Qazaqstan tennısshileri J500 ITF Juniors týrnırin jeńip aldy

Tennısshi Asyljan Arystanbekova men Sonıa Jıenbaeva Mysyrda ótken J500 ITF Juniors týrnıriniń juptyq synda jeńimpazy atandy, dep habarlady Rraketkasi.

Taǵy eki tennısshimiz Aleksandr Nedovesov pen Dmıtrıı Popko ATP 250 men ITF týrnıriniń fınalyna shyqty.

Nedovesov Meksıkanyń Los-Kabos qalasynda ótip jatqan ATP 250 týrnırinde ekvadorlyq Gonsalo Eskobarmen birge jartylaı fınalda meksıkalyq Mıgel Anhel Reıes-Varela men argentınalyq Gvıdo Andreoımen synǵa tústi.

Birinshi partııada Nedovesov pen Eskobar eki breık jasap, 6:2 esebimen basym tústi.

Esesine ekinshi sette meksıkalyq tennısshi men argentınalyq sportshy dýeti 3:0 esebimen alǵa shyqty. Degenmen budan keıin ANedovesov pen Eskobar qatarynan alty geımdi jeńip, 6:3 esebimen ekinshi setti aıaqtady.

Endi olardyń fınaldaǵy qarsylastary keıin anyqtalady.

Dmıtrıı Popko AQSh-tyń  Naples qalasynda jalaýy kóterilgen ITF týrnıriniń fınalyna joldama aldy.

Ol jarystyń úshinshi raketkasy bolyp tirkelip,  jartylaı fınalda álemdik reıtıngide 442-orynda turǵan Domınıkan Respýblıkasynyń ókili Roberto Sıdpen kúsh synasty.

Birinshi partııada Popko 3:0 esebimen alǵa shyǵyp,  6:3 esebimen basym tústi. Ekinshi sette Sıd ese qaıtardy. Ol 6:4 esebimen jeńdi.

Úshinshi, sheshýshi partııa Dmıtrıı Popko birden breık jasady. Sodan keıin taǵy bir breıkpen esepti 5:1-ge jetkizdi. Osy esepti ustap turyp, matchty 6:2 esebimen aıaqtady.

Fınalda Dmıtrıı Popko reıtıngide 649-satyda turǵan ekvadorlyq Andres Andrademen kezdesedi.

Osymen Florıda shtatyndaǵy úshinshi týrnırde fınalǵa shyqqan tennısshi buǵan deıin eki ret jeńimpaz atanǵan edi. Sonyń ishinde 20 aqpanda Palm-Koýst qalasyndaǵy jarystyń fınalynda A.Andradeni 7:5, 1:6, 7:5 esebimen jeńgen bolatyn. Endi onymen ekinshi ret oınaıdy.

Taǵy bir jańalyq, 26 aqpan – 3 naýryz aralyǵynda Birikken Arab Ámirlikteriniń Dýbaı qalasynda ATP 500 sanatyndaǵy týrnır bolady.

Qazaqstannyń ekinshi, álemniń 45-raketkasy Aleksandr Shevchenkoǵa qıyn qarsylas tap boldy.

Shevchenko alǵashqy aınalymda álemniń tórtinshi, osy jarystyń 1-raketkasy, reseılik Danııl Medvedevpen kúsh synasady.

Bul reseılik tennısshiniń bıylǵy Aýstralııa ashyq chempıonatynyń fınalynan keıingi alǵashqy kezdesýi bolady.

Qazaqstannyń birinshi, álemniń 21-raketkasy Aleksandr Býblık irikteý saıysy jeńimpazdarynyń birimen kortqa shyǵady.