ەۋرازيا ۋنيۆەرسيتەتىندە سەيداحمەت بەردىقۇلوۆ اتىنداعى اۋديتوريا اشىلدى

بۇگىن استاناداعى ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عيماراتىندا قازاق سپورت جۋرناليستيكاسىنىڭ نەگىزىن قالاۋشى، ەل سپورتىن ناسيحاتتاۋعا تەلەگەي-تەڭىز ەڭبەك سىڭىرگەن، قازاقستان سپورت باسىلىمدارى قاۋىمداستىعىنىڭ العاشقى پرەزيدەنتى سەيداحمەت بەردىقۇلوۆ اتىنداعى اۋديتوريا اشىلدى.

سەيداحمەت بەردىقۇلوۆ اتىنداعى اۋديتوريانىڭ اشىلۋ سالتاناتىنا ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، مەملەكەت جانە قوعام قايراتكەرى، اباي اتىنداعى مەملەكەتتىك سىيلىقتىڭ لاۋرەاتى ساۋىتبەك ابدراحمانوۆ، ۇعا-نىڭ اكادەميگى ءۋاليحان قاليجان، سپورت جۋرناليستيكاسىنىڭ ارداگەرى نەسىپ ءجۇنىسباي ۇلى، قازاقستان رەسپۋبليكاسى پرەزيدەنتىنىڭ كەڭەسشىسى باۋىرجان وماروۆ، بەلگىلى قالامگەرلەر قىدىربەك رىسبەك ۇلى، تالعات باتىرحان، «Altyn Qyran Foundation» قوعامدىق قورىنىڭ ديرەكتورى رينات كەرتاەۆ، QazSport تەلەارناسىنىڭ ديرەكتورى ناعي باقىتبەك، سەيداحمەت بەردىقۇلوۆتىڭ جيەنى ءمادي ءامىرجانوۆ قاتىستى.

ءىس-شارانى ۋنيۆەرسيتەت رەكتورى كىرىسپە سوزبەن اشتى. سودان كەيىن سەيداحمەت بەردىقۇلوۆتىڭ شاكىرتى نەسىپ ءجۇنىسباي ۇلى مەن «Altyn Qyran Foundation» قوعامدىق قورىنىڭ ديرەكتورى رينات كەرتاەۆ ءسوز سويلەپ، اۋديتوريانىڭ ءمانى مەن ماڭىزى تۋرالى ايتتى.

رينات كەرتاەۆ اۋديتوريانىڭ اشىلۋىنا Altyn Qyran Foundation قوعامدىق قورى مەن ونىڭ باسشىسى يسلامبەك سالجانوۆتىڭ مۇرىندىق بولعانىن، سەيداحمەت بەردىقۇلوۆ سياقتى قازاق سپورت جۋرناليستيكاسىنىڭ نەگىزىن قالاعان كورنەكتى قالامگەردىڭ اتىنداعى اۋديتوريا اشۋ اسا زور قۇرمەت ەكەنىن اتاپ ءوتتى.

اۋديتوريانىڭ ءبىر جاعى ستۋديا ەتىپ جاقسى بەزەندىرىلگەن. وندا ستۋديا قوناقتارىمەن سۇقبات الۋعا، ونى ناسيحاتتاۋعا جاعداي جاسالعان.

ەكىنشى جاعىنان اۋديتوريادا قالامگەردىڭ ءومىربايانىنان سىر شەرتەتىن دۇنيەلەر قويىلعان بۇرىش اشىلعان.

سالتاناتتى ءىس-شارا سەيداحمەت بەردىقۇلوۆتىڭ 90 جىلدىعىنا ارنالعان حالىقارالىق عىلىمي-تاجىريبەلىك كونفەرەنتسياعا ۇلاستى.

سەيداحمەت بەردىقۇلوۆ – 1966 جىلى لوندونعا، 1970 جىلى مەكسيكاعا بارىپ، فۋتبولدان الەم چەمپيوناتى جايلى قالام تارتقان العاشقى قازاق. سونداي-اق ول 1970-1986 جىلدارى «لەنينشىل جاس» (قازىرگى «جاس الاش») گازەتىنىڭ رەداكتورى، 1986-1994 جىلدارى «جالىن»، «بالاۋسا» باسپالارىنىڭ ديرەكتورى بولدى.

داستان كەنجالين،

استانا