ازيادا قورىتىندىسى: مينيستر سپورت فەدەراتسيالارىنا ەسكەرتۋ جاسادى

مەملەكەت باسشىسىنىڭ تاپسىرماسى بويىنشا تۋريزم جانە سپورت مينيسترلىگى ازيا ويىندارىنىڭ قورىتىندىسى بويىنشا فەدەراتسيالاردىڭ ەسەبىن تىڭداۋدى جالعاستىردى.

بۇل جولى ەسكەك ەسۋ، جەڭىل اتلەتيكا جانە ساداق اتۋ فەدەراتسيالارىنىڭ باسشىلىعى بايانداما جاسادى. سپورت فۋنكتسيونەرلەرى قۇرامانىڭ ازيا ويىندارىنداعى جارىستارعا توقتالىپ، قالىپتاسقان جاعداي تۋرالى باياندادى.

حانچجوۋداعى ازيا ويىندارىندا اكادەميالىق ەسكەك ەسۋ بويىنشا قازاقستان قۇراماسى جۇلدەگەرلەر قاتارىنان كورىنە الماسا دا، بايداركا مەن كانوەدە ەسكەك ەسۋ بويىنشا 1 التىن، 4 كۇمىس جانە 3 قولا جۇلدەنى جەڭىپ الدى.

تۋريزم جانە سپورت ءمينيسترى ەرمەك مارجىقپاەۆ اكادەميالىق ەسكەك ەسۋ بويىنشا ۇلتتىق قۇرامانىڭ ازياداداعى ناتيجەسىنە كوڭىلى تومايتىنىن جەتكىزدى. ويتكەنى، ازيا ويىندارىنىڭ قارساڭىندا ەسكەك ەسۋشىلەرگە زور سەنىم ارتىلىپ، ەل قورجىنىنا التىن جۇلدە سالادى دەپ كۇتىلگەن ەدى. سونداي-اق، مينيستر سپورتشىلاردىڭ فۋنكتسيونالدىق جانە دەنە دايارلىعى ءالسىز ەكەنىن ايتىپ، قۇرامانىڭ ىشكى ءتارتىبىن ساقتاماعاندارعا ەسكەرتۋ جاسادى.

ەكىنشى بولىپ جەڭىل اتلەتيكا فەدەراتسياسىنىڭ وكىلدەرى بايانداما جاسادى. بيىلعى ازيا ويىندارىندا جەڭىل اتلەتتەر ءتورت قولا جۇلدەگە يە بولىپ، جالپىكوماندالىق ەسەپتە 16-ورىنعا تۇراقتادى. وسىدان 4 جىل بۇرىن يندونەزيانىڭ جاكارتا قالاسىندا وتكەن سارى قۇرلىق دوداسىندا وتانداستارىمىز 8-ورىننان كورىنگەن ەدى.

پاريجدەگى ءتورت جىلدىقتىڭ باستى دوداسىنا نەبارى 8 اي قالدى. قازىرگى تاڭدا بىزگە ناقتى جوسپار مەن ىنتىماقتاستىقتا جۇمىس ىستەۋ قاجەت. فەدەراتسيالارعا ۇلتتىق قۇرامانىڭ رەزەرۆىن قالىپتاستىرۋ جونىندە جۇمىستى كۇشەيتۋدى تاپسىرامىن. باس جاتتىقتىرۋشىلارمەن بىرلەسىپ پاريج وليمپياداسىنا دەيىن كوماندا كوشباسشىلارىن جەكە دايارلاۋدىڭ جوسپارىن دايىنداۋ كەرەك، – دەپ اتاپ ءوتتى ۆەدومستۆو باسشىسى.

جەڭىل اتلەتتەردەن كەيىن ساداق اتۋ وكىلدەرى ەسەپ بەردى. فەدەراتسيا باسشىلىعى وزدەرىنە العان مىندەتتەمەلەرىنە قاراماستان، مەرگەندەرىمىز بىردە-ءبىر باعدارلاما بويىنشا جۇلدەلى ورىنداردان كورىنە العان جوق.

جيىن قورىتىندىسىندا مينيستر ساداق اتۋ فەدەراتسياسىنىڭ ازياداداعى جارىسىنا قاناعاتتانارلىقسىز دەگەن باعا بەردى. ەسكەك ەسۋ جانە ساداق اتۋ سپورتى بويىنشا ازيادادا جۇلدەلى ورىندارعا يە بولۋ جوسپارى ورىندالعان جوق. ال جەڭىل اتلەتتەردىڭ ناتيجەلەرىن ءالى دە جاقستارتۋ قاجەت. ەرمەك مارجىقپاەۆ وتكەن جارىستاردىڭ ناتيجەلەرىنە تەرەڭ تالداۋ جۇرگىزۋدى جانە سپورتشىلاردى الداعى پاريج وليمپياداسىنا تىڭعىلىقتى دايىنداۋ ءۇشىن جەتەكشى مامانداردى تارتۋ ماسەلەسىن پىسىقتاۋدى تاپسىردى.

تۋريزم جانە سپورت مينيسترلىگى

فوتو: تۋريزم جانە سپورت مينيسترلىگى