قازاقستان كوگالداعى حوككەيدەن ورتالىق ازيا چەمپيونى اتاندى (ۆيدەو)

26 اقپان مەن 3 ناۋرىز ارالىعىندا وزبەكستاننىڭ ءاندىجان قالاسىندا كوگالداعى حوككەيدەن ەرلەر مەن ايەلدەر اراسىنداعى ورتالىق ازيا ەلدەرىنىڭ چەمپيوناتى بولدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسى.

ازيا حوككەي فەدەراتسياسى (AHF) ۇيىمداستىرعان چەمپيوناتتا ەرلەر اراسىندا قازاقستان، قىرعىزستان، ومان، تاجىكستان، وزبەكستان كوماندالارى سىنعا ءتۇستى. ال ايەلدەر اراسىندا قازاقستان، ومان، تاجىكستان، وزبەكستان قۇرامالارى شىن مىقتىنى انىقتادى.

نۇرجان بەيبىتوۆ جاتتىقتىراتىن ەلىمىزدىڭ ايەلدەر قۇراماسى العاشقى ويىندا تاجىكستاندى 13:1 ەسەبىمەن ويسىراتا جەڭدى. ودان كەيىن وزبەكستان حوككەيشىلەرىمەن 1:1 ەسەبىمەن تەڭ ءتۇستى. ال  الاڭ يەلەرىمەن بولعان ەكىنشى ماتچتا ۇلتتىق قۇراما 2:1 ەسەبىمەن جەڭىپ، توپ جاردى. وسى ماتچتا قازاقستان قۇراماسى ساپىندا ۆيكتوريا لياپينا دۋبل جاسادى.

قازاقستان ەرلەر قۇراماسى قولا مەدال الدى. ال ورتالىق ازيا چەمپيونى اتاعىن وزبەكستان كومانداسى يەلەندى. الاڭ يەلەرى فينالدا تاجىكستاننان باسىم ءتۇستى.