قپل-2024: كەلەسى ماۋسىمعا قاتىساتىن كلۋبتار بەلگىلى بولدى

فۋتبولدان 2024 جىلى قازاقستان پرەمەر ليگاسىنا قاتىساتىن كوماندالار بەلگىلى بولدى. بيىل قپل-دا ويناعان كلۋبتارعا ءبىرىنشى ليگادا العاشقى ءۇش ورىندى العان كلۋبتار قوسىلدى.

سونىمەن مىنا كوماندالار قازاقستان پرەمەر ليگاسىننىڭ كەلەسى ماۋسىمىندا وينايتىن بولادى:

1.«ورداباسى» (شىمكەنت)

2.«استانا»

3.«اقتوبە»

4.«قايرات» (الماتى)

5.«قىزىلجار» (پەتروپاۆل)

6.«قايسار» (قىزىلوردا)

7.«اتىراۋ»

8.«توبىل» (قوستاناي)

9.«ماقتاارال» (تۇركىستان وبلىسى)

10.«شاحتەر» (قاراعاندى)

11.«جەتىسۋ» (تالدىقورعان)

12.«ەلىماي» (سەمەي)

13.«تۇران» (تۇركىستان)

14.«جەڭىس» (استانا)

وسى ماۋسىمنىڭ سوڭىندا «وقجەتپەس» (كوكشەتاۋ)، «كاسپي» (اقتاۋ) مەن «اقسۋ» (پاۆلودار) قپل-دا سوڭعى ءۇش ورىندى الىپ، ءبىرىنشى ليگاعا ءتۇسىپ قالدى. ءبىرىنشى ليگادان «ەلىماي» (سەمەي)، «تۇران» (تۇركىستان) مەن استانانىڭ «جەڭىس» كلۋبى كەلدى. تۇركىستاننىڭ كومانداسى قپل-عا ءبىر جىلدان كەيىن قايتىپ شىقتى.

«جەڭىس» «استانا» دەگەن اتپەن سوڭعى رەت جوعارعى ليگادا 2008 جىلى وينادى. بۇل كلۋبتىڭ اتى بىرنەشە رەت وزگەردى. 2006 جىلى «استانا» بولىپ وزگەرىپ، 2009 جىلى «لوكوموتيۆ» بولىپ قۇرىلدى.

2010 جىلى «لوكوموتيۆ» جىلدىڭ سوڭىندا اتىن «استانا» بولىپ وزگەرتتى. ال بۇرىنعى «جەڭىس» 2009 جىلى ءبىرىنشى ليگادا «نامىس» دەگەن اتپەن ويناپ، 2010 جىلى ونىڭ اتى «استانا» بولىپ وزگەردى.  سويتىپ، ءبىرىنشى ليگاداعى «استانا»، ياعني «جەڭىس» كلۋبىنىڭ جالعاسى بولىپ ەسەپتەلەتىن كلۋب ءبىر قالادا ەكى «استانا» كومانداسى دەپ نارازىلىق ءبىلدىردى. ودان كەيىن ءبىرىنشى ليگاداعى «استانا» اتىن «استانا-1964» كلۋبى دەپ وزگەرتتى.  ال «لوكوموتيۆتىڭ» ورنىنا قۇرىلعان «استانا» جوعارعى ليگادا وينادى.

ءبىرىنشى ليگاداعى «استانا-1964» كومانداسى 1964 جىلى تسەلينوگرادتا قۇرىلعان. سول كەزدە «دينامو» كلۋبى قۇرىلدى. ول كوماندا 1975 جىلدان باستاپ «تسەليننيك» بولىپ اتالدى. 1994-1995 جىلدارى «تسەسنا» بولدى. 1996 جىلى قايتادان «تسەللينيك» بولىپ اتىن وزگەرتتى. 1997 جىلى جىلدىڭ ورتاسىندا «استانا» بولىپ قۇرىلدى. 1999 جىلى «جەڭىس» كومانداسى بولىپ جاسىل الاڭعا شىقتى.

كوماندا كەزىندە كسرو-نىڭ ەكىنشى ليگاسىندا ويناعان. قازاق كسر كۋبوگىن 1968 جانە 1986 جىلدارى جەڭىپ العان. 1973 پەن 1985 جىلدارى قازاق كسر كۋبوگىنىڭ ءفيناليسى بولعان.

بۇل كلۋبتا 1955 – 1960 جىلدارى قازاق كسر-ءى جوعارعى كەڭەسى تورالقاسىنىڭ توراعاسى، 1960 – 1961 جىلدارى قازاق كسر-ءى مينيسترلەر كەڭەسىنىڭ توراعاسى بولعان مەملەكەت جانە قوعام قايراتكەرى جۇمابەك تاشەنەۆتىڭ نەمەرە ءىنىسى، اقمولا وبلىسىنىڭ استراحان اۋدانىنىڭ تۋماسى ءسالىم تاشەنەۆ ويناعان. ول 1980 – 1996 جىلدارى «تسەليننيك» كومانداسىندا دوپ تەپكەن. كوزكورگەندەردىڭ ايتۋىنشا، ول كلۋبتىڭ اڭىزى ەدى.

ءسالىم تاشەنەۆ 1956 جىلى تۋعان. 2007 جىلى قايتىس بولدى.

2014 جىلى «استانا-1964» دەپ اتالعان كلۋب تاراتىلدى. كلۋب 2021 جىلى قايتا جانداندى. «جەڭىس» — قازاقستاننىڭ ءۇش دۇركىن چەمپيونى.

2003 جىلى «جەڭىستە» قازاقستان ۇلتتىق قۇراما كلمانداسىنىڭ باس جاتتىقتىرۋشىسى ماگومەد اديەۆ ويناعان.

سەمەيلىك كلۋب قپل-دا سوڭعى رەت 2014 جىلى «سپارتاك» دەگەن اتپەن ويناعان (2015 جىلى جابىلعان). قازىرگى «ەلىماي» زاڭدى تۇردە 1990 جىلدارى قازاقستان چەمپيوناتىن ءۇش رەت جەڭىپ العان (1994، 1995، 1998) «ەلىمايدىڭ» مۇراگەرى ەمەس.

قازاقستان چەمپيوناتى 1992 جىلدان بەرى وتكىزىلىپ كەلەدى. سول كەزدەن بەرى «استانا» كلۋبى چەمپيوناتتى 2014 پەن 2019 جىلدارى جانە 2022 جىلى 7 رەت جەڭىپ العان. پاۆلوداردىڭ «ەرتىس» كلۋبى (1993، 1997، 1999، 2002، 2003) مەن «اقتوبە» (2005، 2007، 2008، 2009، 2013) بەس رەت، الماتىنىڭ «قايرات» كومانداسى (1992، 2004، 2020)، سەمەيدىڭ «ەلىمايى» (1994، 1995، 1998) مەن استانانىڭ «جەڭىس» جاساعى (2000، 2001، «استانا»، 2006) ءۇش رەت، «قوستانايدىڭ «توبىلى» (2010، 2021) مەن قاراعاندىنىڭ «شاحتەر» كلۋبى (2011، 2012) ەكى رەت جەڭىپ السا، 1996 جىلى «تاراز» ءبىر رەت چەمپيون بولعان. ال بيىل شىمكەنتتىڭ «ورداباسى» كومانداسى العاش رەت قازاقستان چەمپيونى اتاندى.

بيىلعى ماۋسىمدا الماتىنىڭ «قايرات» كلۋبىنىڭ وينىشىسى جواو پاۋلو  چەمپيوناتتىڭ ءبومبارديرى بولدى. ول 26 ماچتا 17 دوپتىڭ اۆتورى اتانىپ، ەۆستافي پەحلەۆانيدىڭ جۇلدەسىن الدى.

4 قاراشادا «استانا ارەنا» ستاديونىندا قازاقستان كۋبوگىنىڭ فينالى بولادى. بۇل ماتچتا شىمكەنتتىڭ «ورداباسى» مەن قوستانايدىڭ «توبىل» كوماندالارى كەزدەسەدى.

قازاقستان پرەمەر ليگاسىندا (قپل) 14 كوماندا وينايدى. ءار ماۋسىمنىڭ سوڭىندا ەڭ تومەنگى ورىن العان ءۇش كوماندا بىرىنشى ليگاعا كەتەدى. ولاردىڭ ورنىن ول جاقتاعى ەڭ جوعارعى ورىن العان ءۇش كوماندا كەلەدى. 2008 جىلدان باستاپ قوسالقى قۇرامدار ءتۋرنيرى وتكىزىلۋدە.

 

داستان كەنجالين،

استانا

فوتو: Instagram/fc__ordabasy