مەن قارسىمىن!

بۇگىندە قازاقستاندا ۇكىمەت اۋىسقانى جونىندەگى اڭگىمە گۋ-گۋ تالقىلانىپ جاتسا، سونىمەن قاتار، «قر ۇلتتىق وليمپيادالىق كوميتەتىنە گەننادي گولوۆكين باسشى بوپ كەلەدى ەكەن» دەگەن الىپقاشپا ءسوز استاناداعى قارلى بورانداي ۇلىپ تۇر. بۇل اڭگىمەنى كىمنىڭ تاراتقانىن بىلمەيمىن، ەگەر راس بولسا، مەن وعان قارسىمىن!!!

گولوۆكيننىڭ سپورتتاعى تابىستارىن ءبىر ادامداي-اق بىلەمىن. ونىڭ سوناۋ 2004 جىلى افينا وليمپياداسىنىڭ فينالىندا شايقاسقانىن تۇبىندە وتىرىپ كورگەنمىن، ودان بولەك، اقش-تا نەبىر كەرەمەت جەكپە-جەكتەر وتكىزگەندە ءۇش رەت ءوز قارجىممەن ۇشىپ بارىپ، سول جەردەن ەلگە رەپورتاج جۇرگىزگەنمىن! بۇل — مەنىڭ گەنناديدى عالامات سپورتشى دەپ تانۋىمنىڭ بەلگىسى.

ۇمىتپاۋىمىز كەرەك: ەل ۇلتتىق وليمپيادالىق كوميتەتىنە باسشى سايلاۋ اسا جاۋاپتى مەملەكەتتىك شارۋا. ارينە، ول — قوعامدىق ۇيىم، بىراق ءبىزدىڭ ەلدە بيلىكتىڭ ارالاسپايتىن جەرى جوق. ەگەر ءدال سولاي بوپ جاتپاسا، قازاقستاننىڭ ۇلتتىق وليمپيادالىق قۇراماسىن الەمنىڭ تۇكپىر-تۇكپىرىندە وتەتىن جارىستارعا باستاپ باراتىن جاندى مىڭ ويلانىپ، ءبىر-اق شەشۋ كەرەك. راس، سوڭعى جىلدارعا دەيىن گولوۆكين كاسىپقوي رينگتە جارقىلداپ كورىندى. ءبىز سول جارقىلعا الدانىپ وتىرمىز. ال وسىدان كوپ جىلدار بۇرىن ودان دا اسقان جارقىلدى كەرەمەت بالۋان داۋلەت تۇرلىحانوۆ كورسەتىپ ەدى عوي! گولوۆكين ءبىر وليمپيادانىڭ كۇمىس جۇلدەگەرى بولسا، داۋلەت ەكى وليمپيادانىڭ جۇلدەگەرى، ءۇشىنشى وليمپيادادا ءتورتىنشى ورىن العان ساڭلاق ەمەس پە؟! بۇگىنگى الەمدىك كۇرەس ونەرىندە داۋلەتتى قۇدايداي سىيلايتىن جان جەتەرلىك. ءوزى پارلامەنت دەپۋتاتى. ودان لايىقتى كىم بار؟

مەن ەشكىمنىڭ ۇلتىنا تيىسكەلى وتىرعان جوقپىن. مىسالى، داۋلەتتى الماساق، سيدنەي وليمپياداسىندا الماستاي جارقىراعان يسلام بايرامۋكوۆتى تاڭدايىق! ۇلكەن ازامات، ۇلتىمىزدىڭ تىلىندە تازا سويلەپ، ەلدەگى نەبىر ماڭىزدى ىستەردىڭ ورتاسىندا جۇرگەن قايراتكەر جىگىت!

بوكسشى كەرەك بولسا، لوندون وليمپياداسىنىڭ التىنىن موينىنا تاعىپ، وعان قوسا ۆەل باركەر كۋبوگىن الا كەلگەن سەرىك ساپيەۆ وتىر عوي سول كوميتەتتىڭ جاۋاپتى جۇمىسىندا. وسىنداي تاڭداۋلار تۇرعاندا سوناۋ امەريكاعا قونىس اۋدارىپ العان، ەلگە الىستان قول بۇلعاپ قانا جۇرگەن گولوۆكيندى شاقىرعانىمىزعا جول بولسىن. «بىرەۋ بىرەۋدىڭ مالىن ىسقىرىپ ءجۇرىپ ىزدەيدىنىڭ» كەرى كەلىپ جۇرمەسىن ءالى. گەنانىڭ قول باستاۋعا دەگەن تاجريبەسى دە جوق قوي. ال ۇوك ۇجىم باسقاراتىن جانعا تالانتتىڭ كەرەگى جوق دەپ كىم ايتتى؟!

مەن وسى ۇوك-ءتىن سوناۋ 1992 جىلى قۇرىسىپ، سونىڭ تۇڭعىش اتقارۋ كوميتەتىنە تۇڭعىش مۇشە بولعانداردىڭ ءبىرىمىن. بۇل ۇيىمنىڭ وتىمەن كىرىپ، ك ۇلىمەن شىقتىم دەسەم بولار. سوندىقتان دا بۇل ۇيىمدا قالايشا باعالاۋ كەرەگىن، مۇنداي مەملەكەتتىك ماڭىزى بار ىستە اسىعىستىق بولماۋى كەرەكتىگىن تۇسىنە وتىرىپ، ءتۇن جامىلىپ جازىپ وتىرمىن بۇل جازبامدى.

مەن ۇلتتىق وليمپيادالىق كوميتەتىنىڭ باسشىسى بولىپ، گەننادي گولوۆكيننىڭ كەلۋىنە قارسىمىن!!! مۇنى كوپشىلىك بولىپ ەل پرەزيدەنتىنە جەتكىزىپ، ەلدىك شەشىم شىعارۋعا كومەك سۇراۋ كەرەك دەپ ەسەپتەيمىن!!!

نەسىپ جۇنىسباي ۇلى،

سپورت ءجۋرناليسى، جازۋشى، سپورت قايراتكەرى