Tańdaı bilý de óner!

Qytaıdyń Hanchjoýyndaǵy XIX Azııa oıyndary aıaqtalýǵa taıaǵan saıyn basshy da, qosshy da bary men joǵyn túgendep, tabysy men kemshiligin saraptap jatýy zańdy. Áýelde Oıyndarǵa attanǵanda osymyz durys dep qabyldaǵan sheshimderiniń Oıyndar barysynda qabyrǵasy sógilip, tumsyǵymen jer súzgen sheshimderine kináli izdep,jer tepkilep jatqandary da joq emes.  

Bul — úlken sharýanyń bárine tán qorytyndy. Biz de Oıyndar tolyq aıaqtalmasa da bolǵan oqıǵalardan súzip alǵan oılarymyzdy ortaǵa salǵandy jón kórdik.  Bul qazaq aıtqandaı «Pisken astyń kúıigi jaman!» degenimiz emes, kóp bolyp,ortaq oılanyp, erterek qam jasasaq degen qamqor oıdan týǵan oılasý ǵana.  Buıyrtsa, bıylǵy jyldyń kúzi de óz kúshine mindi,alda qys, odan soń kóktemdi tamashalap júrgende jadyrap jaz da shyǵady.  Jaz shyqty degenshe Parıjdegi jazǵy Olımpıadalyq oıyndar esik qaqty deı berińiz: ol Oıyndarǵa daıyndyq kelesi jyldyń basynan emes, osy jyl sońynan bastalýy kerek!

Jalpy Azııa oıyndarynyń qorytyndysyn keıinirek shyǵararmyz, dál búgin kózge uryp turǵan másele — osy Oıyndardaǵy eń kóp medaldar jıyntyǵy jarııalanǵan SÝǴA JÚZÝ men JEŃIL ATLETIKAǴA tereń mán bere qarap, sol sport túrlerin aldyńǵy orynǵa qoımaǵanymyzda. Iaǵnı, sporttyń bir nemese birer túrine keńirek múmkindik berip, sodan úmit kútý máselesin óz deńgeıinde iske asyrmaǵanymyz aıqyn baıqalady. Mysaly, júzý sportynda shamamen 40-qa taıaý medaldar jıyntyǵy sarapqa salynady eken.  Biz Hanchjoýǵa nebári alty júzgish qana apardyq.  Solardyń ishinen tek Ádilbek Mýsın Oıyndardyń qola júldegeri atandy.  Boldy!  Oıyndardyń júzgishter básekesindegi tuǵyrdyń ár satysyna bárin qyryp-joıyp kele jatqan Qytaıdyń qyz-jigit júzgishterinen basqa, árıne, sırek bolsa da Japonııa men Ońtústik Koreıanyń júzgishteri shyqty, olarǵa qosa, Gonkongtyń, Sıngapýrdyń, Taıpeıdiń sportshylarynyń kóterilgenin kórgende barmaǵymyzdy tistedik.  Aldynǵy úsh el ejelden sportta alda kele jatyr,al sońǵy úsh elge biz qashan aldymyzdan oryn berip edik? Tipti, sporttyń barlyq túrin alǵanda da olar únemi bizdiń arqamyzdy kórip qana júretin elder bolatyn.  Ras, búginde úlken sport bul elderde de keń qulash jaıyp keledi.

Olar, olarǵa qosa, Azııanyń iri memleketteri — Iran, Úndistan, Indonezııa, Taılandtyń sporttyń kóptegen túrinen bizden ozbasa qalyspaıtyn dárejege jetip alypty.  Biraq osy eldiń kóbisi teńiz ben muhıttyń jaǵalaýyna jaqyn ornalasqan desek te biz júzýden OLIMPIADA ChEMPIONYN shyǵarǵan elmiz ǵoı!  Dmıtrıı Balandındi biz ózgeden attaı qalap, satyp alǵan joqpyz, ózimizde tárbıelep shyǵardyq emes pe?  Olaı bolsa, «Altyn shyqqan jerdi belden qazatyny» qaıda?!  Joǵaryda aıttyq, XIX Azııa oıyndaryna alty ǵana júzgish ákelgenimiz — osy sharýany shalqasynan qulatyp alǵanymyzǵa kýá bola alady.  «Olardan basqa eshkim joq,kim-kóringendi apara beremiz be?» dep daý shyǵarýy múmkin osy salanyń bir mamany.  Árıne, olaı emes!

Balandın chempıon bolǵan Rıodan beri arada segiz jyldaı ýaqyt ótti.  Osy jyldary juldyz sanamaı,jas júzgishterdiń talantty shoǵyryn taýyp,solardy tárbıeleý kerek edi degenge saıady bar másele. Júzý bilmese de Hanchjoýǵa otyz-qyryq adamdy alyp kelý kerek edi dep otyrǵan eshkim joq.  Solardy taýyp,tárbıelep baryp,osyndaı Olımpıada aldyndaǵy iri de jaýapty jarysqa qosý kerek edi degendi aıtyp otyrmyz.  Endi, mine, Parıj Olımpıadasy da ıek astynda tur. Ol Olımpıadaǵa joǵarydaǵy altaýmen ǵana baramyz ba?  Olardyń bári lıenzııa-joldama jeńip alsa ıgi.  Bolmasa she?  Álde, munan sál burynǵy Olımpıadada chempıon shyǵaryp,myna Olımpıadada aýyzdy qý shóppen súrtip otyramyz ba?!  Munymyzdy eshkim túsinbeıdi ǵoı!

Nesip JÚNISBAIULY, — Hýanchjoýdan

FOTO: Týrızm jáne sport mınıstrligi