Azıadada oryndardan úmiti joq sportshylardy úıde qaldyrǵan jón bolar edi – Nesip Júnisbaıuly

Redakııaǵa sport jýrnalısi, jazýshy, sport qaıratkeri Nesip Júnisbaıulynyń Qytaıdyń Hanchjoý qalasynan XIX Azııa oıyndarynyń ashylý saltanaty, osy jarysqa qatysyp jatqan sportshylarymyz týraly materıaly kelip tústi. Materıal avtory Azıadadaǵy jarystar, oǵan qatysatyn otandastarymyzdyń múmkindigi týraly aıta kelip, qurlyqtyń Olımpıadasy sanalatyn Oıyndardy nasıhattaýda óz usynystaryn aıtady. Endi sony oqyrmannyń nazaryna usynýdy jón kórip otyrmyz.

Túnde ǵana tórtkúl álemdi tań qaldyryp,saltanatty túrde ashylǵan XIX jazǵy Azııa oıyndary óz sóresinen shyǵyp, alǵashqy qadamyn jasap ta úlgerdi.

Búgin dúldúl jarystyń shymyldyǵyn ashqan bessaıysshylar men dzıýdoshylar arasynda fınalǵa baryp bir-aq tirelgen qazaqstandyq sportshylar bar. Olar jaıly jarq etken jeńisterinen keıin áńgimeleımiz.

Qytaıdyń Hanchjoýyndaǵy Azııa oıyndary keremetteı kórinisterge toly bop ashyldy. Áýelde Qytaı eliniń eńbekqor halqynyń mańdaı terin beıneleıtin kórinisterge toly stadıon-sahna uzamaı álemdik órkenıettiń ǵajap órkendeýin pash etip, adam kózi kórse de senbes kórinistermen bas ıgizgenin nesine jasyramyz. Jaryq qýatymen ǵalamat sahnalyq kórinisterge kýá etken uıymdastyrýshylar bıik aspanǵa Qytaı týy men Azııa Olımpıadalyq Keńesiniń jalaýyn qadaǵansha stadıonǵa lyq tolǵan 80 000 jankúıer demderin bir-aq ret alǵan shyǵar. Ár eldiń sport delegaııalarynyń sherýi de bul joly ózgeshe boldy. Keremetteı tartymdy,keremetteı súıkimdi boldy!

Biz óz elimizdiń memlekettik týyn janarymyzben aımalap otyryp shyǵaryp saldyq. Sherýge shyqqan sportshylarymyzdyń qarasy búkil qatysýshylar arasynda 2-5 oryndarda bolǵany daýsyz. Bul ázirge san jaǵynan qol jetken jeńis qana. Sapa jaǵynan alatyn oryn alda — núkteniń ákesi qazannyń 8- kúni jarystyń jabylý saltanaty kúni jarııalanady. Sol kúni «balapandardy» sanaımyz. «E,bárin kórip alǵan soń bári bilgish!», dep aıtpaý úshin búgin aıtarym mynaý: Azııa oıyndaryna 524 sportshy ákelýimizdi óz basym jón sanap otyrǵan joqpyn. Men biletin Qazaqstanda Azııa Olımpıadasynda júldeli oryndarǵa talasatyn munshama atlet joq!

Ras, talantty jastardy osynda synǵa salyp, mańdaı terlerin tamshylata berý kerek. Biraq sony esepke alǵannyń ózinde delegaııamyzda 300-324 sportshy bolsa jarasar edi. Bul atletterdiń osy oıyndarǵa lıenzııa-joldama utqandary da sózsiz. Biraq bapkerler qosyny, ǵylymı-saraptama toby osyndaı maıdan qyl sýyratyn máselelermen aınalysýǵa tıis. Uly jarysta 1-10 oryndardan úmiti joq sportshylarǵa alǵys aıtyp, úıde qaldyrǵan jón bolar ma edi. Bul, birinshiden, Oıyndar qorytyndysy shyqqanda, 30-50 oryndarda uıalap qalǵan qyz-jigitter úshin uıalyp, jerge qaramaý úshin kerek! Ekinshiden, bul Oıyndarǵa qatysqan ár adam birneshe mıllıon teńge aqsha shashady! Elimizdegi búgingi qıynǵa taıaý ekonomıkalyq jaǵdaıda bir tıynnyń ózi jyrtyqqa jamaý. Úshinshiden, Azııa oıyndaryna Qazaqstan sportynyń búgini men bolashaǵyn zertteý úshin arnaıy zertteý-ekspert toby kelip jatsa (Ondaı toptyń bolýy ýaqyt talaby!), olarǵa jarty myńnan asa sportshylardyń aıaq alysyn baqylap, ǵylymı qorytyndy shyǵarý asa qıyn bolady. Munshama sportshyny jarysqa qaırap salý men árqaısyna sóz kómegi, rýh kómegi, bapkerlik jáne medıınalyq kómek kórsetý de ońaı emes. Osy jerde bizden halyq sany kóp bolsa da Hanchjoýǵa nebári 350 sportshy alyp kelgen kórshiles О́zbekstanǵa qurmetpen qaraǵandaısyń. Esesine, olar Oıyndarǵa 35 jýrnalıst jiberipti. Úlgi alar úrdis. Bizdiń delegaııaǵa da, bizder qalamgerlerge de qamqorshy bop otyrǵan Samruk Kazyna ál-aýqat qory, Týrızm jáne sport mınıstrligi, Ulttyq Olmpıadalyq komıteti, Týrızm jáne sport ındýstrııasy qoryna alǵys bildire otyryp aıtarymyz: osy máselede Azııa jáne Olımpıadalyq oıyndar kezinde únemi kún tártibinde turýǵa tıis! О́rkenıetti elder áldeqashan óz sport jýrnalısterin bılik qyzmetshisi emes, qalyń elge sportty nasıhattaıtyn, Azııa, Olımpıada oıyndarynyń eshtememen salystyrýǵa kelmeıtin qudyretin kópke jaıatyn birden-bir qural sanap, Oıyndarǵa bir sportshy jiberse de oǵan 10 jýrnalıst qosyp attandyrýdy jolǵa áldeqashan qoıyp alǵan! Bizge de sol úrdisterge ıkemdelý artyq etpeıdi.

… Sonymen Qytaıdyń Hanchjoý qalasynda XIX Azııa oıyndary saltanatty túrde ashyldy! Jarystyń ashylýy ǵajap boldy. Ár jarysty ulttyq brendi dárejesine jetkizip ótkizetin uly Qytaı bul joly da álemdi tań qaldyrdy: «Lotos» dep atalatyn kórýge kóz kerek stadıonda ótken eki jarym saǵattyq spektakldi kózimiz jasqa tolyp, kirpik qaqpaı qaradyq. Sonaý 2008 jyly óz astanasy Beıjindegi «Qus uıasy» stadıonynda ótken jazǵy Olımpıadanyń ashylýy da kóz aldymyzda. Myna Azııa oıyndarynyń ashylýy týra sonyń zańdy jalǵasy boldy! Oıpyrmaı, Qytaı-aı, qyms etse álemdi tańdaı qaqtyryp qoıatyn ne qudiretiń bar osy?!! Jol bolsyn,16 kúndik jolǵa shyqqan jazǵy Azıada! О́ziń úshin de, biz, Qazaqstan úshin de jarys joldaryń sáttilike toly bolyp, 524 sportshymyz bir-birden arqalap kelgen qorjynymyzdyń deni bos qaıtpasyn! Hanchjoýǵa eńsemizdi kóterip jettik,ámse,sol eńsemiz aýylymyzǵa qaıtarda da bıik bolǵaı !!!