ەۋروپا چەمپيوناتىنا جولداما الىپ، حالىقتى قۋانتامىز — ماگومەد اديەۆ

20 قاراشادان 21 قاراشاعا قاراعان ءتۇنى ليۋبليانا قالاسىندا فۋتبولدان 2024 جىلى وتەتىن ەۋروپا چەمپيوناتى ءتۋرنيرىنىڭ اياسىندا سلوۆەنيا مەن قازاقستان ۇلتتىق قۇراما كوماندالارى كەزدەسەدى. بۇل ماتچتا ەۋرودوداعا جولداما بەرىلەدى. ن توبىندا دانيا قۇراماسى ءوز الاڭىندا سلوۆەنيا جاساعىن 2:1 ەسەبىمەن جەڭىپ، ءبىر تۋر بۇرىن ەۋروپا چەمپيوناتىنا جولداما الىپ قويدى.

قازىر تۋرنير كەستەسىندە دات فۋتبولشىلارى 22 ۇپايمەن ءبىرىنشى ورىندا تۇر. ەكىنشى ورىنعا سلوۆەنيا قۇراماسى ورنالاسىپ وتىر. بۇل ەلدىڭ كومانداسىندا 19 ۇپاي بار. ال قازاقستان قۇراماسى سان-مارينو جاساعىن جەڭگەننەن كەيىن 18 ۇپايمەن ءۇشىنشى ورىنعا تابان تىرەدى. ەندى قازاقستان مەن سلوۆەنياعا EURO-2024 دوداسىنا تىكەلەي جولداما الۋ ءۇشىن تەك قانا جەڭىس كەرەك. سوندىقتان بۇل ماتچ قوس قۇراماعا دا ماڭىزدى.

وسىدان ەكى كۇن بۇرىن ۇلتتىق قۇراما ليۋبليانا قالاسىنا بارىپ، ماتچقا دايىندىقتى باستاپ كەتتى. كەشە كوماندالار باق وكىلدەرىنە ءباسپاسوز ءماسليحاتىن وتكىزىپ، ويىن الدىنداعى سوڭعى جاتتىعۋ جاسادى.

ۇلتتىق قۇرامانىڭ باس جاتتىقتىرۋشىسى ماگومەد اديەۆ كەزدەسۋدە ەۋروپا چەمپيوناتىنا جولداما الىپ، قازاق حالقىن قۋانتۋ ءۇشىن بار كۇش-جىگەرىمىزدى سالامىز، دەدى.

ءبىز سلوۆەنيامەن ماتچقا ۇلكەن ۇمىتپەن كەلدىك. ەرتەڭ ءبىز مىقتى قارسىلاسپەن وينايمىز. ءبىز ىرىكتەۋ تۋرنيرىندە كەز كەلگەن ۇلتتىق قۇرامامەن يىق تەڭەستىرىپ ويناي الاتىنىمىزدى كورسەتتىك، كورسەتىپ تە كەلەمىز. سوندىقتان ەرتەڭ ەۋروپا چەمپيوناتىنا جولداما الىپ، قازاق حالقىن قۋانتۋ ءۇشىن بار كۇش-جىگەرىمىزدى سالامىز.  بىز ماتچقا تەك ۇپاي جيناۋ ءۇشىن دايىندالامىز، — دەدى ول.

ونىڭ ايتۋىنشا، سلوۆەنيا قۇراماسى دا ويىنعا جاقسى دايىندالىپ جاتقانعا ۇقسايدى. ولارعا تەڭ ويىندا جەتەدى. بىراق، قارسىلاس كوماندا تەڭ ويىندى قاناعات تۇتپاي، جەڭۋ ءۇشىن بارىن سالادى.

جاتتىقتىرۋشى ايتقانداي، وسىعان دەيىن ءبىز ءبىر جۇمىدىرىققا جۇمىلعان ۇجىم رەتىندە وينادىق، — دەدى كەزدەسۋدە باس جاتتىقتىرۋشىدان كەيىن ءسوز العان ۇلتتىق قۇراما كوماندانىڭ قورعاۋشىسى باعدات قايىروۆ، — ءبىز ۇجىم رەتىندە مىقتىمىز. سوندىقتان ەرتەڭ الاڭعا قاي ويىنشى شىقسا دا بارىن سالىپ، جانىن بەرىپ، سوڭىنا دەيىن ويناپ، ويىن ورنەگىن كورسەتەدى دەپ ويلايمىن. ءبىز ءۇشىن ەرتەڭگى ماتچتا كىم ويناسا دا ماقساتىمىز وزگەرمەيدى. ءبىز ءۇشىن ەڭ باستى ماقسات، ەۋروپا چەمپيوناتىنا جولادما الۋ. سول ءۇشىن ءار ويىنشى ءوزىن جاقسى جاعىنان كورسەتەدى دەپ سەنەمىز. جاتتىقتىرۋشىلار شتابى ويىن الدىندا اقىل-كەڭەستەرىن ايتىپ جاتىر. سلوۆەنيامەن ماتچقا جاقسى دايىندىقپەن شىعامىز.

كەزدەسۋدە ۇلتتىق قۇارامنىڭ جارتىلاي قورعاۋشىسى اسلان داراباەۆ ەرتەڭگى ويىندا جان الىسىپ، جان بەرىسىن وينايتىنىن اتاپ ايتتى.

ءبىز وسى كەزگە دەيىن بار كۇش-جىگەرىمىزدى ويناپ كەلدىك. ەندى ەرتەڭ دە جان الىسىپ، جان ەرىسىپ وينايمىز. اسحات تاعىبەرگەن، باقتيەر زاينۋتدينوۆ، باعدار قايىروۆ، ميحايل گابىشەۆتىڭ الاڭعا شىعا المايتىنىن بىلەسىزدەر. سوندىقتان ولارعا تەك تەز جازىلىپ كەتۋىن تىلەيمىن. ال ەرتەڭگى ماتچتا قۇداي قالاسا، جانىمىزدى بەرىپ وينايمىز. قۇدايدىڭ قالاۋىمەن ءبىز ەۋروپا چەمپيوناتىنا جولداما الۋ ءۇشىن كەلدىك. سوندىقتان سلوۆەنيامەن ويىن اسا قىزىقتى جانە تارتىستى بولادى دەپ ويلايمىن.

ەرتەڭ قۇداي قالاسا جاقسى حابارعا قۋانىپ، كيىم اۋىستىراتىن بولمەگە كىرەمىز. قازاق ەلىن قۋانتامىز، — دەدى ۇلتتىق قۇرامانىڭ ويىنشىسى اسلان داراباەۆ.

وسىدان كەيىن باس جاتتىقتىرۋشى تاعى ءسوز الىپ، سلوۆەنيا كومانداسى تۋرالى ايتتى.

قارسىلاستار تۋرالى ايتسام، ولاردىڭ ءبىر بىزدەن ءبىر ەرەكشەلىگى، سلوۆەنيادا مىقتى ويىنشىلار جەتكىلىكتى. ولار ەۋروپانىڭ مىقتى دەگەن چەمپيوناتتارىندا وينايدى. كوپتەگەن ۇلكەن تۋرنيرلەردە ويناعان. ال بىزدە رۋح بار، مىنەز بار. جۇدىرىقتاي جۇمىلعان كوماندامىز بار. ءبىز وسى كەزگە دەيىن ۇپاي جيناۋ ءۇشىن وينادىق. ونى وزدەرىڭىز دە جاقسى بىلەسىزدەر. ەرتەڭگى وينىعا دا جاقسى دايىندالىپ شىعامىز. ال ناتيجەسى ماتچتان كەيىن بەلگىلى بولادى، — دەدى ول.

باس جاتتىقتىرۋشى قازاقستان قۇراماسىنىڭ سىرت الاڭداعى جانە ءوز الاڭداعى ويىندارىنىڭ ەرەكشەلىگ تۋرالى دا پىكىر ءبىلدىردى.

بىلەسىزدەر مە، بۇل پسيحوليگياعا بايلانىستى شىعىر. مەن ءوز باسىم سولاي ويلايمىن. ونى «استانا ارەناداعى» سان-مارينو ماتچى دا كورسەتتى. ەگەر فۋتبولشى ۇلتتىق قۇرامادا كوپ ويناماي، قۇرامىنىڭ جەيدەسىندە الاڭعا شىقسا بۇل دا كادىمگىدەي پسيحولوگيالىق سالماق سالادى. سول سەبەپتى ويىنشىعا قۇرامانىڭ جەيدەسىندە ءوزى سۋدا جۇزگەن بالىقتاي سەزىنۋ ءۇشىن بەلگىلى ءبىر ۋاقىت كەرەك.ال سلوۆەنيامەن ماتچقا الاڭعا جاڭا ويىنشىلار شىعادى. سلوۆەنيا دا دانيامەن ماتچقا ءبىراز فۋتبولشىسىن شىعارماي، بىزبەن ويىنعا ساقتاعان. سوندىقتان بىزگە پسيحوليگيالىق جاعىنان دا وڭاي بولمايدى. جالپى، «جەڭۋ كەرەك، جەڭۋ كەرەك»، «مىندەتتىن تۇردە جەڭۋ كەرەك» دەگەن سوزدەر وينىشىعا كەرى اسەر ەتەدى. ول سان-مارينومەن ويىندا دا ءبىلىندى.  فۋتبولشىعا ول كادىمگىدەي سالماق سالادى. سلوۆەنيا تۋرالى تاعى ايتسام، ولار وزدەرىنە سەنىمدى ەكەن. كەشە سلوۆەنيانىڭ قۇرامىن كوردىم. ءبىزدى جەڭەتىندەرىنە سەنىمدى. بىراق ءبىزدىڭ توپتاعى قارسىلاستىڭ ءبارى سونداي بولىپ ەدى عوي. مەن باسقا ەلدەردەن ۇلتتىق قۇراماعا دەگەن قۇرمەتتى سوزبەن ەمەس، ىستەپ دالەلدەگىم كەلەدى. ەرتەڭ دە سولاي بولادى، — دەدى ماگومەد اديەۆ.

كەزدەسۋدە ول سلوۆەنيامەن ويىنعا ۇلتتىق قۇرامانى قولداۋ ءۇشىن جاراقات العان كوماندا كاپيتانى اسحات تاعىبەرگەن مەن ميحايل گابىشەۆ كەلگەنىن، باۋىرجان يسلامحاننىڭ دا قاتارعا قوسىلاتىنىن ايتتى. ال باقتيەر زاينۋتدينوۆ وكىنىشكە قاراي، كەلە المايدى. وعان «بەشيكتاشتىڭ» دارىگەرلەرى ۇشاقپەن ۇشۋعا رۇقسات بەرمەگەن.

سلوۆەنيا-قازاقستان ماتچىنا پولشا تورەشىلەر بريگاداسى قىزمەت ەتەدى.

باس تورەشى بولىپ شيمون مارچينياك تاعايىندالدى. ونىڭ كومەكشىلەرى پاۆەل سوكولنيتسكي مەن ادام كۋپسيك بولادى. ءتورتىنشى تورەشى — پاۆەل راچكوۆسكي.

مارچينياك كاتارداعى الەم چەمپيوناتىندا 36 باس تورەشىلەرىنىڭ ءبىرى بولىپ جۇمىس ىستەدى.

ول الەم چەمپيوناتىنىڭ توپتىق كەزەڭدەگى فرانتسيا مەن دانيا ماتچىنا (2:1)، 1/8 فينالدىڭ ارگەنتينا مەن اۆستراليا ويىنى (2:1) مەن فينالدا باس تورەشى بولعان. ال فينالدا ارگەنتينا قۇراماسى فرانتسيا كومانداسىن نەگىزگى ۋاقىت 3:3 ەسەبىمەن اياقتالعاندا پەنالتي سەرياسىندا 4:2 ەسەبىمەن جەڭگەنى بەلگىلى.

تاعى دا ەسكە سالايىق، 20 قاراشادان 21-نە قاراعان ءتۇنى استانا ۋاقىتىمەن ساعات 01.45-تە Qazaqstan جانە Qazsport تەلەارنالارىندا كورسەتىلەدى. ازىرشە ايتارىمىز وسى.

ايتقانداي، بۇگىن — قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆتىڭ تۋعان كۇنى. ۇلتتىق قۇراما قفف باسشىسىنىڭ تۋعان كۇنىنە سلوۆەنيا كومانداسىن جەڭىپ، ەۋروپا چەمپيوناتىنا جولداما السىن دەپ تىلەيمىز!

 

دايىنداعان داستان كەنجالين،

استانا