قازاق جاتتىقتىرۋشىلارى ۇلتتىق قۇراماعا نەگە كىرمەي كەلەدى؟

بىلتىر قىتايدىڭ حانچجوۋ قالاسىندا وتكەن جازعى ازيا ويىندارىندا دزيۋدودان ەلىمىزدىڭ تاتامي شەبەرلەرى 1 كۇمىس، 4 قولا مەدال الىپ بەردى. ونىڭ ءۇش قولا جۇلدەسىن دزيۋدودان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى قالەن قالي ۇلىنىڭ شاكىرتتەرى ماعجان شامشادين (60 كگ)، ابىلايحان جۇبانازار (81 كگ) مەن نۇرلىحان شارحان (100 كگ) العان ەدى. بىراق قىزىلوردالىق جاتتىقتىرۋشىنىڭ ەڭبەگى باعالانباي كەلەدى. باسشىلار فرانتسۋزداردى تورگە شىعارىپ، قازاق جاتتىقتىرۋشىلارى قالەن قالي ۇلى مەن مارات فايزيەۆتى قۇرامادان نەگە قۋدى ەكەن؟

جاقىندا فرانتسيا استاناسى — پاريجدە وتكەن گراند سلام تۋرنيرىندە وتانداسىمىز نۇرلىحان شارحان (100 كگ) قولا مەدال الىپ قۋانتتى. شارحاندى سايىسقا دايىنداعان قالەن قالي ۇلىنىڭ تريبۋنادا ايقايلاپ وتىرعان سۋرەتىن كوردىك. وندا نە ىستەپ وتىر؟ ول نۇرلىحان شارحاننىڭ جەكە جاتتىقتىرۋشىسى ەمەس پە؟ قاسىندا بولۋى كەرەك قوي…

شەتەلدەگى جارىستاردا سپورتشىلارىمىز نەگە جۇلدە المايدى دەسەك، جەكە باپكەرلەرى تريبۋنادا وتىرىپ شاكىرتىنىڭ بەلدەسكەنىن كورىپ قايتادى ەكەن. بىزدەر ولاردى جازامىز، جۇلدە المادى دەپ سىنايمىز.

جاتتىقتىرۋشىنىڭ جۇمىسى قيىن ءارى ايانىشتى ەكەن. باسە، اسحات جىتكەەۆ پەن ايبەك يماشەۆ نەگە جاتتىقتىرۋشىلىقتان كەتتى دەسەك… ءبىلىپ كەتكەن ەكەن عوي.

تاعى دا دزيۋدو سپورتى تۋرالى ايتساق، جازعى ازيا ويىندارىنىڭ جەڭىمپازى، ازيا چەمپيوناتىنىڭ قولا جۇلدەگەرى ديدار حامزا دەگەن تۇركىستاننىڭ تۋماسى بار. بارىمىزگە تانىس. بىلتىر كارەراسىن اياقتادى. بار بولعانى 26 جاستا. فرانتسۋزدار ەلگە كەلدى دە، ديدار دزيۋدودان كەتتى.

ديدار فرانتسۋزدارمەن سىيىسپاي كەتكەن. اكەسى دزدودان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى مارات فايزيەۆكە ۇلتتىق قۇراما كوماندادا ورىن جوق. ايتپەسە، بالاسى ديدار حامزا 91 كگ سالماقتا الەمدىك رەيتينگتە 35-ورىندا ەكەن. ءالى دە وعان جارىستارعا قاتىسىپ، ۇپاي جيناپ، پاريج وليمپياداسىندا باق سىناۋعا مۇمكىندىك بار ەدى. اكەسىن ۇلتتىق قۇرامادان، ۇلىن سپورتتان قۋعان كىم ەكەن؟ وسىدان كەيىن قازاق دزيۋدوسى قايدان داميدى؟ جالپى، بۇل ءبىز بىلمەيتىن بىلىقتاردىڭ شەتى عانا سياقتى.

قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆ دزيۋدودا نە بولىپ جاتقانىن بىلە مە ەكەن؟

جاۋاپ كۇتەمىز.

ايبەك مۇحانوۆ،

قازاقستان جۋرناليستەر وداعىنىڭ مۇشەسى

ماڭعىستاۋ وبلىسى

اقتاۋ قالاسى