«Shavkat aıaǵymdy aıamady»: Tompson Rahmonovpen jekpe-jek týraly aıtty

Jaqynda AQSh-tyń Las-Vegas qalasynda ótken UFC 296 týrnırinde Shavkat Rahmonovtan (18-0) jeńilgen amerıkalyq Stıven Tompson (17-7-1) jekpe-jektiń qalaı bolǵanyn aıtty.

Bul jekpe-jekte Rahmonov qylqyndyrý ádisimen qarsylasyn ýaqytynan buryn jeńgen bolatyn. Tompsonnyń aıtýynsha, jekpe-jek óte tartysty bolǵan. Alaıda ol aıqastyń ekinshi raýndta bitetinin oılamaǵan.

Shynymdy aıtaıyn, ekinshi raýndta Rahmonov jeńip ketedi dep oılaǵan joqpyn. Ne degenmen ol jeńdi. Bári jaqsy. Ýaıymdamańyzdar. Biz alǵa qaraı júre beremiz. Men jekpe-jekten keıin úıge jaraqatsyz oraldym. Tek Shavkatqa jasaǵan soqqym onyń denesine emes shyntaǵyna tıip aıaǵymdy syndyrǵan sııaqtymyn.

Qarsylasyńyzdyń shyntaǵyn teppeńiz. Bul úlken qatelik. Jalpy, Shavkat meniń aıaǵymdy aıaǵan joq. Iá, men aıaǵymdy syndyrdym. Biraq men qaıtadan daıyndalý úshin zalǵa oralamyn, — dedi ol óziniń YouTube arnasynda.

Sondaı-aq, ol barlyq jankúıerge qoldaý kórsetkeni úshin alǵys aıtty.

Árıne, bári men qalaǵandaı bolmady. Shavkattan jeńildim. Bul meniń qateligim. Degenmen adam alǵa qoıǵan maqsat-muratyna jetý úshin jospar quryp, alǵa júre berý kerek. Men óz josparyma berikpin, — dedi Tompson.

Bul jekpe-jek 17 jeltoqsanda bolǵan edi. Onda Shavkat Rahmonov MMA-da 18-shi kásipqoı jekpe-jegin ótkizip, al UFC-de altynshy ret oktagonǵa shyǵyp, jeńiske jetti.

Dastan KENJALIN,

ASTANA