رىباكينا دوحا تۋرنيرىنەن 308 320 دوللار سىياقى الدى

 قازاقستانىڭ ءبىرىنشى، الەمنىڭ ءتورتىنشى راكەتكاسى ەلەنا رىباكينانىڭ قاتاردىڭ دوحا قالاسىندا وتكەن Qatar Totalenergies Open WTA 1000 تۋرنيرىنەن تاپقان پايداسى بەلگىلى بولدى.

تەننيسشى فينالعا شىققانى ءۇشىن 308 320 اقش دوللارى س مەن 650 رەيتينگ ۇپايىن الدى.

ءتۋرنيردىڭ جەڭىمپازى پولشا سپورتشىسى يگا شۆەنتەك 523 485 دوللارعا يە بولسا، رەيتينگتەگى جاعدايىن 1000 ۇپايعا جاقسارتتى.

يگا شۆەنتەك — الەمنىڭ ءبىرىنشى راكەتكاسى.  ەكەۋى وسىعان دەيىن ءتورت رەت ويناپ، سونىڭ ۇشەۋىندە رىباكينا جەڭىسكە جەتكەن ەدى. ەندى تەننيسشىلەردىڭ ءوزارا ەسەبى 3:2 بولدى.

بۇل جولى دا رىباكينا بارىن سالىپ وينادى. ول ءبىرىنشى پارتيادا ەكى برەيك جاساپ، 4:1 ەسەبىمەن العا شىققان ەدى. الايدا شۆەنتەك ەسەپتى تەڭەستىرە الدى. رىباكينا تاعى ءبىر برەيك جاساپ، سەتكە دوپ بەرگەنىمەن، مۇمكىندىگىن پايدالانا المادى. سودان كەيىن تاي-برەيكتە 6:7 (8:10) ەسەبىمەن جەڭىلدى.

ەكىنشى سەتتە شۆەنتەك برەيكپەن العا شىقتى. ودان سوڭ ەسەپتى 5:2-گە جەتكىزدى. ەڭ سوڭىندا ماتچقا دوپ بەرگەندە، ءوز مۇمكىندىگىن جىبەرگەن جوق. ەسەپ  6:2 بولدى.

ماتچ 2 ساعات 15 مينۋتقا سوزىلدى.

رىباكينا 3 ەيسپەن بىرگە 10 برەيك-پوينتتىڭ ۇشەۋىن عانا پايدالاندى.

ەندى ەلەنا رىباكينا الداعى اپتادا دۋبايدا ءدال وسىنداي جارىستا باق سىنايتىن بولادى.

دۋباي WTA 1000 تۋرنيرىندە  رىباكينا جارىستى ەكىنشى اينالىمنان باستايدى

ول اۋەلى الەمنىڭ 31-راكەتكاسى، بەلارۋس وكىلى ۆيكتوريا ازارەنكو نەمەسە رەيتينگىدە 43-ورىنداعى نيدەرلاندتتىڭ وكىلى  ارانچا رۋستىڭ اراسىنداعى ويىننىڭ جەڭىمپازىمەن كەزدەسەدى.

تاعى ءبىر الەمنىڭ 76-راكەتكاسى يۋليا پۋتينتسەۆا نەگىزگى تۋرنيرگە وتە المادى. ول ىرىكتەۋ سايىستارىنىڭ فينالىندا تارتىستى باسەكەدە الەمنىڭ 52-راكەتكاسى، پولشا وكىلى ماگدالەنا فرەشكە 3:6، 6:3، 4:6 ەسەبىمەن جەڭىلىپ قالدى.

سونداي-اق ەرلەر اراسىندا الەمنىڭ 189-راكەتكاسى بەيبىت جۇقاەۆ دوحا ATP 250 دوداسىنىڭ ىرىكتەۋ سايىسىندا ءسۇرىندى. ول الەمنىڭ 140-راكەتكاسى، سلوۆاكيالىق لۋكاش كلەينگە 4:6، 3:6 ەسەبىمەن ەسە جىبەردى. ال ميحايل كۋكۋشكين جارادى. تەننيسشى باحرەيننىڭ ماناما قالاسىندا وتكەن چەللەندجەر ءتۋرنيرىنىڭ جەڭىمپازى اتاندى.

ول فينالدا الەمنىڭ 130-راكەتكاسى، فرانتسيالىق ريشار گاسكەمەن باس جۇلدەنى ساراپقا سالدى.

كۋكۋشكين ءبىرىنشى پارتيادا تاي-برەيكتە قارسىلاسىنان 7:6 (7:5) ەسەبىمەن باسىم ءتۇستى. سودان كەيىن ەكىنشى سەتتە 6:4 ەسەبىمەن جەڭدى.

ميحايل كۋكۋشكين وسى تابىسىنىڭ ارقاسىندا ATP Live رەيتينگىندە بىردەن 162-ورىنعا كوتەرىلدى.

داستان كەنجالين،

استانا