قازاقستان سپورتشىلارى سۋردليمپياداعا قاتىسادى

2-12 ناۋرىزدا تۇركيانىڭ ەرزۋرۋم قالاسىندا XX قىسقى سۋردليمپيادا ويىندارى وتەدى.

ەستۋ قابىلەتى زاقىمدانعان سپورتشىلار اراسىندا ءتورت جىلدا ءبىر وتەتىن قىسقى ويىندارعا الەمنىڭ 36 مەملەكەتىنەن 1000-نان استام سپورتشى قاتىسادى.  بۇل جارىستا سپورتتىڭ 7 تۇرىنەن  38 مەدال جيىنتىعى ساراپقا سالىنادى. قازاقستان ۇلتتىق قۇراما كومانداسى سپورتتىڭ 3 تۇرىنەن كۇش سىناسادى. سۋرديمپياداعا 30 سپورتشى بارادى.

ۇلتتىق قۇراما سپورتشىلارىن بايراقتى دوداعا سالتاناتتى تۇردە شىعارىپ سالۋ ءراسىمى الماتى قالاسىندا 27 اقپاندا ساعات 14:00-دە «الماتى ارەنا» سپورت كەشەنىندە بولادى.

قازاقستان ۇلتتىق قۇراماسى العاش رەت قىسقى سۋردليمپيادا ويىندارىنا 2015 جىلى قاتىستى. ال، 2019 جىلى يتاليانىڭ سوندريو پروۆينتسياسىندا وتكەن ويىنداردا قازاقستان ءوزىنىڭ العاشقى التىن مەدالىن جەڭىپ، جەتىنشى ورىننان كورىندى.

ەستۋ قابىلەتى تومەن سپورتشىلار اراسىنداعى باسەكەگە 34 ەلدەن 506 سپورتشى قاتىستى. ولاردىڭ اراسىندا 377 ەر ادام، 129 ايەل سپورتشى جارىستى.

بۇل دوداعا قازاقستان اتىنان 40 سپورتشى شايبالى حوككەي، شاڭعىمەن جۇگىرۋ، سنوۋبورد، شاحمات سەكىلدى سپورت تۇرلەرىنەن سىنعا ءتۇستى.

جازعى سۋرديمپيادا ويىندارى 2022 جىلى جازعى سپورت تۇرلەرىنەن برازيليانىڭ كاشياس-دۋ-سۋل قالاسىندا جالاۋىن جەلبىرەتتى. وعان الەمنىڭ 73 ەلىنەن 4 500-گە جۋىق اتلەت قاتىسىپ، سپورتتىڭ 21 تۇرىنەن باق سىنادى.

سۋردليمپياداعا قازاقستان اتىنان 63 سپورتشى سپورتتىڭ ۇستەل تەننيسى، ءجۇزۋ، كاراتە-دو، تاەكۆاندو، دزيۋدو، جەڭىل اتلەتيكا، گرەك-ريم، ەركىن كۇرەس جانە بادمينتون تۇرىنەن ەل نامىسىن قورعاپ، 28 مەدالدى جەڭىپ الدى. قازاقستان قورجىنىنا 3 التىن، 7 كۇمىس جانە 18 قولا جۇلدە ءتۇستى.

2017 جىلى تۇركيانىڭ سامسۋن قالاسىندا وتكەن XXIII جازعى سۋردليمپيادادا قازاقستان 50-گە جۋىق سپورتشىسى سپورتتىڭ سەگىز تۇرىنەن (ەركىن كۇرەس، گرەك-ريم، دزيۋدو، تاەكۆوندو، كاراتە، ءجۇزۋ، جەڭىل اتلەتيكا، ۇستەل تەننيسى) ونەر كورسەتكەن بولاتىن. 1 التىن، 1 كۇمىس جانە 5 قولا مەدالدى جەڭىپ العان قازاقستان ۇلتتىق قۇراماسى جالپىكوماندالىق ەسەپتە 25-ورىنعا يە بولدى.

قۇرالاي ءاءشىمحانوۆا،

استانا