Aýstralııada «Úlken dýlyǵa» týrnıri bastaldy

Búgin Aýstralııanyń Melbýrn qalasynda jyldyń alǵashqy «Úlken dýlyǵa» týrnıri – Aýstralııa ashyq chempıonaty bastaldy.

Qazaqstannyń birinshi, álemniń úshinshi raketkasy Elena Rybakınaǵa jerebe joldas bolmaı, alǵashqy aınalymda-aq qıyn qarsylas tústi, dep habarlady RRaketkasi.

Rybakına 31 jastaǵy chehııalyq tennısshi  Karolına Plıshkovamen oınaıdy. Bul sportshy álemdik reıtıngide 37-orynda turǵanymen, kezinde birinshi raketka atanǵan asa tájirıbeli oıynshy.

Chehııa tennıs mektebiniń myqty ekenin búkil álem biledi. Onyń ústine Plıshkova Elena Rybakına sııaqty dopty qatty beredi. Sondyqtan 16 qańtarǵa belgilengen ekeýiniń oıyny kópshiliktiń nazaryn aýdarary anyq.

Keıbir mamandardyń boljamyna qaraǵanda, chehııalyqpen shaıqasqa tyń kelýi úshin Rybakına osynyń aldyndaǵy Adelaıda WTA 500 týrnıriniń shırek fınalynda reseılik Ekaterına Aleksandrovamen kezdesýinde baryn sala qoımaǵan. Budan buryn Rybakına Plıshkovanyń úsh ret meselin qaıtarǵanymen, qaısysynyń dál qazirgi sátte sheberligi basym ekenin aldaǵy kezdesý kórsetedi, — delingen materıalda.

Rybakına bıyl da keminde fınalǵa deıin jetip, upaıdan shashaý shyǵarmaı, týrnırlik kestedegi jaǵdaıyn jaqsartýǵa bar kúshin salatyny sózsiz.

Esesine Qazaqstannyń ekinshi, álemniń 64-raketkasy Iýlııa Pýtınevanyń birinshi aınalymnan qınalmaı ótýine tolyq múmkindigi bar. Ol 15 qańtarda negizgi jarysqa irikteý saıystarynan keıin qosylǵan, reıtıngide 191-satydaǵy reseılik, 21 jastaǵy Anastasııa Zaharovamen oınaıdy. Eger sáttilik joldas bolyp, Iýlııa Pýtıneva joq jerden ashýlanbaı, sabyrly oınasa, qarsylasyn jeńe alady.

Qazaqstannyń erler arasynda birinshi, álemniń 31-raketkasy Aleksandr Býblık te irikteý saıysy jeńimpazdarynyń biri, reıtıngide 139-satydaǵy úndistandyq Sýmıt Nagalmen 16 qańtarda kortqa shyǵady. Nagal reıtıngide tómen turǵanymen, «Úlken dýlyǵa» jarysynda baryn salary sózsiz. Eger bári oıdaǵydaı bolsa, Býblık úshinshi aınalymda álemniń 2-raketkasy, Ispanııa juldyzy Karlos Alkaraspen júzdesýi múmkin, — delingen habarlamada.

Bul týrnırde Qazaqstannyń juptyq syndaǵy birinshi, álemniń 44-raketkasy Anna Danılına slovakııalyq Vıktorııa Grýnchakovamen, Pýtıneva kolýmbııalyq Kamıla Osorıomen dýet bolyp baq synaıdy. Al, Rybakına juptyq básekege qatyspaıdy.

Qazaqstannyń erler arasynda juptyq syndaǵy birinshi, álemniń 46-raketkasy Aleksandr Nedovesov birazdan beri seriktes bolyp, bir-birine úırenip qalǵan ekvadorlyq Gonsalo Eskobarmen birge dodaǵa túsedi. Al Býblık juptyq synda serbııalyq Dýshan Laıovıchpen dýet qurdy. Andreı Golýbev jaraqatyna baılanysty Aýstralııa chempıonatynan tys qaldy.