SportPress.kz Qazaqstan sport jańalyqtary
Búgin Astanadaǵy L. N. Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýlteti teleradıo jáne qoǵammen baılanys kafedrasynda qazaq sport jýrnalıstıkasynyń negizin qalaǵan kórnekti qalamger Seıdahmet Berdiqulovtyń 90 jyldyǵyna arnalǵan «Qazirgi qazaq sport jýrnalıstıkasy jáne medıakommýnıkaııa máseleleri» atty halyqaralyq ǵylymı-tájirıbelik konferenııa bolyp, el sportyn nasıhattaýǵa telegeı-teńiz eńbek sińirgen qalamgerdiń qurmetine sport jýrnalıstıkasy aýdıtorııasy ashyldy.
Osy jıynǵa Seıdahmet Berdiqulovtyń shákirti, Qazaqstan Respýblıkasy Prezıdentiniń keńesshisi, UǴA akademıgi, fılologııa ǵylymdarynyń doktory, professor Baýyrjan Omarov ta qatysyp, sóz sóıledi. Oqyrman nazaryna qalamgerdiń baıandamasyn tolyq berýdi jón kórip otyrmyz.
Seıdahmet Berdiqulovtyń týǵanyna – 90 jyl! Tuǵyrly toqsan! Taǵylymdy toqsan! Torqaly toqsan! Tolǵamy mol toqsan! Sóıtip, búgin Seıdahmet aǵanyń rýhyn toqsannyń tórinde terbetip otyrmyz. Bárińizdi osy mereıli kúnmen quttyqtaımyn!
Ardaqty aǵamyz alpys bir jyl ǵumyr keshti. Onyń on alty jylyn «Lenınshil jasty» basqarýǵa arnady. Ol osynaý kezeń ishinde qazaq jýrnalıstıkasynda eki mektep qalyptastyrdy. Alǵashqysy – jazý sheberliginiń mektebi. Ustazdyń ózinen úlgi alyp, ózgeshe stılmen qalam silteıtin úrdis paıda boldy. Sol dástúr áli kúnge deıin óris alyp, qanat jaıyp keledi. Bul mekteptiń ókilderi kóbirek. Ekinshisi – qazaq sport jýrnalısteriniń mektebi. Onyń bul turǵydaǵy talaby asa qatal edi. Osy jolǵa túsken adamnyń ne beli, ne belbeýi ketetin-di. Sondyqtan az boldy onyń shynaıy shákirtteri. Tipti bir qoldyń saýsaǵy da jetip qalady túgeldeýge. Bar-joǵy úsheý-aq. Nesip Júnisbaev, Dúráli Dúısebaev, Qydyrbek Rysbekov. Suńǵyla Sákeńniń óz kindiginen taraǵan, túr-túsine, minez-qulqyna, is-áreketine deıin ózinen aýmaı qalǵan týǵan shákirti osy úsheýi ǵana. Bulardyń joly basqalardan sál bólekteý. О́zgelerdiń eńbektenýi eńbekke uqsaıdy. Al bulardyń eńbektenýi jan alyp, jan berisken jankeshti jattyǵýǵa uqsaıdy. Ustazdyń kózin kórdi. Úlgisin úırendi. Jolyn jalǵady. Taıaǵyna jon terisin tildirdi. Qamshysyna qyr arqasyn tosty. Naızasyna shanshyldy, shoqparyna janshyldy. Qıyn synaqtyń bárine shydady. Berdiqulovtyń aldyna bóltirik bop kirip, bóri bop shyqty. Búginde azýy alty qarys abadanǵa aınaldy. Berdiqulovtyń bar bolmysyn boıyna sińirdi. Biz olarǵa qyzyǵamyz. Qýanamyz. Qurmetteımiz! Amandyǵyn tileımiz! Endi olardyń shákirtteri Seıdaǵańnyń dástúrin ári qaraı jalǵaıdy dep senemiz!
Al, bizder, Berdiqulovtyń beshpentinen shyqqan ózge shákirtteri, sirá, baspasózdiń bapkerinen erekshe stıl izdeýdi, tosyn taqyryp qoıýdy, keıipkerdi aıalaı bilýdi, maqalany tartymdy etip jazýdy, ómir men ıýmordy úılestirýdi úırengen shyǵarmyz. Eger úırensek, árıne…
«Jas alashta» segiz jyl jumys isteppiz. Sonyń bir jylǵa jeter-jetpes ýaqytynda ǵana Seıdaǵańnyń qaramaǵynda boldyq. Sheberlikti sanaǵa sińirý turǵysynan kelsek, sol bir jyl ana jeti jyldy on orap alady-aý deımin… Berdiqulovtyń sol qolymen jazylǵan sońǵy buıryqtary arqyly qyzmetke alynǵan biz shynynda da sheksiz baqytty edik.
Ol batyr bas redaktor boldy. Eshkimmen yqpady. Týyn jyqpady. Sarbazdaryn árkez qorǵap júrdi. Bizdiń tusymyzda bir oblystyń basshysynyń aty-jóninen óreskel qate jiberip, moıny qylqıyp, áne-mine jumystan ketem ǵoı dep kózi mólıip otyrǵan Ánýarbek Áýelbekovti jazalaýǵa usynǵandardyń ekpinin basty.
Ol asa batyl, qajyrly qaıratker boldy. Bir kezde Almaty qalasynyń basshysy bolǵan, biz biletin jerdegi Shýlıko ma, álde «shyǵysym batys bop ketti» degendeı, keıingi versııadaǵy Solomenev pe, másele onda emes, shikireıgen shoń sheneýnikke eldiń kózinshe «Saýsaǵyńyzdy shoshaıtpańyz, bizdi qurtqan osy suq saýsaqtar» deý úshin de arystannyń aıbaty, jolbarystyń júregi kerek shyǵar.
Ol keremet maketshi boldy. «Lenınshil jastyń» ár sany toıǵa baratyn qyzdaı jasanyp turar edi. Berdiqulovtyń maketke talaby joǵary ekenin biletin sekretarıat qyzmetkerleri basylymdy árleýge baryn salatyn.
Ol taqyryp qoıýǵa óte sheber boldy. Onyń tapqan taqyryptary alshysynan túsken asyqtaı shıyryla qalatyn. «Osyndaı taqyryp, Turady ózine shaqyryp» degen tirkes Seıdaǵańnyń ǵalamat qabiletine arnalǵandaı kórinetin.
Ol inilerge qamqor, aqylshy aǵa boldy. О́z basym elý úshtegi Seıdahmet Berdiqulovtyń otyz bestegi Nesip Júnisbaevqa kabınetindegi 33-92-56 nómerli tikeleı telefonynan «Áı, qaraǵym, Nesipjan, sheteldesiń, abaılap júr», – dep aǵalyq meıirimin tógip, sonaý Meksıkadaǵy fýtbol toıynan reportaj berip jatqan jas áriptesin saqtandyryp otyrǵanyn óz qulaǵymmen estidim.
Biz ony ustaz sanadyq. Ol kisi bizdi shákirtim dep eseptedi me, joq pa, onsha mańyzdy emes. Jalpy, ónegeli ustazdyń eshkimdi de shákirtim dep jarııaǵa jar salmaǵany jaqsy. Eger ustazdy moıyndasa, sol sózdi shákirttiń ózi aıtqany jón. Mine, biz de sóıttik…
Aǵamyzdyń rýhy shat bolsyn! Búgingi konferenııanyń jumysyna jemis tileımin!
