ايمالاپ وتىرىپ شىعارىپ سالدىق. شەرۋگە شىققان سپورتشىلارىمىزدىڭ قاراسى بۇكىل قاتىسۋشىلار اراسىندا 2-5 ورىنداردا بولعانى داۋسىز. بۇل ازىرگە سان جاعىنان قول جەتكەن جەڭىس قانا. ساپا جاعىنان الاتىن ورىن الدا — نۇكتەنىڭ اكەسى قازاننىڭ 8- كۇنى جارىستىڭ جابىلۋ سالتاناتى كۇنى جاريالانادى. سول كۇنى «بالاپانداردى» سانايمىز. «ە،ءبارىن كورىپ العان سوڭ ءبارى بىلگىش!»، دەپ ايتپاۋ ءۇشىن بۇگىن ايتارىم مىناۋ: ازيا ويىندارىنا 524 سپورتشى اكەلۋىمىزدى ءوز باسىم ءجون ساناپ وتىرعان جوقپىن. مەن بىلەتىن قازاقستاندا ازيا وليمپياداسىندا جۇلدەلى ورىندارعا تالاساتىن مۇنشاما اتلەت جوق!

راس، تالانتتى جاستاردى وسىندا سىنعا سالىپ، ماڭداي تەرلەرىن تامشىلاتا بەرۋ كەرەك. بىراق سونى ەسەپكە العاننىڭ وزىندە دەلەگاتسيامىزدا 300-324 سپورتشى بولسا جاراسار ەدى. بۇل اتلەتتەردىڭ وسى ويىندارعا ليتسەنزيا-جولداما ۇتقاندارى دا ءسوزسىز. بىراق باپكەرلەر قوسىنى، عىلىمي-ساراپتاما توبى وسىنداي مايدان قىل سۋىراتىن ماسەلەلەرمەن اينالىسۋعا ءتيىس. ۇلى جارىستا 1-10 ورىنداردان ءۇمىتى جوق سپورتشىلارعا العىس ايتىپ، ۇيدە قالدىرعان ءجون بولار ما ەدى. بۇل، بىرىنشىدەن، ويىندار قورىتىندىسى شىققاندا، 30-50 ورىنداردا ۇيالاپ قالعان قىز-جىگىتتەر ءۇشىن ۇيالىپ، جەرگە قاراماۋ ءۇشىن كەرەك! ەكىنشىدەن، بۇل ويىندارعا قاتىسقان ءار ادام بىرنەشە ميلليون تەڭگە اقشا شاشادى! ەلىمىزدەگى بۇگىنگى قيىنعا تاياۋ ەكونوميكالىق جاعدايدا ءبىر تيىننىڭ ءوزى جىرتىققا جاماۋ. ۇشىنشىدەن، ازيا ويىندارىنا قازاقستان سپورتىنىڭ بۇگىنى مەن بولاشاعىن زەرتتەۋ ءۇشىن ارنايى زەرتتەۋ-ەكسپەرت توبى كەلىپ جاتسا (ونداي توپتىڭ بولۋى ۋاقىت تالابى!)، ولارعا جارتى مىڭنان اسا سپورتشىلاردىڭ اياق الىسىن باقىلاپ، عىلىمي قورىتىندى شىعارۋ اسا قيىن بولادى. مۇنشاما سپورتشىنى جارىسقا قايراپ سالۋ مەن ارقايسىنا ءسوز كومەگى، رۋح كومەگى، باپكەرلىك جانە مەديتسينالىق كومەك كورسەتۋ دە وڭاي ەمەس. وسى جەردە بىزدەن حالىق سانى كوپ بولسا دا حانچجوۋعا نەبارى 350 سپورتشى الىپ كەلگەن كورشىلەس وزبەكستانعا قۇرمەتپەن قاراعاندايسىڭ. ەسەسىنە، ولار ويىندارعا 35 جۋرناليست جىبەرىپتى. ۇلگى الار ءۇردىس. ءبىزدىڭ دەلەگاتسياعا دا، بىزدەر قالامگەرلەرگە دە قامقورشى بوپ وتىرعان Samruk Kazyna ءال-اۋقات قورى، تۋريزم جانە سپورت مينيسترلىگى، ۇلتتىق ولمپيادالىق كوميتەتى، تۋريزم جانە سپورت يندۋسترياسى قورىنا العىس بىلدىرە وتىرىپ ايتارىمىز: وسى ماسەلەدە ازيا جانە وليمپيادالىق ويىندار كەزىندە ۇنەمى كۇن تارتىبىندە تۇرۋعا ءتيىس! وركەنيەتتى ەلدەر الدەقاشان ءوز سپورت جۋرناليستەرىن بيلىك قىزمەتشىسى ەمەس، قالىڭ ەلگە سپورتتى ناسيحاتتايتىن، ازيا، وليمپيادا ويىندارىنىڭ ەشتەمەمەن سالىستىرۋعا كەلمەيتىن قۇدىرەتىن كوپكە جاياتىن بىردەن-ءبىر قۇرال ساناپ، ويىندارعا ءبىر سپورتشى جىبەرسە دە وعان 10 جۋرناليست قوسىپ اتتاندىرۋدى جولعا الدەقاشان قويىپ العان! بىزگە دە سول ۇردىستەرگە يكەمدەلۋ ارتىق ەتپەيدى.

… سونىمەن قىتايدىڭ حانچجوۋ قالاسىندا XIX ازيا ويىندارى سالتاناتتى تۇردە اشىلدى! جارىستىڭ اشىلۋى عاجاپ بولدى. ءار جارىستى ۇلتتىق برەندى دارەجەسىنە جەتكىزىپ وتكىزەتىن ۇلى قىتاي بۇل جولى دا الەمدى تاڭ قالدىردى: «لوتوس» دەپ اتالاتىن كورۋگە كوز كەرەك ستاديوندا وتكەن ەكى جارىم ساعاتتىق سپەكتاكلدى كوزىمىز جاسقا تولىپ، كىرپىك قاقپاي قارادىق. سوناۋ 2008 جىلى ءوز استاناسى بەيجىندەگى «قۇس ۇياسى» ستاديونىندا وتكەن جازعى وليمپيادانىڭ اشىلۋى دا كوز الدىمىزدا. مىنا ازيا ويىندارىنىڭ اشىلۋى تۋرا سونىڭ زاڭدى جالعاسى بولدى! ويپىرماي، قىتاي-اي، قىمس ەتسە الەمدى تاڭداي قاقتىرىپ قوياتىن نە قۇدىرەتىڭ بار وسى؟!! جول بولسىن،16 كۇندىك جولعا شىققان جازعى ازيادا! ءوزىڭ ءۇشىن دە، ءبىز، قازاقستان ءۇشىن دە جارىس جولدارىڭ ساتتىلىكە تولى بولىپ، 524 سپورتشىمىز ءبىر-بىردەن ارقالاپ كەلگەن قورجىنىمىزدىڭ دەنى بوس قايتپاسىن! حانچجوۋعا ەڭسەمىزدى كوتەرىپ جەتتىك،امسە،سول ەڭسەمىز اۋىلىمىزعا قايتاردا دا بيىك بولعاي !!!