Men qarsymyn!

Búginde Qazaqstanda Úkimet aýysqany jónindegi áńgime gý-gý talqylanyp jatsa, sonymen qatar, «QR Ulttyq Olımpıadalyq komıtetine Gennadıı Golovkın basshy bop keledi eken» degen alypqashpa sóz Astanadaǵy qarly borandaı ulyp tur. Bul áńgimeni kimniń taratqanyn bilmeımin, eger ras bolsa, MEN OǴAN QARSYMYN!!!

Golovkınniń sporttaǵy tabystaryn bir adamdaı-aq bilemin. Onyń sonaý 2004 jyly Afına Olımpıadasynyń fınalynda shaıqasqanyn túbinde otyryp kórgenmin, odan bólek, AQSh-ta nebir keremet jekpe-jekter ótkizgende ÚSh RET óz qarjymmen ushyp baryp, sol jerden elge reportaj júrgizgenmin! Bul — meniń Gennadııdi ǵalamat sportshy dep tanýymnyń belgisi.

UMYTPAÝYMYZ KEREK: El Ulttyq Olımpıadalyq komıtetine basshy saılaý asa jaýapty MEMLEKETTIK sharýa. Árıne, ol — qoǵamdyq uıym, biraq bizdiń elde bıliktiń aralaspaıtyn jeri joq. Eger dál solaı bop jatpasa, Qazaqstannyń Ulttyq Olımpıadalyq quramasyn álemniń túkpir-túkpirinde ótetin jarystarǵa bastap baratyn jandy myń oılanyp, bir-aq sheshý kerek. Ras, sońǵy jyldarǵa deıin Golovkın kásipqoı rıngte jarqyldap kórindi. Biz sol jarqylǵa aldanyp otyrmyz. Al osydan kóp jyldar buryn odan da asqan jarqyldy keremet balýan Dáýlet TURLYHANOV kórsetip edi ǵoı! Golovkın bir Olımpıadanyń kúmis júldegeri bolsa, Dáýlet eki Olımpıadanyń júldegeri, úshinshi Olımpıadada tórtinshi oryn alǵan sańlaq emes pe?! Búgingi álemdik kúres ónerinde Dáýletti qudaıdaı syılaıtyn jan jeterlik. О́zi Parlament depýtaty. Odan laıyqty kim bar?

Men eshkimniń ultyna tıiskeli otyrǵan joqpyn. Mysaly, Dáýletti almasaq, Sıdneı Olımpıadasynda almastaı jarqyraǵan Islam BAIRAMÝKOVTY tańdaıyq! Úlken azamat, ultymyzdyń tilinde taza sóılep, eldegi nebir mańyzdy isterdiń ortasynda júrgen qaıratker jigit!

Boksshy kerek bolsa, London Olımpıadasynyń altynyn moınyna taǵyp, oǵan qosa Vel Barker Kýbogyn ala kelgen Serik SÁPIEV otyr ǵoı sol komıtettiń jaýapty jumysynda. Osyndaı tańdaýlar turǵanda sonaý Amerıkaǵa qonys aýdaryp alǵan, elge alystan qol bulǵap qana júrgen Golovkındi shaqyrǵanymyzǵa jol bolsyn. «Bireý bireýdiń malyn ysqyryp júrip izdeıdiniń» keri kelip júrmesin áli. Genanyń qol bastaýǵa degen tájrıbesi de joq qoı. Al UOK ujym basqaratyn janǵa talanttyń keregi joq dep kim aıtty?!

Men osy UOK-tin sonaý 1992 jyly qurysyp, sonyń tuńǵysh ATQARÝ KOMITETINE tuńǵysh múshe bolǵandardyń birimin. Bul uıymnyń otymen kirip, kúlimen shyqtym desem bolar. Sondyqtan da bul uıymda qalaısha baǵalaý keregin, mundaı memlekettik mańyzy bar iste asyǵystyq bolmaýy kerektigin túsine otyryp, tún jamylyp jazyp otyrmyn bul jazbamdy.

Men Ulttyq Olımpıadalyq komıtetiniń basshysy bolyp, Gennadıı Golovkınniń kelýine QARSYMYN!!! Muny kópshilik bolyp el PREZIDENTINE jetkizip, eldik sheshim shyǵarýǵa kómek suraý kerek dep esepteımin!!!

Nesip JÚNISBAIULY,

Sport jýrnalısi, jazýshy, sport qaıratkeri