قازاقستاننىڭ ازاماتتىعىن العان سپورتشى سەنساتسيا جاسادى

قازاقستاننىڭ ەكىنشى، الەمنىڭ 57-راكەتكاسى الەكساندر شەۆچەنكو نيدەرلاندتىڭ روتتەردام قالاسىندا ءوتىپ جاتقان ATP 500 ءتۋرنيرىنىڭ شيرەك فينالىنا شىقتى، دەپ حابارلادى قازاقستان تەننيس فەدەراتسياسى.

ول ەكىنشى اينالىمدا الەمنىڭ 7-راكەتكاسى، دانيالىق حولگەر رۋنەنى جەڭىپ، سەنساتسيا جاسادى.

ءبىرىنشى پارتيادا ەسەپ 4:4 بولعان كەزدە شەۆچەنكو برەيك جاساي الدى. وسىلايشا ءبىرىنشى سەتتە ەسەپ 6:4 بولىپ اياقتالدى.

ەكىنشى سەتتە رۋنە 6:1 ەسەبىمەن ەسە قايتاردى.

ءۇشىنشى، شەشۋشى پارتيادا شەۆچەنكو تاعى ءبىر برەيك جاساپ، ماتچتا 6:3 ەسەبىمەن جەڭىسكە جەتتى.

بۇل ويىن ءبىر جارىم ساعاتتان استام ۋاقىتقا سوزىلدى.

ەندى الەكساندر شەۆچەنكو جارتىلاي فينالعا شىعۋ ءۇشىن الەمنىڭ 13-راكەتكاسى، بولگاريالىق گريگور ديميتروۆپەن كەزدەسەدى.

ونىڭ الدىندا شەۆچەنكو قىتايلىق چجان چجيچجەنمەن كورتقا شىعىپ، ونى دا جەڭگەن بولاتىن.

شەۆچەنكو رەسەيدەن كەلگەن سپورتشى. ول بيىل قازاقستاننىڭ ازاماتتىعىن الدى.

تاعى ءبىر تەننيسشى دميتري پوپكو اقش-تاعى پالم-كوۋست ITF ءتۋرنيرىنىڭ شيرەك فينالىنا شىقتى.

جارىستىڭ ەكىنشى راكەتكاسى بولىپ تىركەلگەن تەننيسشى الدىمەن دۇنيەجۇزىلىك رەيتينگىدە 1 238-ورىندا تۇرعان امەريكالىق الەكساندەر رازەگيدى 6:4، 6:4 ەسەبىمەن جەڭدى.

پوپكو ەكىنشى اينالىمدا تاعى ءبىر امەريكالىق، رەيتينگىدە 781-ورىنداعى فەليكس كورۆيننەن ءدال سونداي ەسەپپەن ايلاسىن اسىردى.

دميتري پوپكو جارتىلاي فينالعا شىعۋ ءۇشىن الەمنىڭ 821-راكەتكاسى، اقش وكىلى اكسەل نەفۆەمەن كەزدەسەدى.

قازاقستان تەننيسشىسى ءبىر اپتا بۇرىن سانرايزداعى ءدال وسىنداي دودادا جەڭىمپاز اتانعان ەدى. سول كەزدە ول ا.نەفۆەنى 6:7 (9:11)، 7:5، 6:2 ەسەبىمەن جەڭگەن بولاتىن.

ميحايل كۋكۋشكين باحرەيننىڭ ماناما قالاسىندا ءوتىپ جاتقان  چەللەندجەر جارىسىنىڭ جارتىلاي فينالىنا شىقتى.

قازاقستان تەننيسشىسى شيرەك فينالدا الەمنىڭ 187-راكەتكاسى، يوردانيالىق ابەداللا شەلبايحپەن وينادى.

ەكى سەتتە دە 6:4، 6:4 ەسەبى تىركەلىپ، كۋكۋشكين جەڭىسكە جەتتى.

ميحايل كۋكۋشكين فينالعا شىعۋ ءۇشىن الەمنىڭ 129-راكەتكاسى، چەحيالىق ياكۋب مەنشيكپەن كەزدەسەدى.