SportPress.kz Qazaqstan sport jańalyqtary
Bokstan Italııanyń Býsto-Arsııo qalasynda jalaýyn kótergen lıenzııalyq týrnırde Qazaqstan boksshylarynyń aldy shırek fınalǵa shyǵyp úlgerdi.
Solardyń arasynda kópten beri halyqaralyq arenaǵa shyǵa almaı júrgen 92 keli salmaqtaǵy Aıbek Oralbaı aldyna kelgen qarsylastaryn qulatyp, shırek fınalǵa shyqty. Ol 1/8 fınalda álem chempıonatynyń kúmis júldegeri, tájirıbeli ekvadorlyq bylǵary qolǵap ıesi Hýlıo Kastılo Torresten aıqyn basymdylyǵyn tanytyp, 5:0 esebimen jendi.
Osy jekpe-jektik aldynda Oralbaı 1/16 fınalda Ońtústik Koreıa eliniń sportshysy Haneýl Jangpen kezdesip, qarsylastan qaraǵanda ózin jınaqy da jigerli, shymyr da shydamdy ekenin kórsetip, shapshań qımyldarymen soqqylardy dál tıgizip, tóreshiler tarapynan tıisti baǵasyn alyp, jeńiske jetti.
Endi Aıbek Oralbaıdyń kelesi qarsylasy AQSh-tyń talantty sportshysy Djamar Talleı bolady. Ekeýi búgin rıngke kóteriledi.
Aıbektiń syńary – Nurbek Oralbaı da týrnırdi jaqsy bastady. Lıenzııalyq týrnırde 80 kelide kúsh synasyp jatqan álem chempıony 1/16 fınalda Togo memleketiniń sportshysy Preva Padabadıdi 5:0 esebimen jeńdi.
Qara kúshtiń ıesi Preva Padabadı aýyr soqqylarǵa ıek artqanymen, tájirıbeli otandasymyz tehnıkalyq sheberligimen aılasyn asyryp ketti.
1/8 fınalda Nurbek Oralbaı 2021 jylǵy álem chempıonatynyń kúmis júldegeri Alekseı Alfıorovpen judyryqtasady.
Taǵy bir boksshymyz 57 kelidegi Mahmud Sabyrhannyń da aıaqalasy jaman emes. Ol da shırek fınalǵa alǵashqylardyń biri bolyp shyqty. Byltyr Tashkentte ótken álem chempıonatyn jeńip alǵan boksymyz bul joly da jolynan jyǵylmady. Sabyrhan Azııa chempıonatynyń kúmis júldegeri Sapavýt Sýkzetti 3:2 esebimen jeńip, ¼ fınalǵa joldamany qaltasyna basty.
Bul jekpe-jekte Sabyrhan aıla-tásilmen jeńdi dese bolady. Taıland boksshysy alǵashqy raýndta qolynyń uzyndyǵyn paıdalanyp, soqqylar jasaǵysy kelgenimen, oǵan Mahmud esh múmkindik bermedi. Sabyrhan qorǵanysqa kóńil bólip, jaqyn qashyqtyqta Sýkzetten aılasyn asyryp ketti.
Bul ekeýi rıngte birinshi ret kezdesken joq. Olar byltyr 22 jasqa deıingi Azııa chempıonatynyń fınalynda sharshy alańǵa shyqqanda Mahmud Sabyrhan jeńiske jetken edi.
71 kelide álem chempıony Aslanbek Shymbergenov te jankúıerlerin bir qýantyp tastady.
Komanda kapıtany 1/16 fınalda Tokıo Olımpıadasynyń qatysqan boksshy Damıan Dýrkachty (Polsha) 4:1 esebimen jeńdi.
Jeńis júrgen jerde jeńilistiń bolatyny jasyryn emes. О́kinishke qaraı, 63,5 kelidegi Muhammedsabyr Bazarbaıuly 1/16 fınalda Eýropa chempıony Radoslav Rosenovqa qarsy laıyqty judyryqtasqanymen, tóreshiler jeńisti Bolgarııa ókiline berdi. Sóıtip, ol erler arasynda jarysty aıaqtady. Ulty qyrǵyz boksymyz jarasty jaqsy batap edi. Ekinshi jekpe-jeginde qarsylasy odan aılasyn asyryp ketti.
Áıelder boksynja álem chempıonatynyń eki dúrkin júldegeri Alýa Balqybekova jańa 50 keli salmaqtaǵy birinshi jekpe-jeginde jeńiske jetti.
28 jastaǵy otandasymyz Chehııanyń jas boksshysy Klaýdıa Totovamen kezdesip, 3 raýnd boıy aıqasty óz baqylaýynda ustady. Onyń qarsylasy besinshi buryshty izdep, sońynda Balqybaevanyń soqqylaryna shydamaı, jeńildi. Qorytyndy esep — 5:0.
Osy jerde aıtatyn bir nárse, Alýa Balqybekova birinshi márte Olımpıada joldamasyna talasyp jatyr.
Bul salmaqta Parıj Olımpıadasynyń tórt joldamasy beriledi.
Endi otandasymyz búgin taǵy da sharshy alańǵa shyǵady. Al Natalıa Bogdanova men Jaına Shekerbekova jarysty aıaqtaýǵa májbúr boldy.
66 kelidegi Natalıa Bogdanova áýeli Argentına sportshysy Lorena Soledad Balbýenany 4:1 esebimen jeńgen edi. Odan keıin 1/8 fınalda Eýropa chempıonatynyń kúmis júldegeri Aneta Rıgelskaǵa 1:4 esebimen jol berdi.
54 kelidegi tájirıbeli sportshymyz Jaına Shekerbekova 1/16 fınalda Nıgerııa ókili Shýkýra Karımnen 1:4 esebimen ese jiberdi.
Buǵan deıin habarlanǵandaı, 60 kelidegi Rımma Volosenko tórtinshi jekpe-jeginde Slovakııa sportshysy Mıroslava Jedınakovaǵa tóreshiler sheshimimen jeńilgen bolatyn.
Dastan KENJALIN,
ASTANA
View this post on Instagram
