جولباسشى جۇنىسباەۆ

نەساعاڭدى مەن 10 جاسىمنان بەرى بىلەدى ەكەنمىن. 1985 – 1988 جىلدارى باستاۋىش كلاستا وقىپ جۇرگەندە ءبىزدىڭ اۋىلداعى ۇيگە گازەت-جۋرنالدار كوپ كەلەتىن. مەنىڭ اتام – ومار كەنجالى ۇلى سول كەزدە اۋىلدىڭ پوچتالونى بولاتىن. ول كىسىنىڭ نەگىزگى ماماندىعى زووۆەتەرينار بولاتىن. اتامنىڭ ءوزى دە اۋداندىق گازەتكە ماتەريال جازىپ تۇراتىن. ال اكەم جۇمابەك ومار ۇلى كەنجالين دە جۋرناليست، پۋبليتسيست، قازىرگى تىلمەن ايتساق مەديامەنەدجەر بولدى.

1980-جىلداردىڭ ورتاسىندا ءبىز ويىن بالاسى بولعاننان كەيىن گازەت-جۋرنالداردى وقىماساق تا سۋرەتتەرىنە قىزىعا قاراۋشى ەدىك. سول كەزدە مەن ءبىرىنشى رەت مارادونانىڭ سۋرەتىن كورگەن ەدىم. ودان باسقا اقش-تان سوۆەت وداعىنا كەلگەن سامانتا سميت پەن قۇقىق قورعاۋشى انجەلا دەۆيس تۋرالى ماتەريالدار مەن سولاردىڭ سۋرەتتەرى كوپ بەرىلەتىن. ال، نەساعاڭدى مەن سول كەزدە وقىماسام دا سۋرەتىن ءسال كەيىنىرەك، 1988 جىلى الماتىعا بارعاندا ۇيدەگى «مەكسيكاداعى فۋتبول تويى» دەگەن كىتاپتان كوردىم. بۇل كىتاپ قازىر دە ءبىزدىڭ ۇيدە تۇر. ءوزىم كىشكەنتاي كەزىمنەن فۋتبولدى جاقسى كورىپ، دوپ تەۋىپ وسكەندىكتەن بە وسى كىتاپتى وزىمە جاقىن تارتتىم. كىتاپتى اشىپ، پاراقتاپ قاراسام، 1986 جىلى مەكسيكادا وتكەن الەم چەمپيوناتى تۋرالى جازىلعان ەكەن. باسىندا نەساعاڭنىڭ كىتابىن كورگەن بەتتە وقىپ شىقتىم دەپ ايتا المايمىن. ونى كەيىنىرەك، ەسەيگەندە وقىپ، كىتاپپەن تولىعىمەن تانىسىپ شىقتىم. سونداعى سۋرەتتەرگە، ىشىندەگى فاكتىلەرگە قىزىقتىم. ءوزىمنىڭ بالا كەزىمنەن كۋميرىم بولعان مارادونا، سول كەزدەرى سوۆەت وداعى مەن كيەۆتىڭ «ديناموسىنىڭ» جاتتىقتىرۋشىسى قىزمەتىن بىرگە اتقارعان ۆالەري ۆاسيلەۆيچ لوبانوۆسكي مەن ونىڭ ويىنشىلارى تۋرالى ماتەريالداردى قىزىعا دا قۇنىعا وقىپ شىققانىم راس.

سودان بەرى تالاي جىلدار ءوتتى. مەكتەپتە، ۋنيۆەرسيتەتتە وقىپ جۇرگەندە نەساعاڭدى سىرتتاي ءبىلۋشى ەدىم. بىراق، جاقىن ارالاسىپ كورگەنىم جوق. سول كەزدە نەساعاڭنىڭ «لەنينشىل جاستان» كەيىن «سپورت» گازەتىندە ىستەگەندە قازاق سپورت جۋرناليستيكاسىنىڭ دامۋىنا كوپ ەڭبەك سىڭىرگەنىن بىلەمىن. 1990-جىلداردان بەرى «سپورت» گازەتىن باسقارعان كەزدە نەساعاڭنىڭ قاراماعىندا ىستەگەن جۋرناليستەردىڭ ءبارى جامان بولعان جوق. ءبارى دە جاقسى جۋرناليست بولىپ كەتتى. قازىر ولاردىڭ ءبارى ءوز ورىندارىن تاۋىپ، ءار سالادا ەڭبەك ەتىپ ءجۇر.

نەساعاڭمەن مەن العاش رەت 2000-جىلداردىڭ باسىندا كوزبە-كوز جۇزدەسىپ، سويلەستىم. سول كەزدە ول مەنىڭ «استانا اقشامى» گازەتىندە ىستەپ، ءار ءتۇرلى تاقىرىپتا جازىپ جۇرگەنىمدى بىلەدى ەكەن. وسىنى بايقاعان نەساعاڭ: «داستان، سەن ءار تاقىرىپقا بارا بەرمەي، وزىڭە جاقىن تاقىرىپتى جازسايشى. ماسەلەن، سپورت دەگەن جاقسى تاقىرىپ قوي. وسىدان باستامايسىڭ با؟»، دەپ ءوزىنىڭ جاناشىرلىق ويىن ايتىپ ەدى. سودان كەيىن نەساعاڭنىڭ ءسوزىن ەسكەرىپ، «استانا اقشامى» گازەتىنە باس رەداكتوردىڭ ورىنباسارلارى تالعات باتىرحان مەن عالىم قوجابەكوۆتىڭ سپورت تاقىرىبىنا بەرگەن تاپسىرمالارىن ورىنداپ، اي سايىن گازەتتە «سايىپقىران» سپورت بەتىن جۇرگىزە باستادىم. ال، 2004 جىلى «استانا اقشامىندا» سپورتتى جازىپ جۇرگەنىمىزدى ەسكەرگەن «ەگەمەن قازاقستاننىڭ» باسشىلىعى گازەتكە سپورت ءجۋرناليسى ەتىپ شاقىرتتى. شىنىن ايتۋ كەرەك، نەساعاڭنىڭ 2002 جىلى استانا تەمىرجول ۆوكزالىنىڭ جانىندا تۇرىپ، جازۋدى سپورتتان باستامايسىڭ با دەگەن سول ءسوزى مەنىڭ جۋرناليست بولىپ قالىپتاسۋىما كوپ اسەر ەتتى.

«ەگەمەنگە» كەلىپ، سپورتتى جازا باستادىم. سودان كەيىن 2011 جىلى سەيداحمەت بەردىقۇلوۆ اتىنداعى سىيلىقتىڭ لاۋرەاتى اتانىپ، استانا مەن الماتىدا وتكەن VII قىسقى ازيا ويىندارىنىڭ الاۋىن قوستاناي قالاسىنىڭ كوشەلەرىندە ۇستاپ ءجۇرۋ مۇمكىندىگىنە يە بولدىم. سول كەزدە نەساعاڭنىڭ: «سەن ءوزىڭدى كىشى ساناي بەرمە. سەن سەيداحمەت بەردىقۇلوۆتىڭ سىيلىعىن الۋعا ابدەن لايىقسىڭ»، دەگەن ءسوزى 20 جىلدان بەرى سپورت تاقىرىبىندا قالام تارتىپ جۇرگەن جۇمىسىما ۇلكەن باعا بولدى.

ازيا ويىندارىنان كەيىن نەساعاڭ مەملەكەتتىك تىلدە جانە ورىس تىلىندە شىعاتىن «Sport» پەن «سپورت» گازەتتەرىنىڭ تىزگىنىن قايتا ۇستاپ، قازىرگە دەيىن وسى باسىلىمداردىڭ ديرەكتورى-باس رەداكتورى قىزمەتىن اتقاردى.

جالپى، نەسىپ جۇنىسباەۆ اعامىزدىڭ سپورتقا، سپورت جۋرناليستيكاسىنا سىڭىرگەن ەڭبەگى تۋرالى كوپ ايتۋعا بولادى. ونىڭ قازاق جانە ورىس تىلىندە شىعارعان كىتاپتارىنىڭ ءوزى ءبىر توبە. ماسەلەن، ونىڭ ءار جىلدارى قىسقى جانە جازعى وليمپيا ويىندارى تۋرالى جازعان كىتاپتارى مەن سپورت تاقىرىبىنا ارناعان باسقا دا دۇنيەلەرى كوپشىلىكتىڭ ىستىق ىقىلاسىنا بولەنگەنىن بىلەمىز.

نەساعاڭ پۋبليتسيست، جازۋشى رەتىندە سپورتپەن عانا شەكتەلىپ قالعان جوق. ول مادەنيەت پەن ونەرىمىزگە دەگەن جاناشىرلىق سەزىمىن دە جەتكىزە الادى. مىسالى، ونىڭ الماتىداعى رەسپۋبليكالىق سارايدىڭ جاعدايى تۋرالى ماقالالار توپتاماسىن مادەنيەتىمىز بەن ونەرىمىزگە جاناشىرلىقپەن قاراپ، شىن كوڭىلىمەن جازعان ماتەريالى دەپ ايتا الامىز. ەندى نەساعاڭنىڭ سپورتتى دامىتۋعا سىڭىرگەن ەڭبەگىنە كەلسەك، ونىڭ ەگەمەندىگىمىزدىڭ ەلەڭ-الاڭىندا «نامىس» اتتى كىلەڭ قازاق بالالارىنان جاساقتالعان كوماندانى قۇرىپ، كوپتەگەن قارادومالاق بالالارىمىزعا ۇلكەن سپورتقا جول اشىپ بەرگەنىن بىلەمىز. ودان كەيىن گازەت باسشىسى رەتىندە «ءبىر اتانىڭ بالالارى فۋتبول وينايدى» دەگەن ميني-فۋتبولدان وتباسىلىق ءتۋرنيردى وتكىزىپ، باسقا دا كوپتەگەن باستامالاردى كوتەرىپ، ىسكەر ازامات ەكەنىن كورسەتتى. قازىر دە نەسىپ اعامىز سپورتقا قاتىستى يدەيالارىن، باستامالارىن ايتىپ، وزىنەن كەيىنگى جاستارعا ۇلگى-ونەگە كورسەتىپ ءجۇر. سول ءۇشىن سەيداعاڭدى سپورت جۋرناليستەرىنىڭ كوشباسشىسى دەسەك، نەساعاڭدى قازىرگى قولىنا قالام ۇستاعان ارىپتەستەرىمىزدىڭ جولباسشىسى دەپ ايتۋعا بولادى دەپ ويلايمىن.

10 جەلتوقسان — نەساعانىڭ تۋعان كۇنى! ەندەشە، جولباسشى اعامىزعا ارقاشان جولىڭىز اشىق، دەنىڭىزگە ساۋلىق، ءومىر جاسىڭىز ۇزاق، وتباسىڭىزعا باقىت تىلەي وتىرىپ، شىعارماشىلىعىڭىز جەمىستى، جۇمىسىڭىز تابىستى بولسىن دەگىمىز كەلەدى.

ەڭ ىزگى نيەتپەن، ىنىلىك ىلتيپاتپەن،

داستان كەنجالين،

سەيداحمەت بەردىقۇلوۆ اتىنداعى سىيلىقتىڭ لاۋرەاتى