ەرەنعايىپ قۋاتاي ۇلى — التى مەيجور جۇگىرگەن جۋرناليست (فوتو)

اقش-تىڭ نيۋ-يورك قالاسىندا التىنشى مەيجور مارافون بولدى. وعان الەمنىڭ تۇكپىر-تۇكپىرىنەن كەلگەن جەلاياقتارمەن بىرگە جۋرناليست ەرەنعايىپ قۋاتاي ۇلى تا قاتىستى.

وسى جارىستا ول التى مەيجور مارافوندى sub 3، ياعني ءۇش ساعات ىشىندە جۇگىرگەن العاشقى قازاقستاندىق اتاندى.

التى مەيجور مارافون دەگەنىمىز بوستون، چيكاگو، نيۋ-يورك، لوندون، بەرلين جانە توكيو مارافوندارى. الەمدە ەڭ تانىمال تالابى دا بيىك مارافون. ساب 3 دەگەن اعىلشىننىڭ sub 3 دەگەنى.  ياعني، ول ءۇش ساعاتتان اسىرماي فينيشكە جەتۋ دەگەن ءسوز.

وتكەن جىلى ساۋىردە باستالعان التى مەيجور جورىعى وسىمەن ءتامام. امەريكا قۇراما شتاتتارىندا باستاۋ العان التى الامان ءبىر جارىم جىلدان كەيىن اقش-تا ءوز مارەسىنە جەتتى. 6 majors & sub 3 جوسپارىم ءساتتى جۇزەگە استى. التى مەيجور مارافون (بوستون، چيكاگو، نيۋ-يورك، لوندون، بەرلين جانە توكيو) جۇگىرگەن سەگىزىنشى قازاقستاندىق باقىتى بۇيىرىپتى. دەگەنمەن ناتيجە بويىنشا بارلىق التى مەيجور مارافوندى sub 3، ياكي ءۇش ساعات ىشىندە جۇگىرگەن العاشقى قازاقستاندىق ەكەنىم 6 مەيجورعا ءۇمىتتى جەرلەستەرىمە جۇعىستى بولسىن!، — دەدى جۋرناليست.

ونىڭ ايتۋىنشا، نيۋ-يورك مارافونى وڭاي بولمادى.

اي بۇرىن بار كۇشىمىزدى بەرلينگە بەرىپ كەلگەن بىزگە ءورى مەن كوپىرى كوپ نيۋ-يورك وڭاي بولمادى…

51 000 مارافونشىنى تاڭ الاكەۋىمدە ستاتەن-ايلەند ارالىنا ارنايى اۆتوبۋسپەن الىپ كەلدى. اتاقتى ۆەررازانو كوپىرى اۋزى-مۇرنىنا تولدى. ستاتەن-ايلەند، برۋكلين، كۋينس، برونكس، مانحەتتەن سىندى بەس قالاشىقتى ازان-قازان قىلعان مارافونشىلار ورتالىق ساياباققا كەلىپ ءبىر-اق تىزگىن تارتتى.

وق اتىلىسىمەن جولىمىز بىردەن ورگە ۇلاستى. ۆەررازانو كوپىرىن ورلەي جۇگىردىك. نيۋ-يوركتىڭ ەڭ ۇزىن كوپىرى ەنتىكتىرىپ، بەتتى قايتارعىسى كەلەتىندەي. بۇل جولى ەموتسيانى ەمەس تاكتيكانى تاڭداعانىم قانداي جاقسى بولعان… دۇبىرگە ىلەسپەدىم. دۇرمەككە ەرمەدىم. اپتىقپاي. الىپۇشپاي. باپپەن. بايسالدى باستادىم.

پۋبليكانىڭ قولداۋىن اۋىزبەن ايتىپ جەتكىزۋ مۇمكىن ەمەس.  نيۋ-يورك كوشەسىندە جاپپاي شوۋ بولىپ جاتىر. ءبيشى دە، ءانشى دە، وركەستر دە وسىندا. كونتسەرت تاماشالاپ، 32 شاقىرىم قالاي ارتتا قالعانىن بايقاماي دا قالىپپىن. قالعان 10 كم ون ءتۇرلى ويعا بولەپ، ساناعا سان ءتۇرلى وي سىيلادى! 2:52 ناتيجەسىمەن فينيشكە جەتتىم! ارينە، بۇل مەنىڭ رەكوردىم ەمەس، بىراق ناتيجەگە كوڭىل تولادى. البەتتە ءبىر جىلدا ءتورت مارافون جۇگىرۋ فيزيكالىق تۇرعىدا اۋىر. ادام ات ەمەس. اتتىڭ ءوزى زورىعادى. از كۇن تىنىعىپ الىپ، كروسسوۆكيدى قايتا كيەتىنىمىز انىق، — دەدى مارافونشى.

وسى رەتتە ەرەنعايىپ قۋاتاي ۇلى جاتتىقتىرۋشىسى ميحايل كراسيلوۆقا، وزىنە قولداۋ كورسەتكەن Young runner كلۋبىنا، بارلىق جاقىندارى مەن دوس-جاراندارىنا العىس ايتتى.

مەنى قولداپ، امەريكاعا ارنايى كەلگەن قازاقتىڭ كلاسسيك جازۋشىسى نۇرجان قۋانتاي ۇلى اعاما مىڭ العىس!

كلۋبتاسىم سەرگەي اپەنكونى التى مەيجوردى ءساتتى اياقتاعانىمەن جانە نيۋ-يورك مارافونىندا 60-64 جاس كاتەگورياسى بويىنشا جۇلدەلى ءبىرىنشى ورىنىمەن شىن جۇرەكتەن قۇتتىقتايمىن! بۇل — مەن ءۇشىن، ءبىزدىڭ كلۋب ءۇشىن عانا ەمەس تۇتاس قازاقستان ءۇشىن زور ماقتانىش!، — دەدى ول.

سونىمەن مارافونشىنىڭ ايتۋىنشا، بيىلعى جۇگىرۋ ماۋسىمى اياقتالدى. ەندى ونى تاعى 2024 جىلدا قايتالانباس ەموتسياعا تولى ساتتەر كۇتىپ تۇر.

ەسكە سالساق، جۋرناليست ەرەنعايىپ قۋاتاي ۇلى بوستون مارافونىندا مارەگە 2 ساعات 58 سەكۋندتا جەتكەن. ودان كەيىن توكيودا 2:54، لوندوندا 2:53، چيكاگودا 2:51، بەرليندە 2:50 ناتيجە كورسەتكەن. ەندى مىنە، نيۋ-يوركتە بولعان مارافوندا فينيشكە 2 ساعات 52 مينۋتتا جەتتى. ءسويتىپ، ول التى مەيجور مارافوندى sub 3، ياعني ءۇش ساعات ىشىندە جۇگىرگەن العاشقى قازاقستاندىق اتاندى.

ءبىز ەلدە شىعارماشىلىق پەن شارۋاشىلىقتى قاتار الىپ جۇرگەن كاسىپكەر ارىپتەسىمىزگە الداعى ۋاقىتتا دا سۇيىنشىلەيتىن جاڭالىقتارى كوپ بولسىن دەپ تىلەيمىز!

 

داستان كەنجالين،

استانا