تاەكۆوندوشى جانسەل دەنيز گران-ءپريدىڭ فينالىنا شىقتى

2-3 جەلتوقسان ارالىعىندا ۇلىبريتانيانىڭ مانچەستەر قالاسىندا تاەكۆوندودان بيىلعى جىلعى گران-ءپريدىڭ فينالى بولادى، دەپ حابارلايدى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

بۇل باسەكەدە وليمپيادا باعدارلاماسىنا كىرەتىن 8 سالماقتا 38 مەملەكەتتەن جينالعان 128 تاڭداۋلى سپورتشى جۇلدەگە تالاسادى. ياعني، ءار سالماقتا 16 دايانگ شەبەرىنەن. باستىسى، مۇنداعى ۇپايلار پاريج ويىندارىنا بارۋ مۇمكىندىگىن جاقىنداتا تۇسەدى.

قازاقستان اتىنان مانچەستەرگە تەك ءبىر عانا تاەكۆوندوشى بارادى. ول – 67 كەلىدەن اسا سالماقتاعى جانسەل دەنيز. دجاكارتاداعى ازيادانىڭ كۇمىس، حانچجوۋداعى ويىنداردىڭ قولا جۇلدەگەرى قازىر وليمپيادالىق رەيتينگتە 14-ساتىدا تۇر. دەمەك، ۇلتتىق قۇراما وكىلى استانا قالاسىندا (2-4 جەلتوقسان) وتەتىن VI جازعى سپارتاكياداعا قاتىسا المايدى.

جانسەل بيىل باكۋدە وتكەن الەم چەمپيوناتىندا 73 كگ سالماقتا شيرەك فينالدا ءسۇرىنىپ (پولينا حان)، جۇلدەگە ءبىر تابان جەتپەي قالعان. بۇل سالماقتا الەم چەمپيونى التەيا لورين جالپى رەيتينگتىڭ كوشباسشىسى.

بۇدان بولەك، گران-ءپريدىڭ فينالىندا 2019 جىلعى الەم چەمپيونى، حانچجوۋداعى ازيادانىڭ چەمپيونى دجۋن چجان (وڭتۇستىك كورەيا، 58 كگ); توكيو وليمپياداسىنىڭ چەمپيونى پانيپاك ۆونگپاتتاناكيت (تايلاند، 49 كگ); توكيو وليمپياداسىنىڭ چەمپيونى ۇلىقبەك راشيتوۆ (وزبەكستان، 68 كگ); 2023 جىلعى الەم چەمپيونى سيمونە الەسسيو (يتاليا، 80 كگ); 2023 جىلعى الەم چەمپيونى شەيك ساللا سيسسە (كوت-د’يۆۋار، 80 كگ); 2023 جىلعى الەم چەمپيونى تسزۋنشي لو (قىتاي، 57 كگ) جانە ماگدا ۆيت ەنەن (فرانتسيا، 67 كگ).