قازاقستان سپورتشىلارى وليمپياداعا اتتاندى (ۆيدەو)

استانادا IV قىسقى جاسوسپىرىمدەر وليمپياداسىنا سپورتشىلاردى سالتاناتتى تۇردە شىعارىپ سالۋ ءراسىمى ءوتتى. ءتورت جىلدىقتىڭ باستى جارىسى 19 قاڭتار مەن 1 اقپان ارالىعىندا وڭتۇستىك كورەيانىڭ كانۆون پروۆينتسياسىنىڭ كاننىن قالاسىندا بولادى، دەپ حابارلادى تۋريزم جانە سپورت مينيسترلىگى.

سالتاناتتى ءىس-شاراعا تۋريزم جانە سپورت ءمينيسترى ەرمەك مارجىقپاەۆ، ۇلتتىق وليمپيادا كوميتەتىنىڭ وكىلدەرى، سپورت ارداگەرلەرى، فەدەراتسيا باسشىلارى مەن مەملەكەتتىك جاتتىقتىرۋشىلار قاتىستى.

ءىس-شارادا جاسوسپىرىمدەر وليمپياداسىنىڭ اشىلۋ راسىمىندە تۋ ۇستايتىن سپورتشىلارعا قازاقستان رەسپۋبليكاسىنىڭ تۋى سالتاناتتى تۇردە تاپسىرىلدى. IV قىسقى وليمپيادانىڭ اشىلۋ سالتاناتىندا ەلىمىزدىڭ بايراعىن شورت-ترەكتەن ەل چەمپيونى، سپورت شەبەرىنە ۇمىتكەر ەراسىل شىڭعىسحان مەن كونكيمەن جۇگىرۋ سپورتىنان سپورت شەبەرى، سونداي-اق ەل بىرىنشىلىگىنىڭ جەڭىمپازى كريستينا شۋمەكوۆا الىپ شىعادى. ءوز كەزەگىندە ەراسىل شىڭعىسحان تۋ ۇستاۋشى رەتىندە كوپشىلىكتىڭ الدىنا شىعىپ، سالتاناتتى تۇردە انت بەردى.

جاسوسپىرىمدەر وليمپياداسىندا قازاقستان قۇراماسى سپورتتىڭ بەس تۇرىنەن باق سىناپ، 55 مەدال جيىنتىعىن ساراپقا سالادى. قىسقى ويىنداردا ەل نامىسىن 42 سپورتشى بياتلون، كەرلينگ، كونكيمەن جۇگىرۋ، شورت-ترەك، شاڭعى جارىسى، ترامپليننەن سەكىرۋ، تاۋ شاڭعىسى، شاڭعى قوسسايىسى، فريستايل موگۋل جانە شايبالى حوككەي سپورت تۇرلەرىنەن قورعايدى.

سالتاناتتى جيىندا ەرمەك مارجىقپاەۆ ءسوز سويلەپ، سپورتشىلارعا ساتتىلىك تىلەدى.

قازاقستان سپورتشىلارى تاۋەلسىزدىك جىلدارىندا بارلىق جاسوسپىرىمدەر وليمپياداسىندا 29 مەدال جەڭىپ الدى. ونىڭ بەسەۋى قىسقى ويىندارعا تيەسىلى. ەلىمىزدە قىسقى سپورت تۇرلەرىندە جەڭىسپەن ورىلگەن جاقسى ءداستۇر بار. بۇگىندە تەك ەلىمىزگە عانا ەمەس، بۇكىل الەمگە تانىمال داڭقتى سپورتشىلارىمىز حالىقارالىق قىسقى جارىستاردا ونەر كورسەتىپ، ۇنەمى جۇلدەگەرلەر قاتارىنان كورىنىپ ءجۇردى. ولاردىڭ قاتارىندا شاڭعىشى ۆلاديمير سميرنوۆ، كونكيمەن جۇگىرۋشى ليۋدميلا پروكاشەۆا، بياتلونشى ەلەنا حرۋستالەۆا، مانەرلەپ سىرعاناۋشىلار دەنيس تەن مەن ەليزاۆەتا تۇرسىنباەۆا بار. سىزدەر بۇل ويىندارعا قاتىسا وتىرىپ، زور تاجىريبە جينايسىزدار. وسى قۇندى تاجىريبە بولاشاقتا پايدالى بولاتىنى ءسوزسىز. ويتكەنى، سىزدەر قازاقستان ۇلتتىق قۇراماسىنىڭ رەزەرۆى سانالاسىزدار. بۇگىن ءبىز ءداستۇرلى شىعارىپ سالۋ راسىمىنە قاتىسىپ وتىرمىز. سىزدەرگە الداعى جارىستا تەك ساتتىلىك تىلەيمىن! وسىعان دەيىن جيعان بار شەبەرلىكتەرىڭىزدى، قابىلەتتەرىڭىزدى پاش ەتىپ، جاقسى ناتيجە كورسەتۋلەرىڭىزگە جانە جەكە رەكوردتارىڭىزدى جاڭارتۋعا تىلەكتەسپىن! ءبىز سىزدەرگە جانكۇيەر بولىپ، جەڭىس تۇعىرىنان كورىنۋلەرىڭىزگە شىن نيەتپەن تىلەۋلەس بولامىز، — دەدى مينيستر.

جارىستىڭ اشىلۋ سالتاناتى 19 قاڭتاردا كاننىن قالاسىنداعى Gangneuung Oval سپورت كەشەنىندە وتەدى. بۇل نىساندا كونكيمەن جۇگىرۋ سپورتىنان جارىستار ۇيىمداستىرىلادى. ال وليمپيادانىڭ جابىلۋ سالتاناتى 1 اقپاندا كاننىنداعى Gangneung Olympic Park سپورت كەشەنىندە وتەدى دەپ جوسپارلانعان.

كانۆون-2024 ويىندارىنا 14 پەن 17 جاس ارالىعىنداعى الەمنىڭ 70 ەلىنەن 1800 سپورتشى قاتىسادى. مۇندا سپورتتىڭ 7 ءتۇرىنىڭ 15 باعدارلاماسى بويىنشا 81 مەدال جيىنتىعى ساراپقا سالىنادى.