قازاقستان قۇراماسى ارمەنيامەن جولداستىق ماتچ وينايدى

قازاقستان فۋتبول فەدەراتسياسى مەن ارمەنيا فۋتبول فەدەراتسياسى جولداستىق ويىن وتكىزۋ تۋرالى كەلىسىمگە كەلدى.

ماتچ 7 ماۋسىمدا ەرەۆان قالاسىنداعى ۆازگەن ساركيسيان اتىنداعى رەسپۋبليكا ستاديونىندا بولادى.

بۇعان دەيىن ەكى ەلدىڭ قۇرامالارى جەتى رەت كەزدەسىپ، ارمەنيا ءتورت رەت، قازاقستان ەكى رەت جەڭىسكە جەتكەن بولاتىن. ءبىر ويىن تەڭ اياقتالدى.

فيفا رەيتينگىندە ارمەنيا قۇراماسى 93-ورىندا تۇر.

قازاقستان فۋتبول فەدەراتسياسىنان تاعى ءبىر جاڭالىق، باۋىرجان ساعىندىق 17 جاسقا دەيىنگى قازاقستان جاسوسپىرىمدەر قۇراماسىنىڭ اعا جاتتىقتىرۋشى قىزمەتىنە تاعايىندالدى.

ول ءوزى دە فۋتبول ويناعان.  «ەرتىس»، «ەنەرگەتيك-2»، «نامىس»، «استانا-1964» جانە «گەفەست» سەكىلدى كوماندالاردا ونەر كورسەتكەن.

جاتتىقتىرۋشى مانسابىن 2009 جىلى «ەرتىس» جاستار كومانداسىندا باستاعان. 2017-2018 جىلدارى «ەرتىس» فك جاستار فۋتبولىن دامىتۋ باعدارلاماسىنىڭ باسشىسى قىزمەتىن اتقاردى. سونداي-اق باۋىرجان ساعىندىق «جۇلدىز» جانە «اقسۋ» فۋتبول ورتالىقتارىندا جۇمىس ىستەدى.

2017-2018 جىلدارى قازاقستان U-20 قۇراماسىندا باپكەرلەر شتابىندا جۇمىس اتقارعان.

2022 جىلى باۋىرجان ساعىندىق «اقسۋ» فۋتبول كلۋبىنا جاتتىقتىرۋشىلار شتابىنا شاقىرتۋ الىپ، باس جاتتىقتىرۋشىنىڭ كومەكشىسى بولدى.

داستان كەنجالين،

استانا