الماتىدا فۋتبولدان «جىل باسى جاقسىلىق اكەلگەي» ءتۋرنيرى ءوتتى

بۇل تۋرنير جىل سايىن ۇيىمداستىرىلىپ، داستۇرگە اينالىپ كەلەدى. بەلگىلى سپورت ءجۋرناليسى اقىن ورداباي ۇلىنىڭ ۇيىمداستىرۋمەن سالاۋاتتى ءومىر سالتىن ۇستانۋدى دارىپتەيتىن تۋرنير بيىل دا جوعارى دارەجەدە ءوتتى.

تاكير  بالىقباەۆ باسقاراتىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ سپورت زالىندا وتكەن تۋرنيرگە پايعامبار جاسىنان اسقان قارتتار دا، مەكتەپ وقۋشىسى دا قاتىستى.

تارتىستى باسەكەدە  «سۇڭقار» كومانداسى مەن  الماتى قالالىق قۇتقارۋ قىزمەتىنىڭ ماماندارى فينالدىق باسەكەگە شىقتى.  قۇتقارۋ قىزمەتكەرلەرىنىڭ كومانداسىندا جاسى 67-گە كەلگەن اقساقال وينادى. جەتپىس جاستىڭ جەلكەسىنە جەتكەنىنە قاراماستان قاريانىڭ قيمىلى وتىزداعى جىگىتتەردەن ءبىر كەم ەمەس. ءتىپتى كەيدە الاڭدا دوپقا تارتىس كەزىندە جاستار قاريانىڭ شاپشاڭدىعىنا  ىلەسە دە الماي جاتتى.

1-ورىندى قۇتقارۋ قىزمەتىنىڭ  كومانداسى يەلەنسە، 2-ورىندى «سۇڭقار» فۋتبولشىلارى الدى. جۇلدەلى 3-ورىن «قارعالى» كومانداسىنا بۇيىردى.

ءتۋرنيردى ۇيىمداستىرۋشى اقىن ورداباي ۇلى جەڭىپاز كوماندا مەن جۇلدەگەرلەرگە كۋبوك تاپسىرىپ، جەكەلەگەن ويىنشىلاردى ارنايى سىيلىقپەن ماراپاتتادى.

جارىسقا قاتىسۋشى ارداگەر  ويىنشىلار، 30-50 جاس ارالىعىنداعى  جىگىت اعالارى بۇل ءتۋرنيردىڭ اياسىن كەڭەيتىپ، قالا دەڭگەيىندە وتكىزۋ كەرەكتىگىن ايتىپ جاتتى.

بۇل جايىندا اقىن ورداباەۆ بىلاي دەدى: «ەلىمىزدە بۇقارالىق سپورتتى دامىتۋ ءۇشىن، حالىقتىڭ سالاۋاتتى ءومىر سالتىنا بەيىمدەلۋى جولىندا مۇنداي تۋرنيرلەر وتە-موتە قاجەت. قاراڭىزشى، جەتپىسكە جاقىنداعان اعامىزدىڭ الا دوپتى قالاي شىرق ۇيرەتىنىن.  جاسى كەلدى ەكەن دەپ ۇلكەندەردى ىسىرا بەرمەۋ كەرەك. كەرىسىنشە، وسىنداي سپورتتىق مەرەكە ۇيىمداستىرساق جاستارعا ۇلكەن ۇلگى.  ءبىزدىڭ «جىل باسى جاقسىلىق اكەلگەي» دەگەن اتاۋمەن وتەتىن ءداستۇرلى ءتۋرنيرىمىزدىڭ كوزدەگەن مۇراتى دا وسى».

قۋانىش نۇردانبەك

 الماتى