SportPress.kz قازاقستان سپورت جاڭالىقتارى
حالىقارالىق بوكس قاۋىمداستىعىنىڭ (IBA) پرەزيدەنتى ۋمار كرەملەۆ استانادا بوكستان جاستار جانە جاسوسپىرىمدەر اراسىندا باستالعان ازيا چەمپيوناتى كەزىندە قىتايدىڭ حانچجوۋ قالاسىندا وتكەن ازيا ويىندارىنداعى تورەشىلەردىڭ جۇمىسىن سىنعا الدى. ول Atameken Business ارناسىنا بەرگەن سۇحباتىندا ازياداداعى تورەشىلىكتىڭ وتە تومەن دەڭگەيدە بولعانىن ايتتى.
شىنىن ايتقاندا تورەشىلەردىڭ جۇمىسىنا مەنىڭ دە كوڭىلىم تولمادى. مەن سول ءۇشىن حالىقارالىق وليمپيادا كوميتەتىنىڭ (حوك) پرەزيدەنتى توماس باحقا نارازىلىعىمدى ءبىلدىرىپ، ساۋال جولدادىم. ماسەلە حالىقارالىق بوكس فەدەراتسياسىنىڭ (IBF) تورەشىلىگىندە ەمەس. ماسەلە تورەشىلەردىڭ جۇمىسىنا كولدەنەڭ كوك اتتىلاردىڭ ارالاسىپ كەتەتىندىگىندە. مەنى وسى ماسەلە قاتتى الاڭداتتى. سوندىقتان حالىقارالىق وليمپيادا كوميتەتى ءوزىنىڭ جۇمىسىن رەتتەپ الۋ كەرەك. حوك شارشى الاڭدا كىمنىڭ جەڭەتىنىن شەشپەۋ كەرەك. رينگتە شىن مىقتى عانا جەڭۋ كەرەك، — دەدى ول.
ونىڭ ايتۋىنشا، مۇنداي ادىلەتسىزدىك وليمپيادا مەن وليمپيالىق ويىندارعا ىرىكتەۋ جارىستارىندا ءالى دە بولىپ جاتىر. ال الەم چەمپيوناتىندا ادىلەتسىزدىك جوق.
ءبىز تورەشىلىك ماسەلەسىن شاعىم ءتۇسىرۋ ارقىلى شەشىپ تاستادىق. قازىر الەم چەمپيوناتىندا ادىلەتسىزدىك اتىمەن جوق. بوكسشىلار شاعىم تۇسىرە بەرۋ كەرەك. ادىلەتسىز شەشىم شىقسا، بىردەن شاعىم جازۋ كەرەك. سوندا عانا ءبىز جەكپە-جەكتىڭ ءادىل باعاسىن الامىز، — دەدى ۋمار كرەملەۆ.
ەسكە سالساق، بيىلعى ازيادادا تورەشىلەردىڭ بارماق قىستى، كوز قىستى ارەكەتىنەن قىتايعا مەدال ءۇشىن بارعان تالاي بوكسشى جارىس جولىنان شىعىپ، جۇلدە الا الماي قالعان ەدى. سونىڭ ىشىندە اسلانبەك شىمبەرگەنوۆ تە بار. وسىعان بايلانىستى قازاقستان بوكس فەدەراتسياسى اسلانبەك شىمبەرگەنوۆتىڭ جارتىلاي فينالداعى جەكپە-جەگىنە قاتىستى حالىقارالىق وليمپيادا كوميتەتىنە نارازىلىق بىلدىرگەن بولاتىن.
بۇل جەكپە-جەكتە اسلانبەك شىمبەرگەنوۆ تورەشىلەردىڭ كەسىرىنەن جاپون سەۆون وكازاۆادان جەڭىلىپ، ازيا ويىندارىندا قولا مەدال الدى.
داستان كەنجالين،
استانا
فوتو: Facebook/كەڭەس راقىشەۆ/sportrbc.ru
