ماڭعىستاۋ وبلىسىنىڭ اكىمىنە اشىق حات

ماڭعىستاۋ وبلىسىنىڭ اكىمى ن.نوعاەۆقا

قۇرمەتتى نۇرلان اسقار ۇلى!

ماڭعىستاۋ وبلىسى اقتاۋ قالاسىنا سپورتتىق مەكتەپ-ينتەرنات-كوللەدجى قاشان سالىنادى؟ ماڭعىستاۋلىق جاتتىقتىرۋشىلار مەن سپورتشىلاردىڭ كۇتكەنىنە 31 جىل بولدى. تاعى قانشا جىل كۇتەمىز؟

ماڭعىستاۋدىڭ ۇل-قىزدارى وليمپيادالىق رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندە قاشان وقيدى؟

وبلىس پەن قالا جانە اۋدان اكىمدەرى: «الەم جانە ازيا چەمپيونى اتانعان سپورتشىعا ءبىر جاپىراق العىس حاتپەن شىعارىپ سالادى». ودان قالسا، ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسىنىڭ قىزمەتكەرلەرى ءبىراز جىلدان بەرى «جاس قانات» سپورت كەشەنىنىڭ ەكىنشى قاباتىندا جۇمىس ىستەيدى. استىڭعى قاباتىندا بالالارعا ارنالعان فۋتبول، تاەكۆوندو، كۇرەس، بوكس ۇيىرمەسى جانە «كاسپي» فۋتبول كلۋبى بار. ايماق باسشىسى نۇرلان نوعاەۆ وبلىستىق سپورت باسقارماسىنا ەكى قاباتتى كەڭسەنى قاشان سالىپ بەرەدى؟

ءۇش اپتا بۇرىن مەملەكەت باسشىسى قاسىم-جومارت توقاەۆ ازيا ويىندارىنىڭ جۇلدەگەرلەرىن قابىلداپ، سپورتشىلاردى قۇتتىقتادى. پرەزيدەنت سپورتشىلاردىڭ رەزەرۆىن دايارلاۋ ماسەلەسىنە ارنايى توقتالىپ، ۇكىمەت پەن اكىمدەرگە دارىندى ءارى بولاشاعىنان زور ءۇمىت كۇتتىرەتىن اتلەتتەرگە قولايلى جاعداي جاساۋعا ءتيىس ەكەنىن ايتتى.

قىتايدا وتكەن ءحىح ازيا ويىندارىندا 527 اتلەت 30 سپورت تۇرىنەن ەل نامىسىن قورعاپ، 10 التىن، 22 كۇمىس، 48 قولا مەدال يەلەندى. قۇرىلىق بىرىنشىلىگىندە ماڭعىستاۋ وبلىسىنان 11 سپورتشى 8 تۇرىنەن قاتىسىپ، ءبيبىسارا اساۋباەۆا عانا قولا مەدال الدى. ول شاحماتتان قازاقستان ايەلدەر قۇراما ساپىندا جانسايا ابدىمالىك، الۋا نۇرمانوۆا، مەرۋەرت كاماليدەنوۆا، دينارا سادۋاقاسوۆامەن ونەر كورسەتىپ، وزبەكستان قۇراماسىن 3:1 ەسەبىمەن جەڭىپ، ءۇشىنشى ورىنعا يە بولدى. بۇل جاقسى كورسەتكىش دەي المايمىن.

ال قازاق كۇرەستەن الەم جانە ازيا چەمپيونى، بەلبەۋ كۇرەسىنەن الەم چەمپيونى نۇرداۋلەت جارىلعاپوۆ، دجيۋ-دجيتسۋدان الەم جانە ەكى دۇركىن ازيا چەمپيونى، ازيا ويىندارىنىڭ تۇڭعىش چەمپيونى دارحان نورتاەۆ پەن شاحماتتان ەكى دۇركىن الەم جانە ازيا چەمپيونى ءبيبىسارا اساۋباەۆا ەل ءۇمىتىن اقتامادى. قوس-قوستاپ الەم جانە ازيا چەمپيونى اتانعان ماڭعىستاۋدىڭ جۇلدىزدى سپورتشىلارى اسپان استى ەلىندە نەگە التىن مەدال الا المادى؟

ماڭعىستاۋ وبلىسىنىڭ سپورت باسقارماسىنا جىلىنا 8 ميلليارد تەڭگە بولىنەدى. توعىز اي قالعان پاريج وليمپياداسىنا ماڭعىستاۋدان بىردە-ءبىر سپورتشى ءالى كۇنگە دەيىن ليتسەنزيا الماعان. سوندا باسقارما باسشىسى مەن فەدەراتسيا پرەزيدەنتتەرى اي قاراپ وتىر ما؟ ءبىر كەزدەرى بوكسشى ادىلبەك نيازىمبەتوۆ ەكى مارتە وليمپياداعا قاتىسىپ، ەكى رەت كۇمىس مەدال العان ەدى. كارەراسىن اياقتاعان نيازىمبەتوۆكە بوكسقا قايتادان كەل دەيمىز بە؟ نە ىستەمىز؟!…

ايبەك مۇحانوۆ،

قازاقستان جۋرناليستەر وداعىنىڭ مۇشەسى

ماڭعىستاۋ وبلىسى اقتاۋ قالاسى