استانادا وليمپياداعا دايىندىق شتابى اشىلدى (فوتو، ۆيدەو)

استانادا تۋريزم جانە سپورت مينيسترلىگى جانىنان قىسقى جاسوسپىرىمدەر وليمپياداسى مەن جازعى وليمپيادا جانە پاراليمپييالىق ويىندارعا دايىندىق شتابى اشىلدى، دەپ حابارلادى ۆەدومستۆو.

بىلتىر 13 جەلتوقساندا تۋريزم جانە سپورت ءمينيسترىنىڭ سپورت ساراپشىلارىنىڭ قاتىسۋىمەن جاسوسپىرىمدەر وليمپياداسى مەن وليمپيالىق جانە پاراليمپيالىق ويىندارعا ۇلتتىق قۇراما كوماندالاردىڭ جۇمىسىن ۇيىمداستىرۋ بويىنشا شتاب قۇرۋ تۋرالى بۇيرىعى شىققان بولاتىن.

بۇل شتاب مەملەكەت باسشىسىنىڭ تاپسىرماسى بويىنشا تۋريزم جانە سپورت مينيسترلىگى، ۇلتتىق وليمپيادا كوميتەتى مەن سپورت فەدەراتسيالارىنىڭ بىرىگىپ جۇمىس ىستەۋى ءۇشىن قۇرىلدى. شتابتىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ. شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.

شتابتىڭ قۇرامىنا 6 ادام كىردى. ولار — ۇوك سپورت دەپارتامەنتىنىڭ ديرەكتورى ەلسيار قاناعاتوۆ، ۇوك باس حاتشىسىنىڭ ورىنباسارى سەرىك ساپيەۆ، تۋريزم جانە سپورت ءمينيسترىنىڭ قوعام جانە بۇقارالىق اقپارات قۇرالدارىمەن بايلانىس جونىندەگى كەڭەسشىسى دياس احمەتشارىپ، ۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكتسياسى» رمقك كوركەم گيمناستيكادان كوماندا باسشىسى ءاليا نۇرسافينا، تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكتسياسى» رمقك سپورتتىق ورمەلەۋدەن كوماندا باسشىسى نۇرسۇلتان الدوڭعاروۆ پەن «ۇلتتىق كونكيشىلەر فەدەراتسياسى» رەسپۋبليكالىق قوعامدىق بىرلەستىگىنىڭ سپورتتىق ديرەكتورى بەكتۇر قياتباي.

ءىس-شاراعا وليمپيادا چەمپيوندارى مەن جۇلدەگەرلەرى جانە بيىلعى الەم چەمپيوندارى، حالىقارالىق جارىستاردىڭ جەڭىمپازدارى مەن جۇلدەگەرى، سپورت جۋرناليستەرى قاتىستى.

جيىندا ءسوز العان تۋريزم جانە سپورت ءمينيسترى ەرمەك مارجىقپاەۆ بىلتىرعى جىل ەل سپورتى ءۇشىن ءساتتى جىل بولعانىن، وتانداستارىمىزدىڭ حالىقارالىق ارەنالاردا جارقىن جەڭىستەرگە جەتكەنىنە ەرەكشە توقتالىپ، بيىلعى جىلعى دۇرمەكتى دودالارعا دايىندىق بارىسىن باياندادى.

بىلتىر ەلىمىزدە وتەتىن V دۇنيەجۇزىلىك كوشپەندىلەر ويىندارىنا اۋقىمدى دايىندىق باستالدى. مەملەكەت باسشىسى بىرەر كۇن بۇرىن Egemen Qazaqstan گازەتىنە سۇحباتىندا «دۇنيەجۇزىلىك كوشپەندىلەر ويىنىن وتكىزۋ دە ەلىمىز ءۇشىن ايتۋلى وقيعا بولاتىنىن ايتتى. «بايراقتى باسەكە ۇلتتىق سپورت پەن سالاماتتى ءومىر سالتىن دارىپتەۋ جاعىنان دا، ۇلى دالاداعى كوشپەندىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋ تۇرعىسىنان دا ماڭىزدى ەكەنى ءسوزسىز»، — دەپ اتاپ ءوتتى .

بۇگىن ءبىز مەملەكەت باسشىسىنىڭ كانۆون-2024 قىسقى جاسوسپىرىمدەر وليمپياداسىنا، پاريجدەگى جازعى وليمپيادا مەن پاراليمپياداعا دايىندىق جونىندەگى تاپسىرماسىن ورىنداۋ ماقساتىندا قۇرىلعان شتابتىڭ ءبىرىنشى وتىرىسىنا جينالدىق. ۇلتتىق قۇرامانىڭ ساپالى دايىندىعى ءۇشىن سپورتشىلار پۋلى، ياعني ليتسەنزيا مەن مەدال جەڭىپ الۋى مۇمكىن ۇمىتكەرلەر جاساقتالدى. قۇرامانىڭ كەيبىر كوشباسشىلارى وليمپياداعا جەكە جوسپار بويىنشا دايىندالادى. ياعني، ءار سپورت ءتۇرىنىڭ ەرەكشەلىگىن، سپورتشىنىڭ قاجەتتىلىگىن، فيزيوتەراپيانى، جاراقاتتاردى وڭالتۋ مەن الدىن الۋدى، پسيحولوگيالىق قولداۋدى جانە سپورتشىلاردى جارىسقا دايىندالۋدا سترەسستى باسقارۋعا كومەكتەسۋدى قوسا العاندا، مەديتسينالىق-بيولوگيالىق قامتاماسىز ەتۋدى ەسكەرە وتىرىپ جاسالادى. ايتا كەتۋ كەرەك، سپورتشىلاردى دايارلاۋ كۇنتىزبەسىن قالىپتاستىرۋ تاسىلدەرى مەن قاعيداتتارى تولىعىمەن قايتا قارالدى، — دەدى ەرمەك مارجىقپاەۆ.

ەسكە سالا كەتسەك، IV قىسقى جاسوسپىرىمدەر وليمپياداسى 19 قاڭتار مەن 1 اقپان ارالىعىندا وڭتۇستىك كورەيانىڭ كانۆون قالاسىندا وتەدى. ال فرانتسيانىڭ پاريج قالاسىندا XXXIII جازعى وليمپيادا ويىندارى 26 شىلدە مەن 11 تامىزى ارالىعىندا بولسا، ءحVىى جازعى پاراليمپيالىق ويىندار جالاۋىن 28 تامىز  8 قىركۇيەكتىڭ ارالىعىندا جەلبىرەتەدى.