اتاقتى فۋتبولشى فرانتس بەككەنباۋەر قايتىس بولدى (ۆيدەو)

گەرمانيانىڭ اتاقتى فۋتبولشىسى ءارى جاتتىقتىرۋشى، الەم چەمپيونى، ۇزدىك فۋتبولشىعا بەرىلەتىن «التىن دوپ» سىيلىعىن ەكى رەت العان  فرانتس بەككەنباۋەر 79 جاسقا قاراعان شاعىندا ومىردەن ءوتتى.

بەككەنباۋەردىڭ دەنساۋلىعىنىڭ ناشارلاپ كەتكەنى تۋرالى اقپارات بىلتىر جازدا شىعا باستاعان. قولدا بار مالىمەتكە قاراعاندا، 2015 جىلى ستەفان دەگەن ۇلى قايتىس بولعاننان كەيىن ەكس-فۋتبولشىنىڭ دەنساۋلىعى ناشارلاپ، جۇرەگىنە وپەراتسيا جاساتقان. ودان كەيىن كوز ينفاركتىسى بولىپ، پاركينسون اۋرۋى مەن دەمەنتسياعا دۋشار بولعان. سول كەزدەن بەرى ول ۇزاق ۋاقىت ەمدەلىپ، 7 قاڭتاردا ءوز ۇيىندە قايتىس بولدى.

بەككەنباۋەر العاش رەت جاسىل الاڭعا ميۋنحەننىڭ «باۆاريا» كلۋبىنىڭ جاستار كومانداسىنىڭ جەيدەسىندە شىققان. سودان كەيىن كلۋبتىڭ ەرەسەكتەر جاساعىندا ويناپ ەۋروپا چەمپيوندارىنىڭ كۋبوگىن ءۇش مارتە جەڭىپ العان. 1966  جىلى انگليادا وتكەن ادەم چەمپيوناتىنا قاتىسىپ، كۇمىس جۇلدەگەر بولعان.  1972 جىلى گەرمانيا قۇراماسىمەن بىرگە ەۋروپا چەمپيونى، 1974 جىلى الەم چەمپيونى اتانعان. 1976 جىلى ەۋروپانىڭ ۆيتسە-چەمپيونى اتاعىن العان.

اتاقتى فۋتبولشى الەم چەمپيوناتتارىندا ويىنشى رەتىندە، جاتتىقتىرۋشى بولىپ تا جەڭىسكە جەتكەن ءۇش فۋتبولشىنىڭ ءبىرى بولدى. ونىمەن بىرگە برازيليالىق ماريو زاگاللو مەن فرانتسۋز ديدە دەشام  الەمدىك دودالارعا ويىنشى بولىپ تا جاتتىقتىرۋشى بولىپ تا جەڭىسكە جەتكەن.

بەككەنباۋەر ۇلتتىق قۇرامادا ءبىرىنشى بولىپ 100-دەن اسا ويىنعا قاتىسقان. ول بارلىعى 103 ماتچتا الاڭعا شىعىپ، قورعاۋشى بولسا دا 14 گول سالعان. قورعاۋشى بولىپ تاريحتا «التىن دوپ» سىيلىعىن جەڭىپ العان العاشقى فۋتبولشى بولدى. 1972 جىلى الەمنىڭ ۇزدىك فۋتبولشىسى اتاندى. سودان كەيىن اقش-تىڭ «نيۋ-يورك كوسموس»، گەرمانيانىڭ «گامبۋرگ» كلۋبتارىندا ويناعان.

ەكس-فۋتبولشى «باۆاريا» ساپىندا گەرمانيا چەمپيوناتىن ءتورت رەت جەڭىپ الدى. ال جاتتىقتىرۋشى بولىپ، 1990 جىلى گەرمانيا قۇراماسىمەن بىرگە الەم چەمپيونى اتانعان. جانكۇيەرلەر ونى «كايزەر فرانتس» دەپ اتاعان.

ءوز تىلشىمىزدەن