Qazaqstan sportshylary Sýrdlımpıadaǵa qatysady

2-12 naýryzda Túrkııanyń Erzýrým qalasynda XX qysqy Sýrdlımpıada oıyndary ótedi.

Estý qabileti zaqymdanǵan sportshylar arasynda tórt jylda bir ótetin qysqy oıyndarǵa álemniń 36 memleketinen 1000-nan astam sportshy qatysady.  Bul jarysta sporttyń 7 túrinen  38 medal jıyntyǵy sarapqa salynady. Qazaqstan ulttyq qurama komandasy sporttyń 3 túrinen kúsh synasady. Sýrdımpıadaǵa 30 sportshy barady.

Ulttyq qurama sportshylaryn baıraqty dodaǵa saltanatty túrde shyǵaryp salý rásimi Almaty qalasynda 27 aqpanda saǵat 14:00-de «Almaty arena» sport kesheninde bolady.

Qazaqstan ulttyq quramasy alǵash ret qysqy Sýrdlımpıada oıyndaryna 2015 jyly qatysty. Al, 2019 jyly Italııanyń Sondrıo provınııasynda ótken oıyndarda Qazaqstan óziniń alǵashqy altyn medalin jeńip, jetinshi orynnan kórindi.

Estý qabileti tómen sportshylar arasyndaǵy básekege 34 elden 506 sportshy qatysty. Olardyń arasynda 377 er adam, 129 áıel sportshy jarysty.

Bul dodaǵa Qazaqstan atynan 40 sportshy shaıbaly hokkeı, shańǵymen júgirý, snoýbord, shahmat sekildi sport túrlerinen synǵa tústi.

Jazǵy Sýrdımpıada oıyndary 2022 jyly jazǵy sport túrlerinen Brazılııanyń Kashıas-dý-Sýl qalasynda jalaýyn jelbiretti. Oǵan álemniń 73 elinen 4 500-ge jýyq atlet qatysyp, sporttyń 21 túrinen baq synady.

Sýrdlımpıadaǵa Qazaqstan atynan 63 sportshy sporttyń ústel tennısi, júzý, karate-do, taekvando, dzıýdo, jeńil atletıka, grek-rım, erkin kúres jáne badmınton túrinen el namysyn qorǵap, 28 medaldi jeńip aldy. Qazaqstan qorjynyna 3 altyn, 7 kúmis jáne 18 qola júlde tústi.

2017 jyly Túrkııanyń Samsýn qalasynda ótken XXIII jazǵy Sýrdlımpıadada Qazaqstan 50-ge jýyq sportshysy sporttyń segiz túrinen (erkin kúres, grek-rım, dzıýdo, taekvondo, karate, júzý, jeńil atletıka, ústel tennısi) óner kórsetken bolatyn. 1 altyn, 1 kúmis jáne 5 qola medaldi jeńip alǵan Qazaqstan ulttyq quramasy jalpykomandalyq esepte 25-orynǵa ıe boldy.

Quralaı ÁShIMHANOVA,

ASTANA