قازاقستان سپورتشىلارى تۇڭعىش الەم چەمپيونى اتاندى

وتكەن اپتادا ەلىمىزدىڭ ءبىر توپ سپورتشىسى بىرنەشە ەلدە حالىقارالىق جارىسقا قاتىسىپ، قۇرمەت تۇعىرىنىڭ ەڭ بيىك ساتىسىنا كوتەرىلدى.

ۆەنگريانىڭ استاناسى — بۋداپەشتتە WKF كاراتەدەن مارەسىنە جەتكەن الەم چەمپيوناتىندا ءمولدىر جاڭبىرباي (50 كگ) توپ جارىپ، سپورتتىڭ وسى تۇرىنەن ەرەسەكتەر اراسىندا الەم چەمپيونى اتانعان تۇڭعىش قازاق سپورتشىسى اتاندى. سونىمەن قاتار قايسار الپىسباي (60 كگ) الەم بىرىنشىلىگىنىڭ – كۇمىس، ديدار ءامىرالى قولا جۇلدەسىنە يە بولدى.

سۇلتان اسەت ۇلى البانيانىڭ استاناسى -تيرانادا گرەك-ريم كۇرەسىننە ءوتىپ جاتقان 23 جاسقا دەيىنگى بالۋاندار اراسىندا الەم چەمپيونى بولدى. سۇلتان – 23 جاسقا دەيىنگى ساناتتا əلەم چەمپيوناتى اتانعان تۇڭعىش قازاق بالۋانى. ايەلدەر كۇرەسىندە التىن شاعاەۆا (53 كگ) مەن يرينا كۋزنەتسوۆا (62 كگ) قولا جۇلدەگە يە بولدى.

كانادانىڭ مونرەال قالاسىندا جالاۋى جەلبىرەگەن شورت-ترەكتەن الەم كۋبوگىنىڭ العاشقى كەزەڭىندە قازاقستان قۇراماسىنىڭ  سپورتشىلارى 5 000 مەترگە ەستافەتا جارىسىندا قولا جۇلدەگەر اتاندى. ەل قۇراماسىنان جارىس جولىنا ءادىل عالياحمەتوۆ، مەرسايد جاقسىباەۆ، ەركەبۇلان شامۇحانوۆ پەن دەنيس نيكيشا شىقتى.

ساۋد ارابياسىنىڭ ار-رياد قالاسىندا وتكەن دۇنيەجۇزىلىك جاۋىنگەرلىك ونەر ويىندارىندا قازاقستان قۇراماسى ارمرەستلينگتەن 7 التىن، 3 كۇمىس جانە 8 قولا مەدال ولجالاپ، جالپىكوماندالىق ەسەپتە توپ جاردى.

كاميلا بەرلىقاش ءابۋ-دابيدەگى Grand Slam جارىسىندا كۇمىس جۇلدەگە يە بولدى. ول فينالدا پورتۋگاليالىق رۋشەل نۋنەسپەن كۇرەستى.

وڭتۇستىك كورەيانىڭ چانگۆون قالاسىندا وتكەن XV ازيا چەمپيوناتىندا مەرگەن ديانا سابەكوۆا التىن مەدال الدى. سونداي-اق سكيت باعدارلاماسىندا ەلىمىزدىڭ ايەلدەر قۇراماسى – كۇمىس، ەرلەر قۇراماسى قولا جۇلدەنى جەڭىپ الدى.

فوتو: Olympic.kz