استانادا دۇنيەجۇزىلىك كوشپەندىلەر ويىندارىنىڭ دايىندىعى تالقىلاندى

استانادا تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆتىڭ توراعالىعىمەن ۇلتتىق سپورت تۇرلەرىن دامىتۋ جانە 2024 جىلعا ارنالعان مىندەتتەر بويىنشا القالى جيىن بولدى، دەپ حابارلادى ۆەدومستۆو.

سونىمەن قاتار ءىس-شارادا كەلەسى جىلى استانادا ۇيىمداستىرىلاتىن V دۇنيەجۇزىلىك كوشپەندىلەر ويىندارىنىڭ دايىندىق بارىسى تالقىلاندى.

ءتول سپورتىمىزدى دارىپتەۋگە ارنالعان باسقوسۋعا ۇلتتىق جانە ات سپورتى ورتالىعىنىڭ ديرەكتورى باقداۋلەت ءسابيتوۆ، ۇلتتىق سپورت قاۋىمداستىعىنىڭ وكىلدەرى، ۇلتتىق سپورت فەدەراتسيالارىنىڭ پرەزيدەنتتەرى، وڭىرلىك سپورت باسقارمالارىنىڭ باسشىلارى، ايماقتارداعى ۇلتتىق سپورت مەكتەپتەرى مەن كلۋبتارىنىڭ باسشىلارى مەن «قازسپورتينۆەست» اق ماماندارى قاتىستى.

جيىندا ءسوز العان ەربول مىرزابوسىنوۆ ۇلتتىق سپورت – ۇلتتىق قۇندىلىعىمىزدىڭ، ۇلتتىق مادەنيەتىمىزدىڭ ءبىر بولىگى ەكەنىن ايتا كەلىپ، ۇلتتىق سپورت تۇرلەرىن ودان ءارى دامىتۋ جانە حالىقارالىق ارەناعا شىعارۋ باستى مىندەت ەكەنىن جەتكىزدى، دەپ حابارلادى تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى.

وسى باعىتتا ۇلتتىق سپورت تۇرلەرى فەدەراتسيالارىمەن بىرىگىپ، بىرقاتار ءىس-شارالار اتقارىلىپ جاتىر. بيىل ۇلتتىق سپورتتىڭ بىرنەشە تۇرىنەن الەم جانە ازيا چەمپيوناتتارى، الەم جانە ازيا كۋبوگى، دۇنيەجۇزىلىك جاۋىنگەرلىك ونەر ويىندارى سىندى ءىرى جارىستار بولدى. سپورتشىلاردىڭ ناتيجەسى جامان ەمەس. بىراق الدا تۇرعان مىندەت كوپ. بۇگىنگى تاڭدا سونىڭ ەڭ باستىسى – 2024 جىلعى V دۇنيەجۇزىلىك كوشپەندىلەر ويىندارىن ابىرويمەن وتكىزۋ.  جاقسى ناتيجەگە جەتكىزۋ ءۇشىن جاقسى دايىندىق كەرەك. بارشاڭىزدى الداعى كوشپەندىلەر ويىندارىن لايىقتى وتكىزۋگە اتسالىسۋعا شاقىرامىن، — دەدى ەربول مىرزابوسىنوۆ.

كۇن تارتىبىندە تۇرعان ۇلتتىق سپورت تۇرلەرىنەن رەسپۋبليكالىق فەدەراتسيالاردىڭ اتقارعان جۇمىستارى مەن العا قويعان جوسپارلارى، ەلىمىز بويىنشا ۇلتتىق سپورتتىڭ دامۋى، دۇنيەجۇزىلىك كوشپەندىلەر ويىندارىنا دايىندىق بارىسى، ۇلتتىق سپورت تۇرلەرىن دامىتۋ جانە ءار ءتۇرلى ماسەلەلەر بويىنشا فەدەراتسيا باسشىلارى، ۇلتتىق جانە ات سپورتى ورتالىعىنىڭ ديرەكتورى، «قازسپورتينۆەست» اق پرەزيدەنتىنىڭ ورىنباسارلارى بايانداما جاسادى. ءاربىر فەدەراتسيا اتقارعان جۇمىستارىنا ەسەپ بەرىپ، ۇلتتىق سپورتتىڭ الەۋەتىن ارتتىرۋ ماقساتىندا ۇسىنىستار ايتتى.

جيىن سوڭىندا ۇلتتىق سپورت تۇرلەرىنىڭ وزەكتى ماسەلەلەرى تالقىلانىپ، وڭ شەشىم تابۋ ءۇشىن بارلىق فەدەراتسيا بىرلەسە جۇمىس اتقارۋعا كەلىستى.