SportPress.kz Qazaqstan sport jańalyqtary
Premer-mınıstr Álıhan Smaıylov 22-28 qazan aralyǵynda Qytaıdyń Hanchjoý qalasynda ótken IV Azııa Para oıyndarynyń jeńimpazdarymen jáne júldegerlerimen kezdesti, dep habarlady Úkimettiń resmı saıty.
Jarysqa Qazaqstan atynan 14 sport túrinen 131 sportshy qatysty.
Nátıjesinde el quramasy 41 medal jeńip aldy, onyń ishinde 8 altyn, 12 kúmis jáne 21 qola medal ıelendi.
Medal sany boıynsha Qazaqstan 44 qatysýshy el arasynda 11-shi orynǵa kóterildi.
Kezdesýde Álıhan Smaıylov memleket basshysy Qasym-Jomart Toqaevtyń alǵys hatyn oqyp, qazaqstandyq paralımpıada oıynshylaryn ótken Para oıyndaryndaǵy jarqyn jeńisterimen quttyqtady.
Sizderdiń boılaryńyzdaǵy janqııarlyq rýh pen jeńiske degen qushtarlyq mıllıondaǵan adamdardy ómirdegi qıyndyqtardy eńserýge jáne tabysqa jeteleıdi. Sizderdiń keremet sporttyq ónerlerińiz adamnyń erik-jigeriniń sheksiz ekenin pash etti. Sizderdiń árqaısylaryńyzdyń ómir joldaryńyz – óskeleń urpaq úshin sheberliktiń, batyldyqtyń, sondaı-aq tabandylyqtyń úlgisi. Onsyz, árıne joǵary sporttyq nátıjelerge jetý múmkin emes, — dedi premer-mınıstr.
Álıhan Smaıylovtyń aıtýynsha, jetistikke jetý jolynda paralımpıadashylarǵa qoldaý kórsetken tálimgerler men jattyqtyrýshylar da erekshe qurmetke laıyq.
Sizder tabysqa jetý jolynda talmaı kúrestińizder. Azııa Para oıyndaryndaǵy búgingi jeńister — bolashaq Paralımpıada jetistikteri úshin mańyzdy qadam, — dedi ol.
Kezdesýde Álıhan Smaıylov Azııa Para oıyndarynyń jeńimpazdary men júldegerlerine, sondaı-aq olardy daıyndaǵan jattyqtyrýshylarǵa memleket basshysynyń atynan alǵys hattar men estelik syılyqtaryn tabys etti. Qazaqstannyń Paralımpıadalyq dzıýdo federaııasy da prezıdenttiń alǵys hatymen marapattaldy.
