100 فۋتبول مەنەدجەرى العاش رەت كاسىبي ءبىلىم الىپ شىقتى

ەلىمىزدە العاش رەت Alma Almaty management university مەن قازاقستان فۋتبول فەدەراتسياسىنىڭ (قفف) ۇيىمداستىرۋىمەن «فۋتبول مەنەدجمەنتى» باعدارلاماسى بويىنشا 100 ادام كاسىبي ءبىلىم الىپ شىقتى.

بۇل وقۋلار بىلتىر جازدا باستالدى. قازىر وقۋدى اياقتاعان ادامدار ناعىز مامان بولىپ، فۋتبول كلۋبتارىمەن جۇمىس ىستەۋگە كىرىسىپ كەتتى. ەندى الداعى ەكى جارىم جىلدا اتالعان باعدارلاما بويىنشا 3 مىڭ مەنەدجەردى دايىنداۋ جوسپارلانىپ وتىر.

بىلتىر جەلتوقسان ايىنان بەرى باعدارلامانى EA Group قولداي باستادى. سول كەزدەن باستاپ فۋتبول مەنەدجەرلەرىن دايىنداۋ ءۇشىن تاعى ءبىر كۋرس باستالدى. EA Group-تىڭ وكىلى ەرىك اۋباكىروۆتىڭ ايتۋىنشا، ءۇشىنشى لەكتە كۋرسقا قاتىسقان ادامدار 9 مودۋل بويىنشا ءبىلىم الدى. ولار ستراتەگيالىق مەنەدجمەنت، قارجى، وپەراتسيالىق مەنەدجمەنت، كوماندانى باسقارۋ (HR)، ينفراقۇرىلىمدى باسقارۋ، ءىس-شارالاردى ۇيىمداستىرۋ، سپورت اگەنتى، سپورت ماركەتينگى، دەمەۋشىلىك جانە جانكۇيەرلەرمەن بايلانىستى دامىتۋدى ۇيرەندى.  سونداي-اق، وقىتۋ كاسىپكەرلىك داعدىلاردى دا دامىتۋعا ارنالدى.

«فۋتبول مەنەدجمەنتى» كۋرسى فۋتبول يندۋسترياسىنداعى بولاشاق كوشباسشىلاردى دايىندايتىن پلاتفورما. باعدارلامادا 9 مودۋل بار. مەن بۇرىنعى فۋتبولشى ءارى كاسىپكەر رەتىندە سپورت كلۋبتارىن كاسىبي تۇردە باسقارۋ دا ماڭىزدى ەكەنىن ءتۇسىندىم. ءبىزدىڭ ماقساتىمىز – فۋتبول كلۋبتارى مەن الاڭدارىن دامىتىپ، جۇيەلى تۇردە قولداۋ. AlmaU-مەن ارىپتەستىك ورناتىپ، فۋتبولدى بىرگە دامىتامىز دەگەن ويدامىن، — دەدى CEO EA Group ەرىك اۋباكىروۆ.

قفف پرەزيدەنتى ادىلەت بارمەنقۇلوۆ تا  فۋتبول يندۋسترياسىن تۇراقتى دامىتۋدىڭ ماڭىزى زور ەكەنىن ايتتى. ونىڭ پىكىرىنشە، فۋتبول ۇيىمدارىن ءتيىمدى باسقارۋدا بىلىكتى مەنەدجەرلەر ماڭىزدى رول وينايدى. سوندىقتان، مىقتى فۋتبول ەكوجۇيەسىن قۇرۋ ءۇشىن بىلىكتى ماماندار قاجەت.

جالپى، قازاقستان فۋتبول فەدەراتسياسى مەن AlmaU سپورتتىق مەنەدجمەنت ورتالىعى 2022 جىلدان بەرى تىعىز بايلانىستا جۇمىس ىستەپ كەلەدى.  AlmaU سپورتتىق مەنەدجمەنت ورتالىعىنىڭ ديرەكتورى نۇرلىبەك سىزدىقوۆتىڭ ايتۋىنشا،  قفف-مەن بىرگە ءبىرتالاي شارۋا ىستەلىندى. ال «فۋتبول مەنەدجمەنتى» باعدارلاماسى بۇل فۋتبول مەنەدجەرلەرىن قالىپتاستىرۋعا باعىتتالعان ەلىمىزدەگى جالعىز ءبىلىم جوباسى.

ءبىز بارلىق وبلىستاردى سپورت پەن ءبىلىمدى ۇشتاستىرىپ، جۇمىس ىستەۋگە شاقىرامىز. بىزدەن 16 مەن 55 جاس ارالىعىنداعى ازاماتتار ءبىلىم الىپ كەلەدى. نەگىزىنەن ەر ادامدار. ولار كاسىبي ءبىلىم الىپ، فۋتبول كلۋبتارىندا جۇمىس ىستەيتىن بولادى، — دەدى ول.

سونىمەن بىرگە ونىڭ پىكىرىنشە، «فۋتبول مەنەدجمەنتى» باعدارلاماسىنىڭ تۇلەكتەرى وقۋ اياقتالعان سوڭ قفف-دان نەمەسە وزگە دە فۋتبول كلۋبتارىندا تاعىلىمدامادان ءوتىپ، ءوز بىلىمدەرىن شىڭداي الادى. قازىر وسى باعدارلاما تۇلەكتەرى جاقسى قىرلارىنان تانىلىپ، فۋتبول كلۋبتارىنا قىزمەتكە ورنالاسىپ، يندۋستريادا جاقسى ناتيجە كورسەتۋدە.

وعان مىسال رەتىندە سايات اۋعاليەۆتى ايتۋعا بولادى. ول وقۋ كەزىندە قاراعاندىنىڭ «شاحتەر» كلۋبىندا تاعىلىمدامادان ءوتىپ، باعدارلاما اياقتالعان سوڭ كلۋبپەن كەلىسىمشارتقا وتىردى.

Alma Almaty management university

 الماتى