ازيادادا سپورشىلاردى ارقادان دەمەپ جۇرەيىك

قىتايدىڭ حانچجوۋىندا باستالعان XIX Aزيا ويىندارى عاجاپ كورىنىستەرمەن كوز الدىمىزدا قالدى. ءتىپتى ساتىندە بۇل سالتاناتتى اشىلۋدى سوناۋ 2008 جىلى وسى ەلدىڭ استاناسى بەيجىندە بولعان وليمپيادالىق ويىنداردىڭ اشىلۋ سالتاناتىمەن سالىستىرساق تا بولادى. دالىرەك ايتساق، سونىڭ جالعاسى دەۋگە تۇراتىنداي.

بۇگىندە ىلگەرى كەتكەن دۇنيەدەگى جارىقتى پايدالانۋ ادىستەرىنىڭ شىڭىنا جەتكەن قىتايلىقتار ستاديون-ساحنادا ەكى ساعاتتان اساتىن تەڭدەسسىز سپەكتاكل جاسادى. مۇنداي كەشەندى جارىس شارتىنا ساي شەرۋگە شىققان سپورتشىلار اراسىندا قازاقستان توبى سانى جاعىنان شامامەن 2-5 ورىنداردا بولعان شىعار. بۇل ازىرگە سپورتشىلار قاراسىنا بايلانىستى ناتيجەمىز. ەندى الدا سونى ساپاعا اينالدىرىپ،سپورتتىق ناتيجە جاعىنان سول ورىنداردا بولۋ مىندەتى تۇر!

…جاسىرمايمىن، مۇنداي جارىستىڭ مىڭىن كورگەن تاجىريبەلى جۋرناليست رەتىندە ەلىمىز جارىسقا جىبەرگەن 524 سپورتشىنى تىم كوپ دەپ ويلايمىن. ارينە، ولاردىڭ ءبارى جارىسقا جولداما-ليتسەنزيا جەڭىپ العانى بەلگىلى. ايتسە دە، جولداما جەڭىپ الۋ باسقا دا ەل اتىنان ولاردى كەشەندى جارىسقا اتتاندىرۋ باسقا. وركەنيەتتى ەلدەردە جولداما العان سپورتشىلاردى تۇگەلىمەن سىپىرا وليمپياداعا اتتاندىرا سالۋعا بولمايدى. ەلدە عىلىمي-زەرتتەۋ ساراپشىلار توبى قۇرىلىپ، سپورتشىلاردىڭ بۇل جارىستاعى مۇمكىندىگى ساراپقا سالىنىپ، قۇرىعاندا 1-20 ورىندارعا ىلىنەدى-اۋ دەگەن سپورتشىلاردى عانا توپقا قوسۋ ابزال. ارينە، جاس، تالانتتى جولداما جەڭىپ العان سپورتشىلاردى دا ويىندارعا تاجىريبە جيناقتاۋ ماقساتىندا اپارۋ كەرەك. ونى دا ساراپشىلار توبى شەشكەنى ءجون.

…سول 524 سپورتشىنىڭ ءبارى حانچجوۋعا قورجىن ارقالاپ اتتاندى. ەرتەڭ سونىڭ تۇگەلگە جۋىعى بوس قايتسا، كوبىسى 20-40 ورىندار الىپ جاتسا، ەلدىگىمىزگە سىن ەمەس پە؟! ول كۇندەرى «ءبىز ازيا ويىندارىنا 524 سپورتشى اتتاندىردىق» دەگەن ماقتان دالادا قالادى. ونىڭ ۇستىنە، ءار ادام مۇنداي ساپاردا ميلليونداعان تەڭگە قارجى جۇمسايتىنى جاسىرىن ەمەس. مەملەكەت قارجىسىن بوسقا شاشپاۋ ماسەلەسىن دە ەشكىم جاۋىپ قويۋعا ءتيىس ەمەس! ءبىز ايتقان ويعا دالەل كوپ. وزىمىزبەن كورشى، حالقىنىڭ سانى بىزدەن ەداۋىر كوپ وزبەكستان ەلى بۇل ويىندارعا 350 عانا سپورتشى جىبەرىپتى. ەسەسىنە ولار ازيا ويىندارىن كەڭ ناسيحاتتاۋعا 35 جۋرناليست اتتاندىرعان. بۇل جاعىنان دا ءبىز ۇتىلىپ تۇرمىز. حانچجوۋعا كەلگەن قازاقستاندىق قالام، ميكروفون شەبەرلەرى جيىرماعا جەتپەيدى. بۇل باسەكە ەمەس، بىراق بولاشاق تالانتتى جاستاردى سپورتقا تارتۋ ءۇشىن بالالار سپورت مەكتەپتەرى قانداي قاجەت بولسا، سپورتتى ناسيحاتتاۋ تۋرا سونداي كەرەكتى!

…بۇل ويلاردىڭ ءبارى ەرتەڭ اياقتالعاندا بىلگىشسىنىپ، نەگە بۇلاي، نەگە ولاي دەمەۋ ءۇشىن ەرتە ايتىلىپ جاتىر. نيەتىمىز دە اق. ەل نامىسى مەن ۇلت بولاشاعى ويلاندىرعان سوڭ كەلگەن ۇسىنىستار عوي. ەستيتىن قۇلاق تابىلاتىنىنا دەگەن ۇمىتپەن ايتىپ جاتىرمىز. …حانچجوۋداعى XIX جازعى ازيا ويىندارى تاماشا اشىلدى. ەندى وسىنداي تاماشا ناتيجەلەر ەل سپورتشىلارى قاتىسقان جارىستاردا دا جاڭبىرشا جاۋىپ جاتسا عوي. سول كەزدە ءبىزدىڭ داۋىس تا جارقىن-جارقىن شىعادى. سىزدەر دە ەلەڭدەۋدەن جالىقپايسىزدار. ەشكىمگە قارسىلاسىن جەڭىپ بەرمەسە دە اقجولتاي جاقسىلىق اللادان عوي. جاراتۋشىمىز وسى ازيا ويىندارى بارىسىندا قازاقستان اتلەتتەرىن ارقادان دەمەپ ءجۇرسىن دەپ تىلەيىك. تىلەكتى بەرە كور، قۇدايىم!!!

نەسىپ جۇنىسباي ۇلى،

سپورت ءجۋرناليسى، جازۋشى، سپورت قايراتكەرى

فوتو: تۋريزم جانە سپورت مينيسترلىگى

حانچجوۋ