ءبىز ءۇشىن ۇلكەن قۋانىش ءارى جاۋاپكەرشىلىك — دانيال احمەتوۆ

بۇگىن استاناداعى Qazaqstan جەڭىل اتلەتيكا كەشەنىندە World Athletics Indoor Tour Gold 2024 اياسىندا Astana Indoor Meet for Amin Tuyakov Prizes حالىقارالىق جەڭىل اتلەتيكا ءتۋرنيرى قارساڭىنداعى ءباسپاسوز جيىنى ءوتتى، دەپ حابارلادى جەڭىل اتلەتيكا فەدەراتسياسى.

جيىنعا جەڭىل اتلەتيكا فەدەراتسياسىنىڭ پرەزيدەنتى دانيال احمەتوۆ، دۇنيەجۇزىلىك جەڭىل اتلەتيكا وكىلى پيرس وكاللاحان، 2020 جىلعى وليمپيادا چەمپيونى جانە الەم رەكوردشىسى ارماند دۋپلانتيس، سونداي-اق جەڭىل اتلەتيكادان قازاقستان قۇراماسىنىڭ كوشباسشىسى نادەجدا دۋبوۆيتسكايا قاتىستى.

استانادا Astana Indoor Meet for Amin Tuyakov Prizes وتكىزىپ، وليمپيادا چەمپيوندارىن، الەم رەكوردشىلارى مەن ەڭ ۇزدىك سپورتشىلاردىڭ باسىن قوسۋ – ۇلكەن قۋانىش ءارى جاۋاپكەرشىلىك. ارينە، بۇل ستارت وتاندىق جەڭىل اتلەتيكا ءۇشىن عانا ەمەس، جالپى قازاقستان سپورتى ءۇشىن ۇلكەن وقيعا.

بۇل جارىسقا 45 ەلدەن 136 سپورتشى قاتىسادى. ونىڭ ىشىندە 4 وليمپيادا چەمپيونى، 10 الەم چەمپيونى، 3 ەۋروپا چەمپيونى، 1 ازيا چەمپيونى جانە 2 الەم رەكوردشىسى بار، — دەدى جەڭىل اتلەتيكا فەدەراتسياسىنىڭ پرەزيدەنتى.

سپيكەرلەر قازاقستانداعى جەڭىل اتلەتيكانىڭ دامۋ بولاشاعى جانە الداعى تۋرنيرگە دايىندىق تۋرالى سۇراقتارعا جاۋاپ بەردى.

ەسكە سالا كەتەيىك، التىن دەڭگەيلى كەزدەسۋلەر سەرياسى الەمنىڭ 7 قالاسىندا وتەدى. 27 قاڭتاردا استانادا باستالىپ، 23 اقپاندا مادريدتە اياقتالادى.

استانادا ايەلدەر اراسىنداعى جارىس 400 م، 60 م، 1 ميل، 60 م كەدەرگىلەر، بيىكتىككە سەكىرۋ، ۇزىندىققا سەكىرۋدەن بولادى.

ەرلەر 60 م، 60 م كەدەرگىلەرمەن جۇگىرۋ، 3 000 م، 400 م، سىرىقپەن سەكىرۋ، يادرو لاقتىرۋدان جارىسادى.