بوكسشى ماحمۇد سابىرحان جىلدىڭ ۇزدىك سپورتشىسى اتاندى

استانادا تۋريزم جانە سپورت مينيسترلىگىنىڭ ۇيىمداستىرۋىمەن 2023 جىلدىڭ قورىتىندىسى بويىنشا «ۇزدىك» اتتى سپورتشىلاردى سالتاناتتى ماراپاتتاۋ ءىس-شاراسى ءوتتى. جىل سايىنعى ءداستۇرلى ءىس-شارادا ەل ابىرويىن اسقاقتاتىپ، جەڭىس تۇعىرىنان كورىنگەن سپورتشىلار، سپورت سالاسىنا ەلەۋلى ۇلەس قوسقان سالا ماماندارى 18 اتالىم بويىنشا ماراپاتتالادى، دەپ حابارلادى ۆەدومستۆو.

سالتاناتتى جيىنعا پارلامەنتتىڭ دەپۋتاتتارى، وليمپيادا چەمپيوندارى مەن جۇلدەگەرلەرى جانە بيىلعى الەم چەمپيوندارى مەن حالىقارالىق جارىستاردىڭ جەڭىمپازدارى مەن جۇلدەگەرلەرى، سپورت جۋرناليستەرى قاتىستى.

جيىندا ءسوز العان تۋريزم جانە سپورت ءمينيسترى ەرمەك مارجىقپاەۆ بيىل ەل سپورتى ءۇشىن ءساتتى جىل بولعانىن، سپورتشىلار حالىقارالىق ارەنالاردا جارقىن جەڭىستەرگە جەتىپ، ۇزدىك دەپ تانىلعان سپورتشىلاردى قۇتتىقتادى.

بۇگىن ءبىز بيىلعى جۇمىستارىمىزدى قورىتىندىلاۋ جانە ۇزدىك سپورتشىلاردى قۇرمەتتەۋ ءۇشىن ارنايى جينالىپ وتىرمىز. بيىل ەل سپورتىندا ايتۋلى جەڭىستەر از بولعان جوق. جالپى، سپورت سالاسى ەلىمىزدە قارقىندى دامىپ كەلەدى. سپورتتىڭ بارلىق ءتۇرى بويىنشا وتاندىق سپورتشىلار جانكۇيەرلەردى ءوز جەتىستىكتەرىمەن ءاردايىم قۋانتىپ ءجۇر. ۇلتتىق قۇراما سپورتشىلارى جىل باسىنان بەرى 1 400 حالىقارالىق جارىسقا قاتىسىپ، 864 مەدال جەڭىپ الدى. ونىڭ ىشىندە 291 التىن، 262 كۇمىس جانە 311 قولا مەدال بار. الەم چەمپيوناتتارىندا 68 التىن مەدال، ازيا چەمپيوناتتارىنىڭ 47 التىن جۇلدە، ازيا ويىندارى 10 التىن ولجالادى. مەملەكەت باسشىسى ەل تاۋەلسىزدىگى تاريحىندا العاش رەت ازيا ويىندارىنىڭ جۇلدەگەرلەرىن قابىلداپ، ماراپاتتاعانىن ەرەكشە اتاپ وتكىم كەلەدى، — دەدى ەرمەك مارجىقپاەۆ.

سونىمەن، مىنا سپورتشىلار مەن جاتتىقتىرۋشىلار، سپورت باسقارمالارى مەن فەدەراتسيالار جىل قورىتىندىسى بويىنشا «ۇزدىك» دەپ تانىلدى:

نۇركەن راحمانقۇل – «جىلدىڭ ۇزدىك اۋىل جاتتىقتىرۋشىسى»;

كەنجەعالي بەكقۇلوۆ – «اۋىلدىق جەردەگى ۇزدىك دەنە شىنىقتىرۋ جانە سپورت ادىسكەرى»;

راۋان قازەزوۆ – «اۋىلدىق جەردەگى ۇزدىك دەنە شىنىقتىرۋ جانە سپورت نۇسقاۋشىسى»;

بۇقار جىراۋ اۋدانىنىڭ دەنە شىنىقتىرۋ جانە سپورت ءبولىمى – «اۋداندىق ۇزدىك دەنە شىنىقتىرۋ جانە سپورت ءبولىمى»;

يسحار كۋرباەۆ – «جاس جانە جاسوسىپىرىمدەر قۇرامىنداعى سپورتشى»;

ۆيكتوريا ۆولكوۆا – «جىلدىڭ ۇزدىك بالالار جاتتىقتىرۋشىسى»;

ناتاليا سۋحاچەۆا – «دەنە شىنىقتىرۋ جانە سپورت سالاسىنداعى ۇزدىك مامان»;

بەرىك قونىسبەكوۆ – «ۇزدىك سپورت دارىگەرى»;

ءمولدىر جاڭبىرباي، ميلاد كاريمي، رۋسلان قۇربانوۆ –  «جىلدىڭ ۇزدىك ناتيجەلەرى»;

قازاقستاندىق سپورتتىق اتۋ فەدەراتسياسى – «جىلدىڭ ۇزدىك اككەرديتەلگەن سپورت فەدەراتسياسى»;

تيمۋر تۋرلوۆ – «جىلدىڭ ۇزدىك اككەرديتەلگەن سپورت فەدەراتسياسىنىڭ پرەزيدەنتى»;

ادىلەت بارمەنقۇلوۆ – «جىلدىڭ ۇزدىك سپورت مەنەدجەرى»;

مۇمكىندىگى شەكتەۋلى ادامدارعا ارنالعان ءۇمىت سپورت كلۋبى – «جىلدىڭ ۇزدىك سپورت ۇيىمى»;

الماتى قالاسى – «ۇزدىك سپورتتىق ءوڭىر»;

سەرگەي شابالين (رۋسلان قۇربانوۆتىڭ جاتتىقتىرۋشىسى) – «جىلدىڭ ۇزدىك جاتتىقتىرۋشىسى»;

ريزابەك ايتمۇحان – «سپورتتاعى ۇزدىك سەرپىن»;

ماحمۇد سابىرحان، ەربول حاميتوۆ – «جىلدىڭ ۇزدىك سپورتشىسى»;

سامات قاناعاتوۆ، جاندوس بۇسۇرمانوۆ، ەربول قايىروۆ – «ۇزدىك سپورت ءجۋرناليسى.