Eýrazııa ýnıversıtetinde Seıdahmet Berdiqulov atyndaǵy aýdıtorııa ashyldy

Búgin Astanadaǵy L. Gýmılev atyndaǵy Eýrazııa ulttyq ýnıversıtetiniń ǵımaratynda qazaq sport jýrnalıstıkasynyń negizin qalaýshy, el sportyn nasıhattaýǵa telegeı-teńiz eńbek sińirgen, Qazaqstan sport basylymdary qaýymdastyǵynyń alǵashqy prezıdenti Seıdahmet Berdiqulov atyndaǵy aýdıtorııa ashyldy.

Seıdahmet Berdiqulov atyndaǵy aýdıtorııanyń ashylý saltanatyna Eýrazııa ulttyq ýnıversıtetiniń rektory Erlan Sydyqov, memleket jáne qoǵam qaıratkeri, Abaı atyndaǵy Memlekettik syılyqtyń laýreaty Saýytbek Abdrahmanov, UǴA-nyń akademıgi Ýálıhan Qalıjan, sport jýrnalıstıkasynyń ardageri Nesip Júnisbaıuly, Qazaqstan Respýblıkasy Prezıdentiniń keńesshisi Baýyrjan Omarov, belgili qalamgerler Qydyrbek Rysbekuly, Talǵat Batyrhan, «Altyn Qyran Foundation» qoǵamdyq qorynyń dırektory Rınat Kertaev, QazSport telearnasynyń dırektory Naǵı Baqytbek, Seıdahmet Berdiqulovtyń jıeni Mádı Ámirjanov qatysty.

Is-sharany ýnıversıtet rektory kirispe sózben ashty. Sodan keıin Seıdahmet Berdiqulovtyń shákirti Nesip Júnisbaıuly men «Altyn Qyran Foundation» qoǵamdyq qorynyń dırektory Rınat Kertaev sóz sóılep, aýdıtorııanyń máni men mańyzy týraly aıtty.

Rınat Kertaev aýdıtorııanyń ashylýyna Altyn Qyran Foundation qoǵamdyq qory men onyń basshysy Islambek Saljanovtyń muryndyq bolǵanyn, Seıdahmet Berdiqulov sııaqty qazaq sport jýrnalıstıkasynyń negizin qalaǵan kórnekti qalamgerdiń atyndaǵy aýdıtorııa ashý asa zor qurmet ekenin atap ótti.

Aýdıtorııanyń bir jaǵy stýdııa etip jaqsy bezendirilgen. Onda stýdııa qonaqtarymen suqbat alýǵa, ony nasıhattaýǵa jaǵdaı jasalǵan.

Ekinshi jaǵynan aýdıtorııada qalamgerdiń ómirbaıanynan syr shertetin dúnıeler qoıylǵan burysh ashylǵan.

Saltanatty is-shara Seıdahmet Berdiqulovtyń 90 jyldyǵyna arnalǵan halyqaralyq ǵylymı-tájirıbelik konferenııaǵa ulasty.

Seıdahmet Berdiqulov – 1966 jyly Londonǵa, 1970 jyly Meksıkaǵa baryp, fýtboldan álem chempıonaty jaıly qalam tartqan alǵashqy qazaq. Sondaı-aq ol 1970-1986 jyldary «Lenınshil jas» (qazirgi «Jas Alash») gazetiniń redaktory, 1986-1994 jyldary «Jalyn», «Balaýsa» baspalarynyń dırektory boldy.

Dastan KENJALIN,

ASTANA