Qazaqstan quramasy Armenııamen joldastyq match oınaıdy

Qazaqstan fýtbol federaııasy men Armenııa fýtbol federaııasy joldastyq oıyn ótkizý týraly kelisimge keldi.

Match 7 maýsymda Erevan qalasyndaǵy Vazgen Sarkısıan atyndaǵy Respýblıka stadıonynda bolady.

Buǵan deıin eki eldiń quramalary jeti ret kezdesip, Armenııa tórt ret, Qazaqstan eki ret jeńiske jetken bolatyn. Bir oıyn teń aıaqtaldy.

FIFA reıtınginde Armenııa quramasy 93-orynda tur.

Qazaqstan fýtbol federaııasynan taǵy bir jańalyq, Baýyrjan Saǵyndyq 17 jasqa deıingi Qazaqstan jasóspirimder quramasynyń aǵa jattyqtyrýshy qyzmetine taǵaıyndaldy.

Ol ózi de fýtbol oınaǵan.  «Ertis», «Energetık-2», «Namys», «Astana-1964» jáne «Gefest» sekildi komandalarda óner kórsetken.

Jattyqtyrýshy mansabyn 2009 jyly «Ertis» jastar komandasynda bastaǵan. 2017-2018 jyldary «Ertis» FK jastar fýtbolyn damytý baǵdarlamasynyń basshysy qyzmetin atqardy. Sondaı-aq Baýyrjan Saǵyndyq «Juldyz» jáne «Aqsý» fýtbol ortalyqtarynda jumys istedi.

2017-2018 jyldary Qazaqstan U-20 quramasynda bapkerler shtabynda jumys atqarǵan.

2022 jyly Baýyrjan Saǵyndyq «Aqsý» fýtbol klýbyna jattyqtyrýshylar shtabyna shaqyrtý alyp, bas jattyqtyrýshynyń kómekshisi boldy.

Dastan KENJALIN,

ASTANA