وليمپيادا چەمپيونى سەرىك ساپيەۆ قاراعاندىداعى كولونياعا باردى

بوكستان وليمپيادا چەمپيونى سەرىك ساپيەۆ قاراعاندى كولونياسىنا بارىپ، سوتتالعاندارمەن كەزدەستى.

Polisia.kz-ءتىڭ حابارالۋىنشا، اتاقتى سپورتشى ءىىم قاجك «№ 29 مەكەمە» رمم-دە  قاتاڭ رەجيمدە جازاسىن وتەپ جاتقان سوتتالعاندارمەن اڭگىمەلەسىپ، ولاردىڭ سۇراقتارىنا جاۋاپ بەردى.  ودان كەيىن بوكسشى «ەڭبەك – قاراعاندى» رمك ونەركاسىپتىك ايماعىنا، تاماقتاناتىن ورىنعا جانە جاتاقحانا جاساقتارىنىڭ بىرىندە بولىپ، سوتتالعانداردىڭ تۇرمىس جاعدايىمەن تانىستى.

مەن مۇنداي شالعاي جەرگە ءبىرىنشى رەت كەلىپ تۇرمىن. بۇگىنگى جيىنعا بار نازارىن سالىپ، زەيىن قويعان ازاماتتارعا العىسىمدى بىلدىرەمىن، – دەدى سەرىك ساپيەۆ.

ساپيەۆ ءوزىنىڭ بالالىق شاعى تۋرالى، سپورتقا قالاي كەلگەنىن، كىمدى ۇلگى ەتكەنىن، ستۋدەنتتىك شاقتا قالاي وقىعانىن، العاشقى جەڭىسى تۋرالى، التىن جۇلدەنى جەڭىپ العان كەزدەگى  سەزىمى جايلى ايتىپ بەردى.

سىزدەر ومىردە قاتە جاساڭىزدار دا  ەلىمىزدىڭ تولىققاندى ازاماتى بولۋعا تيىسسىزدەر. ءبارىن تۇزەتىپ، قايتا باستاۋعا بولادى. ادام ءوز كۇشىنە عانا سەنىپ، ۇلكەن جەتىستىككە جەتە الادى. بالالارىڭىزعا لايىقتى اكە بولىپ، وتباسىنىڭ تىرەگى بولا الاسىزدار. ارتقا قاراماڭىزدار، تەك العا جۇرىڭىزدەر. جاقسىلىقتان ءۇمىت ۇزبەڭىزدەر! ءار ادامنىڭ بولاشاعى ءوز قولىندا، – دەدى ساپيەۆ.

كەزدەسۋدىڭ سوڭىندا وبلىستىق قاجد باستىعىنىڭ ورىنباسارى يگور بەندەرسكي مەن مەكەمە باستىعىنىڭ مىندەتىن اتقارۋشى بەكبولات بۋرلينوۆ قازاقستانعا ەڭبەك سىڭىرگەن سپورت شەبەرىنە جازاسىن وتەپ جاتقان ازاماتتارعا بولگەن ۋاقىتى ءۇشىن العىسىن ايتتى.

ودان كەيىن سوتتالعان ازاماتتاردىڭ ءبىرى سەرىك ساپيەۆتىڭ سۋرەتىن سالىپ، سىيعا تارتتى.

داستان كەنجالين،

استانا