ابات ايىمبەتوۆ تۇركيانىڭ كلۋبىنا اۋىسۋى مۇمكىن

تۇركيانىڭ اقپارات قۇرالدارىنىڭ  حابارلاۋىنشا، «ادانا دەميرسپور» فۋتبول كلۋبى قازاقستان ۇلتتىق قۇراماسىنىڭ شابۋىلشىسىن ساتىپ الۋى مۇمكىن.

Telegram-داعى Sportqazaq ارناسىنىڭ مالىمەتىنە قاراعاندا، فۋتبولشى بۇگىن تۇندە تۇركياعا جولعا شىقتى. ول انادولى ەلىندە مەديتسينالىق تەكسەرىستەن ءوتىپ، كەلىسىمشارتقا قول قويۋى ىقتيمال.

تۇركيادا قىسقى ترانسفەر كەزەڭى 9 اقپاندا جابىلادى. سوندىقتان ەش قيىندىقسىز ۇلگەرۋگە بولادى، — دەلىنگەن حابارلامادا.

«اقتوبە» كلۋبىنىڭ باسشىلىعى دا ايىمبەتوۆتى كوماندا قاتارىندا كورگىسى كەلەدى. بىراق، فۋتبولشى بيىلعى ماۋسىمنان باستاپ شەتەلدە ويناعىسى كەلەدى ەكەن. سول ءۇشىن «استانا» كلۋبىمەن بىرىككەن اراب امىرلىكتەرىنە وقۋ-جاتتىعۋعا بارماپتى.

ەسكە سالساق، ابات ايىمبەتوۆ «اقتوبە» كلۋبىندا 2012-2019 جىلدارى ويناعان. ودان كەيىن ءبىر جىل الماتىنىڭ «قايرات» كومانداسىندا دوپ تەۋىپ، رەسەيدىڭ «كرىليا سوۆەتوۆ» جاساعىنىڭ جەيدەسىندە الاڭعا شىققان. ال 2021 جىلدان بەرى ول «استانا» كلۋبىنىڭ نامىسىن قورعاپ كەلەدى.