Azıadada sporshylardy arqadan demep júreıik

Qytaıdyń Hanchjoýynda bastalǵan XIX Azııa oıyndary ǵajap kórinistermen kóz aldymyzda qaldy. Tipti sátinde bul saltanatty ashylýdy sonaý 2008 jyly osy eldiń astanasy Beıjinde bolǵan Olımpıadalyq oıyndardyń ashylý saltanatymen salystyrsaq ta bolady. Dálirek aıtsaq, sonyń jalǵasy deýge turatyndaı.

Búginde ilgeri ketken dúnıedegi jaryqty paıdalaný ádisteriniń shyńyna jetken qytaılyqtar stadıon-sahnada eki saǵattan asatyn teńdessiz spektakl jasady. Mundaı keshendi jarys shartyna saı sherýge shyqqan sportshylar arasynda Qazaqstan toby sany jaǵynan shamamen 2-5 oryndarda bolǵan shyǵar. Bul ázirge sportshylar qarasyna baılanysty nátıjemiz. Endi alda sony sapaǵa aınaldyryp,sporttyq nátıje jaǵynan sol oryndarda bolý mindeti tur!

…Jasyrmaımyn, mundaı jarystyń myńyn kórgen tájirıbeli jýrnalıst retinde elimiz jarysqa jibergen 524 sportshyny tym kóp dep oılaımyn. Árıne, olardyń bári jarysqa joldama-lıenzııa jeńip alǵany belgili. Áıtse de, joldama jeńip alý basqa da el atynan olardy keshendi jarysqa attandyrý basqa. О́rkenıetti elderde joldama alǵan sportshylardy túgelimen sypyra Olımpıadaǵa attandyra salýǵa bolmaıdy. Elde ǵylymı-zertteý sarapshylar toby qurylyp, sportshylardyń bul jarystaǵy múmkindigi sarapqa salynyp, quryǵanda 1-20 oryndarǵa ilinedi-aý degen sportshylardy ǵana topqa qosý abzal. Árıne, jas, talantty joldama jeńip alǵan sportshylardy da Oıyndarǵa tájirıbe jınaqtaý maqsatynda aparý kerek. Ony da sarapshylar toby sheshkeni jón.

…Sol 524 sportshynyń bári Hanchjoýǵa qorjyn arqalap attandy. Erteń sonyń túgelge jýyǵy bos qaıtsa, kóbisi 20-40 oryndar alyp jatsa, eldigimizge syn emes pe?! Ol kúnderi «Biz Azııa oıyndaryna 524 sportshy attandyrdyq» degen maqtan dalada qalady. Onyń ústine, ár adam mundaı saparda mıllıondaǵan teńge qarjy jumsaıtyny jasyryn emes. Memleket qarjysyn bosqa shashpaý máselesin de eshkim jaýyp qoıýǵa tıis emes! Biz aıtqan oıǵa dálel kóp. О́zimizben kórshi, halqynyń sany bizden edáýir kóp О́zbekstan eli bul Oıyndarǵa 350 ǵana sportshy jiberipti. Esesine olar Azııa oıyndaryn keń nasıhattaýǵa 35 jýrnalıst attandyrǵan. Bul jaǵynan da biz utylyp turmyz. Hanchjoýǵa kelgen qazaqstandyq qalam, mıkrofon sheberleri jıyrmaǵa jetpeıdi. Bul báseke emes, biraq bolashaq talantty jastardy sportqa tartý úshin balalar sport mektepteri qandaı qajet bolsa, sportty nasıhattaý týra sondaı kerekti!

…Bul oılardyń bári erteń aıaqtalǵanda bilgishsinip, nege bulaı, nege olaı demeý úshin erte aıtylyp jatyr. Nıetimiz de aq. El namysy men ult bolashaǵy oılandyrǵan soń kelgen usynystar ǵoı. Estıtin qulaq tabylatynyna degen úmitpen aıtyp jatyrmyz. …Hanchjoýdaǵy XIX jazǵy Azııa oıyndary tamasha ashyldy. Endi osyndaı tamasha nátıjeler el sportshylary qatysqan jarystarda da jańbyrsha jaýyp jatsa ǵoı. Sol kezde bizdiń daýys ta jarqyn-jarqyn shyǵady. Sizder de eleńdeýden jalyqpaısyzdar. Eshkimge qarsylasyn jeńip bermese de aqjoltaı jaqsylyq Alladan ǵoı. Jaratýshymyz osy Azııa oıyndary barysynda Qazaqstan atletterin arqadan demep júrsin dep tileıik. Tilekti bere kór, Qudaıym!!!

Nesip JÚNISBAIULY,

sport jýrnalısi, jazýshy, sport qaıratkeri

FOTO: Týrızm jáne sport mınıstrligi

HANChJOÝ