ەلىمىزگە رەسەي مەن قىتايدان كەلەتىن تۋريستەر كوبەيدى

ۇلتتىق ستاتيستيكا بيۋروسىنىڭ حابارلاۋىنشا، وتكەن جىلدىڭ قاڭتار مەن قىركۇيەك ايلارى ارالىعىندا ەلىمىزگە 834،9 مىڭ شەتەلدىك تۋريست ساياحاتتاعان. بۇل – 2022 جىلعى كورسەتكىشكە قاراعاندا 225 مىڭ ادامعا كوپ. ياعني، ءوسىم 2022 جىلدىڭ سايكەس كەزەڭىمەن سالىستىرعاندا 37%-عا ارتقان. 2022 جىلى ەلىمىزگە 609،8 مىڭ شەتەلدىك كەلگەن.

ستاتيستيكاعا قاراعاندا، ەلىمىزگە ساياحاتتايتىن شەتەلدىك تۋريستەر جىل ساناپ ارتىپ كەلەدى. ماسەلەن، قازاقستانعا جاقىن كورشىلەرىمىزدەن بولەك، مۇحيتتىڭ ارعى بەتىندەگى مەملەكەتتەردىڭ دە ساياحتاشىلارى كوپتەپ كەلە باستادى.

جىل سايىن شەتەلدىك تۋريستەردىڭ قازاقستانعا دەگەن قىزىعۋشىلىعى ارتا باستاعانىن بايقاپ وتىرمىز. ماسەلەن، 2022 جىلى ەلىمىزگە 900 مىڭنان اسا شەتەلدىك ساياحاتشى، ال وتكەن جىلدىڭ 9 ايىندا 800 مىڭنان اسا شەتەلدىك قوناق كەلگەن. بيىل بۇل كورسەتكىش بۇدان دا كوبەيە تۇسەدى دەگەن سەنىمدەمىز. ويتكەنى، ەلىمىزدە شەتەلدىكتەردى تاڭقالدىراتىن، سۇلۋلىعىمەن وزىنە تارتاتىن، كورسە كوز توياتىن كورىكتى جەرلەر، تابيعات سىي ەتىپ بەرگەن سۇلۋ مەكەندەر از ەمەس. سونىمەن قاتار مينيسترلىك بايتاق جەرىمىزگە تابانى تيگەن ءاربىر ساياحاتشىعا ۇمىتىلماس اسەر قالدىرۋ ءۇشىن جۇمىس ىستەپ جاتىر، — دەدى تۋريزم جانە سپورت ءمينيسترىنىڭ ورىنباسارى ەرجان ەركىنباەۆ.

ونىڭ ايتۋىنشا، 2023 جىلدىڭ العاشقى 9 ايىندا رەسەي فەدەراتسياسىنان ەڭ كوپ تۋريست كەلگەن. بىلتىرعى قاڭتار مەن قىركۇيەك ارالىعىندا قازاقستانعا 356 850 مىڭ رەسەيلىك ساياحاتتاعان. ەكىنشى ورىندا قىتاي تۋريستەرى تۇر. شىعىستاعى كورشىمىزدەن ەلىمىزگە 75 131 ادام كەلىپ كەتكەن. ال ءۇشىنشى ساتىعا تۇركيا تۋريستەرى تۇراقتادى. انادولى ەلىنەن 41 134 تۋريست كەلگەن. سونداي-اق، ۇزدىك بەستىكتىڭ قاتارىندا ءۇندىستان (34 757) جانە اقش (28 160) ساياحاتشىلارى بار.