فۋتبولدان قازاقستان قۇراماسى تۇركىمەنستان كومانداسىن جەڭدى

فۋتبولدان قازاقستان ۇلتتىق قۇراماسى بىرىككەن اراب امىرلىگىندە وقۋ-جاتتىعۋ جيىنىنىڭ اياسىندا تۇركىمەنستان كومانداسىمەن جولداستىق كەزدەسۋ وتكىزىپ، 2:0 ەسەبىمەن جەڭدى.

ماتچ تەلەارنادان كورسەتىلگەن جوق. سوندىقتان ماتچ تۋرالى مالىمەتتى قازاقستان فۋتبول فەدەراتسياسى ءوزى الەۋمەتتىك جەلىدە جاريالادى.

قفف-نىڭ حابارلاۋىنشا، كەزدەسۋدە ەل قۇراماسىنان يسلام چەسنوكوۆ ماكسيم سامورودوۆتىڭ بەرگەن پاسىن پايدالانىپ، 2-مينۋتتا، ودان كەيىن الەكساندر زۋەۆ 47-مينۋتتا گول سالدى. زۋەۆ ەركىن تاپالوۆتىڭ پاسىن الىپ، الىستان توعىزدىقتى كوزدەپ، دوپتى تورعا توعىتتى.

ماتچ جابىق ارەنادا بولدى. بۇعان دەيىن قۇراما كوماندالار ءۇش رەت ويناعان بولاتىن. سونىڭ بىرەۋىندە قازاقستان قۇراماسى جەڭىسكە جەتسە، ەكى ويىن تەڭ اياقتالعان.

بۇل ويىنعا  ۇلتتىق قۇرامانىڭ باسىم بولىگى جينالدى. ەندى باس جاتتىقتىرۋشى ماگومەد اديەۆ جاساقتاعان كوماندا 19 ناۋرىزعا دەيىن وقۋ-جاتتىعۋ جيىنىن وتكىزىپ، ءارى قاراي گرەكيانىڭ افينا قالامسىنا جولعا شىعادى. 21 ناۋرىزدا ۇلتتىق قۇراما ۇلتتار ليگاسىنداعى «تورتتىكتىڭ تۋرنيرىندە» سىرت الاڭدا گرەكيامەن كەزدەسەدى. ەگەر قازاقستان جەڭسە، 26 ناۋرىزدا تاعى دا سىرت الاڭدا گرۋزيا-ليۋكسەمبۋرگ كوماندالارىنىڭ اراسىنداعى ويىننىڭ جەڭىمپازىمەن وينايدى.