«قاسقىرلار پاتشايىمى» كىتابىنىڭ تۇساۋكەسەرى تانىستىرىلدى

الماتىداعى «شانس» كىتاپ دۇكەنىندە قىتاي ادەبيەتىنىڭ كورنەكتى وكىلى، مەملەكەتتىك قىتاي ادەبيەتى سىيلىعىنىڭ يەگەرى شەن ءشيسيدىڭ «قاسقىرلار پاتشايىمى» اتتى كىتابىنىڭ تۇساۋكەسەرى ءوتتى.

ءىس-شارادا جۋرناليستەر وداعىنىڭ مۇشەسى، «مازمۇنداما» باسپاسىنىڭ رەداكتورى، حانشايىم تاۋىرباەۆا ادەبي كوركەم شىعارمانىڭ ەرەكشەلىگىنە، قاسقىردىڭ اقىلدىلىعىنا، ءومىر ءسۇرۋ سالتىنا ەرەكشە توقتالدى. فيلولوگيا عىلىمدارىنىڭ PhD دوكتورى، جازۋشى، اۋدارماشى نۇرحالىق ابدىراقىن كوركەم شىعارمادا قىتاي تۇپنۇسقادا جازىلعان سويلەمدەرگە، كەيبىر قىتايعا ءسىڭىمدى بولىپ كەتكەن ءسوز تىركەستەر قازاق تىلىنە اۋدارۋعا ءدال كەلمەيتىن تۇستارىن، اۋدارماداعى قيىنشىلىقتاردى جانە ءار شىعارمانى سول سالانىڭ مامانى قولعا العانى دۇرىس بولاتىندىعىن تىلگە تيەك ەتتى. ماسەلەن، اۋدارما سالاسىندا كوركەم شىعارما مەن پروزانى جازۋشى، ال پوەزيانى اقىننىڭ ءوزى اۋدارعان دۇرىس. بۇدان بولەك، اۋدارماشى ءتىلدى جەتىك مەڭگەرۋدەن بولەك، ءار ۇلتقا تەز ءسىڭىپ كەتەتىن، ءوزىن ارقالاي سەزىنەتىن كاسىپقوي مامان بولۋى شارت. سونىمەن قاتار، اۋدارما حالىقتىڭ جۇرەگىنە ءدال جەتكىزەتىندەي، سول سالانى مەڭگەرگەن ءارى تۇسىنە بىلەتىن ماماندى قاجەت ەتەدى.

ءال-فارابي اتىنداعى قازاق ۇلتتىق ۋنيۆەرسيتەتىنىڭ ماگيسترانتى ءلايلا نوعايبەكقىزى شىعارمانى كوركەم دەگەن كەزدە كوپتەگەن تۇسىنىكسىز ءسوز تىركەستەرىنە تاپ بولعاندىعىن، ءاربىر سوزگە ەرەكشە ءمان بەرگەندىگىن ايتتى. ءوز كەزەگىندە ءسوز العان ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريح فاكۋلتەتى، ارحەولوگيا، ەتنولوگيا جانە مۋزەولوگيا كافەدراسىنىڭ پروفەسسورى، تاريح عىلىمدارىنىڭ كانديداتى، «ءبورىتانىم» عىلىمي ەڭبەگىنىڭ اۆتورى تاتتىگۇل كارتاەۆا كوركەم شىعارمانىڭ قازاقى تانىمدىق دۇنيەلەرمەن قابىساتىندىعىن، تانىمدىق ماقالانى وقۋ كەزىندە ەرەكشە اسەر العاندىعىن ايتتى.

قازاقستان جازۋشىلار وداعى باسقارماسىنىڭ ادەبي كەڭەسشىسى، اقىن سايات قامشىگەر قاسقىر ەرەكشە اڭ ەكەندىگىن، اتا-بابالارىمىز ءاۋ باستا تۇركى دۇنيەنى كوك بورىمەن تەڭەگەندىگىن اتاپ ءوتىپ، قاسقىرعا اتاۋلىعا قاتىستى ءوزىنىڭ شىعارعان ولەڭىن مانەرلەپ وقىپ بەردى. «الماتى اقشامى» گازەتىنىڭ قىزمەتكەرى، جۋرناليست نۇرعيسا ساحوۆ پەن «شىعىس ادەبيەتى» باسپا كومپانياسىنىڭ باسشىسى جەڭىس وماروۆ جۇرەكجاردى لەبىزدەرىن ءبىلدىردى. ءىس-شارادا كىتاپتىڭ تۇساۋكەسەر ءراسىمى بولدى. ودان كەيىن وقىرمان قاۋىم وزدەرىن تولعاندىرىپ جۇرگەن ماسەلەلەر بويىنشا سۇراقتار قويىپ، تۇششىمدى جاۋاپ الدى. بۇدان بولەك ەلىمىزگە تانىمال اقىن-جازۋشىلار مەن جۋرناليستەر قاۋىمى ءوز ويلارىن ورتاعا سالادى.

كىتاپتى قازاق تىلىنە فيلولوگيا عىلىمدارىنىڭ PhD دوكتورى، جازۋشى، اۋدارماشى نۇرحالىق ابدىراقىن اۋدارعان. ەڭبەكتىڭ اۆتورى شەن شيسي – قىتاي ادەبيەتىنىڭ كورنەكتى وكىلى، مەملەكەتتىك قىتاي ادەبيەتى سىيلىعىنىڭ يەگەرى. ونىڭ جانۋارلار تۋرالى جازعان شىعارمالارى ەرەكشە تارتىمدىلىعىمەن وقىرمان جۇرەگىنە جول تارتىپ، قىتايداعى «اڭدار تۋرالى رومانداردىڭ پاتشاسى» دەگەن قۇرمەتتى اتاققا يە بولدى.

«قاسقىرلار پاتشايىمى» رومانى – اۆتوردىڭ ۇزاق جىلعى اڭدار الەمىن زەرتتەۋ ەڭبەگىنىڭ ناتيجەسى. ادەتتە قاۋىپ-قاتەرگە، وقىس جايتتارعا تولى تىرشىلىك كەشەتىن قاسقىرلار قوعامىندا كوشباسشىلىق مىندەتتى كۇشى تولىسقان، قايسار ءارى تاۋەكەلشىل ارلاندار اتقارادى. اۋەگىن اشتىقتان امان الىپ قالۋ ءۇشىن ولىمگە باس تىككەن ارلان كۋيكۋي جولبارىسپەن كۇرەستە مەرت بولادى. پاتشا تاعىن ونىڭ جۇبى – قانشىق قاسقىر يەلەنەدى. شيەلەنىسكە تولى وقيعالار بارىسىندا ونىڭ سۇيىسپەنشىلىگى مەن مەيىرىمى ءومىردى وزگەرتە الاتىن ۇلى كۇش ەكەنى نانىمدى باياندالادى.

سالتانات قاجىكەن،

الماتى