شىمكەنتتە قازاق كۇرەسىنەن بالۋان شولاق اتىنداعى كلۋب اشىلدى

بۇگىنگى كۇنى قازاق كۇرەسىنىڭ قارقىندى دامىپ كەلە جاتقانىن كورە وتىرىپ كوڭىلدى قۋانىش كەرنەيدى. ويتكەنى، ۇلتتىق كۇرەسىمىز بىرىككەن كۇرەس وداعىنىڭ (UWW)  قۇرامىنا مۇشە بولىپ ەنگەلى بەرى cپورتتىڭ وسى تۇرىنەن الەمنىڭ ءار تۇكپىرىندە جارىستار ۇيىمداستىرىلىپ، قازاق كۇرەسىنە دەگەن قىزىعۋشىلىق ارتىپ كەلەدى.

ارينە، ەلىمىزدە ءالى دە قازاق كۇرەسىن دامىتۋ ءۇشىن جاسالىناتىن كوپتەگەن ىرگەلى ىستەر كوپ. سولاردىڭ ءبىرى سپورت عيماراتتارىن كوپتەپ اشىپ، جاس ۇرپاقتىڭ ءتول كۇرەسىمىزگە سۇيىسپەنشىلىگىن جاقسارتۋ جولىندا اۋقىمدى جۇمىستار جاساۋ كەرەك. جۋىردا شىمكەنت قالاسىندا قازاق كۇرەسىنەن ۇلكەن كلۋب اشىلىپ، قالا تۇرعىندارىن ءبىر قۋانتتى. بۇل قازاق كۇرەسى كلۋبىنىڭ ءزاۋلىم ساراي بولىپ تۇرعىزىلۋىنا وڭتۇستىك وڭىرگە تانىمال قۇرىلىسشى، ارداقتى ازامات، «عيمرات قۇرىلىس-1» جشس  كومپانياسىنىڭ باسشىسى، كەزىندە قازاق كۇرەسى مەن ەركىن كۇرەستەن وبلىستىق، رەسپۋبليكالىق ءتىپتى بۇكىلوداقتىق جەكپە-جەكتەردە توپ جارىپ، بىرنەشە دۇركىن چەمپيون  اتانعان ارداگەر پالۋان ءازيز داۋلەتبەكوۆ زور ۇلەسىن قوستى. ەل يگىلىگى ءۇشىن سالىنعان قازاق كۇرەسى كلۋبىنىڭ اشىلۋىنا دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى يسلام الماقان ۇلى ابىشەۆ پەن وسى ۇيىمنىڭ ۆيتسە-پرەزيدەنتى سەرىك ادام ۇلى تۇكەەۆ مىرزالار ارنايى  كەلىپ، كلۋبتىڭ تۇساۋىن سالتاناتتى تۇردە  كەستى. بىتەر ءىستىڭ باسىنا — جاقسى كەلەر قاسىنا دەمەكشى، كوز تارتاتىن ءزاۋلىم عيمارات ەل يگىلىگىنە تارتۋ ەتىلىپ جاتقان كەزدە، بەيعامدىقتى  ءجون كورمەگەن ىسكەر باسشى، قازاق كۇرەسىن  ورگە سۇيرەپ جۇرگەن جاناشىر ازامات يسلام ابىشەۆ  اشىلۋ سالتاناتىندا ءتول كۇرەسىمىزدىڭ بولاشاعى تۋراسىندا  ءوزىنىڭ جۇرەكجاردى  پىكىر-ۇسىنىستارىمەن  دە بولىسە  كەتتى.

«ءبىز قازاق كۇرەسىن  دامىتۋ ءۇشىن  كوپ بولىپ ۇلەس قوسۋىمىز كەرەك. ايتالىق، ءاربىر ادام   ۇلتتىق كۇرەسىمىزدەن اشىلعان قورعا  دەپ،  ءوز قالتاسىنان 100 تەڭگەدەن  شىعارىپ سالىپ وتىرسا، قانشاما قارجى جينالار ەدى. ال، سول قور زاڭدى تۇردە تىركەلىپ، ءاربىر تيىن ءتول كۇرەسىمىزدىڭ ەرتەڭىنە جۇمسالۋ كەرەك. تامشىدان تەڭىز قۇرالاتىنىن ەسكەرسەك، ۇلتتىق كۇرەسىمىز ەشقانداي قارجى تاپشىلىعىنا كەزدەسپەگەن بولار ەدى. اركىمنەن كومەك سۇراپ تەلمىرەمەي  جارقىن ىستەرمەن ۇلكەن جەتىستىكتەرگە جەتەر ەدىك»، — دەپ،  اقىلعا قونار ۇسىنىستى العا تارتتى. راسىمەن دە قازاق كۇرەسىندەگى قارجىلاي تاپشىلىقتى سەزىنبەگەن جان جوق شىعار، ءسىرا. قانشاما تالانتتى پالۋاندار مەن جاتتىقتىرۋشىلار اقشانىڭ ازدىعىنان  تاسادا قالىپ نە بولماسا وزگە سپورت تۇرلەرىن جاعالاپ كەتىپ ءجۇر. ول وتىرىك ەمەس. سوندىقتان دا قازاق كۇرەسىندە وسى ءبىر ءتۇيىنى شەشىلمەي تۇرعان ماسەلەگە ءبىر نۇكتە قويار ءسات جاقىنداعان سەكىلدى. مىسالى، دۇنيەجۇزىلىك قازاق كۇرەسى فەدەراتسياسى قانشاما الەم، ەۋروپا جانە ازيا چەمپيوناتتارىن وتكىزدى. ال، سول الەمدىك دەڭگەيدە وتكەن جارىستارعا جوعارىدان ءبىر تيىن كومەك بولىنگەن ەمەس. تەك، ۇلتقا جاناشىر، ۇلتجاندى، قايىرىمدى، پاتريوت ازاماتتاردىڭ ارقاسىندا قازاق كۇرەسىنەن الەمدىك الاماندار توقتاۋسىز  ۇيىمداستىرىلىپ  كەلەدى. ويتكەنى، قازاق كۇرەسى  كيەلى ءتول ونەرىمىز بولعاندىقتان  اللانىڭ كومەگىمەن اركەز دە ايتەۋىر ءتۇپتىڭ-تۇبىندە جاناشىر جاندار تابىلىپ جاتادى. حوش، سونىمەن شىمكەنتتە اشىلعان قازاق كۇرەسى كلۋبىنا ورالساق.

بۇگىنگى تاڭدا قازاق كۇرەسىنەن 7 الەم، 11 ازيا، 3 ەۋروپا چەمپيوناتى جانە 3 الەم كۋبوگى ءوتىپ، 40-تان استام ەلدە قازاق كۇرەسى فەدەراتسيالارى جۇمىس جاساۋدا.  بىلتىر ءتول كۇرەسىمىز ەل سپورتى تاريحىندا تۇڭعىش رەت اشعابادتتا وتكەن جابىق كەشەندەگى  ازيا ويىندارىنىڭ باعدارلاماسىنا 3 سالماق  دارەجەسى بويىنشا  كىرىپ، بارشا قازاق ەلىن قۋانىشقا بولەگەنى ەسىمىزدە.

2016 جىلى قازاق كۇرەسىنەن افريكا جانە پانامەريكا چەمپيوناتتارى ۇيىمداستىرىلىپ، ۇلتتىق كۇرەسىمىز الەم حالقى قىزىعا قارايتىن كۇرەس تۇرىنە اينالىپ كەلەدى.  وسىلايشا، وتكەن جىلى قازاق  كۇرەسىمىز ەلەۋلى جەتىستىكتەرمەن جىلدى قورىتىندىلادى. سونىڭ بارلىعى دەرلىك، ۇلتتىق كۇرەسىمىز دەسە ىشكەن اسىن جەرگە قوياتىن، ءوز ىسىنە اسقان جاۋاپكەرشىلىكپەن قاراعان بىلگىر دە بىلىكتى مامانداردىڭ ەلەۋلى ەڭبەكتەرىنىڭ جەمىسى. سولاردىڭ ءبىرى جانە بىرەگەيى سەرىك ادام ۇلى تۇكەەۆ. قالا ورتالىعىنان بوي كوتەرگەن سۋ جاڭا قازاق كۇرەسى عيماراتىنىڭ  سالتاناتتى اشىلۋىنا وڭتۇستىك قازاقستان وبلىسىنىڭ  قۇراما كومانداسىنىڭ بەلدى پالۋاندارى تۇگەلدەي كەلىپ، قۋانىشپەن شىن كوڭىلدەرىمەن ءبولىستى. ولاردىڭ اراسىندا كوماندا كاپيتانى ءادىلجان ىستىباەۆ تا بار. ءادىلجان اشعابادتتا وتكەن ازيا ويىندارىندا قولا جۇلدەنى جەڭىپ العان تۇڭعىش قازاقستاندىق پالۋان بولىپ، ەسىمى تاريحتا قالدى. ول سۇيىكتى قالاسىندا قازاق كۇرەسىنەن سپورت كلۋبىنىڭ اشىلىپ وتىرعانىنا ءدان ريزا. ويتكەنى، «عيمارات قۇرىلىس-1 »  جشس  كومپانياسىنىڭ باسشىسى، جانى جايساڭ، ارداگەر پالۋان ءازيز داۋلەتبەكوۆ ەندى، وبلىس  نامىسىن قورعايتىن سپورتشىلاردىڭ   الداعى ۋاقىتتا ەشقانداي قيىندىققا كەزدەستىرمەي قاناتىنىڭ استىنا الىپ، بار جاعدايلارىن جاساپ بەرۋگە دايىن ەكەندىگىن ىسىمەن دالەلدەدى. ارينە، قامقورلىق بولعان كەزدە، قيىنشىلىق سىرت اينالىپ كەتىنىنى بەلگىلى. سوندىقتان دا پالۋانداردىڭ جۇزدەرىندە جىلىلىقتىڭ نۇرى سەزىلگەندەي. ايپاقشى، جۋىردا  الماتىدا قازاق كۇرەسىنەن كونفەدەراتسيا كۋبوگى ءۇشىن وتكەن جارىسقا وبلىس  پالۋاندارىنىڭ بارلىق قارجى جۇگىن كوتەرىپ، ابىرويمەن اپارعان ءازيز اعالارىنا قۇراما كوماندانىڭ بالۋاندارىنىڭ ايتار العىستارى شەكسىز. سودان بولار وبلىس نامىسىن قورعاعان ءاپايتوس جىگىتتەر جەلپىنە ونەر كورسەتىپ، ۇلكەن جەتىستىكتەرگە جەتە ءبىلدى. وسىلايشا، قازاق كۇرەسى ءۇشىن وتكەن جىل ەلەۋلى وقيعالارعا تولى بولىپ، قۇتتى جىلدىڭ ءبىرى بولىپ تاريح قويناۋىنا ءوتىپ كەتتى.

وڭتۇستىك ءوڭىردى قازاق كۇرەسىنەن تۇڭعىش رەت اشىلعان كلۋب ايگىلى پالۋان بالۋان شولاقتىڭ ەسىمىمىمەن اتالادى. بالۋان شولاقتاي اتى دارابوز پالۋاندار شىعىپ، قازاقستاننىڭ عانا ەمەس، جالپى قازاق ەلىنىڭ نامىسىن الەم جەكپە-جەكتەرىندە ابىرويمەن قورعاسىن دەگەن ءۇمىتتى تۋ ەتكەن بۇل سپورت كلۋبىنىڭ  الار اسۋ ءالى الدا دەپ ويلايمىز. «قىران تۇلەگىنە قايىسپاس قانات سىيلايدى، ۇستاز شاكىرتىنە تالمايتىن تالاپ سىيلايدى»، دەمەكشى، وسىنداي بەرەكەلى باق وتاۋعا، جانپەيىس قوبىلانوۆتاي بىلىكتى ۇستاز، تاجىربيەلى كۇرەس مامانىنىڭ باسشىلىق قىزمەتىنە  شاقىرتىلۋى جارتى ءىستىڭ بىتكەنى دەپ سانايدى جەرگىلىكتى جۇرتشىلىق.

اتا بابامىز بىزگە  ميراس ەتىپ قالدىرعان بەكزات ونەرىمىز وسىنداي قايىرىمدى ىستەرمەن  قارىشتاپ دامىپ كەلەدى. دۇنيەجۇزىلىك قازاق كۇرەسى فەدەراتسياسىنىڭ العا قويىپ وتىرعان اسقارالى ارمان-ماقساتتارى دا اسقاق. ول — ءتول كۇرەسىمىزدى وليمپيادا ويىندارىنا كىرگىزۋ. ارينە، سول باعىتتا جاسالار جۇمىس جەتكىلىكتى. بيىل جازعى ازيا ويىندارىنىڭ باعدارلاماسىنا كىرگىزۋ نەگىزگى جوسپاردا تۇر.

اسىعۋ كەرەك اسىعۋ كەرەك قانداي دا،

ۋاقىت سەنىڭ اسىقپا دەگەنىڭە قارايما.

اسىعۋ كەرەك اسىعا كۇتكەن ارماننىڭ،

اپپاق ساۋلەسى ءتۇسسىن دە تۇرسىن ماڭدايعا، — دەپ اقيىق اقىن مۇقاعالي جىرلاعانداي، يەك ارتقان ماقساتىمىز قازاق كۇرەسىن وليمپادا ويىندارىنا قوسۋ دەپ بىلسەك، اسىعا ءجۇرىپ الامان ءىستى تىندىرۋدا  شىرىن ءۇمىتىمىزدى ۇزبەسەك ەكەن.

 

اقىن ورداباي ۇلى،

فوتو: عابيت ساپاربەكوۆ،

شىمكەنت